Hatutan.com, (07 Novembru 2022), Díli- Governu liuhosi Sekretáriu Estadu Juventude no Desportu (SEJD) tau orsamentu ho montante $100,000 hodi komemora loron nasionál juventude no masakre Santa Krús bá dala-XXXI (12 Novembru 1991-2022).

Lee Mós : FFTL “Deve” Jogadór Sira, SEJD Hetan Ona Esplikasaun

SEJD Abrão Saldanha hamutuk ho komisaun organizadora selebrasaun loron nasional juventude no Masakre Santa Krús halo audensia ho PR Ramos-Horta, Segunda (07/11/2022). Foto/GPR

Tema ba selebrasaun Loron nasionál juventude no loron Masakre Santa Krús mak “Ho espíritu, kaer metin bá valor sira juventude rezisténsia nian, hamutuk ita kontinua konstrui nasaun ho esperansa ba futuru”.

Sekretariu  Estadu Juventude no Desportu (SEJD) Abrão Saldanha, Segunda (07/11/2022), informa, sira-nia parte hamutuk ho Komisaun Organizadora ba Komemorasaun Masakre Santa Krús no loron nasionál juventude, inklui mós dezlutu saudozu Max Stahl, momentu ne’e, hasoru malu ho Xefe Estadu hodi apresenta konvite formál ba Xefe Estadu, no husu Xefe Estadu nia disponibilidade atu prezide serimónia 12 Novembru nian iha Santa Krús.

Nia afirma Kona-ba selebrasaun loron nasionál juventude ne’e sei halo iha postu administrativu Timor laran tomak, iha nivel nasionál iha atividade lubuk ida hahú hosi loron 28 fulan-Outubru loron saudozu Max Stahl ho Saudozu Sebastião Gomes nian to’o mai iha loron 12 fulan-Novembru.

“Ita iha atividade sósiu kulturál ne’ebé halo hodi komemora loron ida ne’e, inklui semináriu, kompetisaun, pinturas, diskursu públiku, atividade públiku hanesan motor siklizmu sira ne’e mak aprezenta bá Xefe Estadu,” Abrão Saldanha hateten.

Orsamentu ba selebrasaun 12 Novembru no loron nasionál juventude iha nivel nasionál komisaun tau osan hamutuk $40,000 liu, ne’e eventu rua hamutuk, eventu dezlutu Saudozu Max Stahl nian, to’o selebrasaun Masakre Santa Krús, 12 Novembru no loron nasionál juventude nian.

“Selebrasaun iha Postu Administrativu ida-idak ita tau orsamentu kuaze $60,000 ne’ebé distribui bá postu ida-idak iha Timor laran tomak hodi sira selebra de’it iha ne’ebá,” Nia subliña.

Prezidente Repúblika José Ramos-Horta disponivel atu bá partisipa eventu ida ne’e no prontu atu hato’o mensajen bá joven sira iha loron 12 fulan-Novembru ne’e.

Jornalista: Vito Salvadór