Hatutan.com, (09 Novembru 2022), Díli—Prezidente Parlamentu Nasionál (PPN), Aniceto Longuinhos Guterres konkorda ho estudante sira ne’ebé oras-ne’e daudaun halo asaun pasífika hodi ezije atu hapara planu sosa karreta foun bá deputadu sira, maibé desizaun finál depende ba plenária.

Movimentu universitáriu Timor-Leste, liuhosi Aliansa Maubere Nasionál (AMN), ezíje bá Parlamentu Nasionál (PN) atu kansela sosa karreta Prado Spot ho Laptop bá deputadu ho deputada sira. Ezijénsia hirak ne’e AMN hato’o liuhosi asaun pasífika ne’ebé hala’o iha kampus sentrál Universidade Nasionál Timor-Lorosa’e (UNTL) Caicoli, Segunda (07/11/2022).

Tanba ne’e Aniceto husu atu membru órgaun lejislatura tomak reve hikas polítika sosa karreta tuir estatutu  deputadu sira nian.

Lee Mós: Protestu Fulan Rua Kontra Sosa Karreta Foun bá Deputadu Sira

“Ha’u konkorda ho estudante no joven sira ne’ebé agora daudaun halo manifestasaun ne’e. Kestaun atu hatama osan ka hasai osan hosi OJE 2023 hodi sosa karreta ba deputadu sira, ha’u laiha objesaun tanba plenária mak soberanu atu deside. Maibé, buat importante mak konvida hotu-hotu atu haree hikas politika atu fasilita transporte ba deputadu sira,” Aniceto Longuinhos Guterres hateten iha intervensaun durante debate OJE 2023 iha faze jeneralidade, iha PN, Kuarta (09/11/2022).

To’o ona tempu atu Parlamentu Nasionál reve politika oinsa atu fasilita transporte ba deputadu sira tanba Governu hakat tiha ona bá politika ida, ba kargu xefia sira ne’ebé agora la atribui karreta, no atribui de’it subsídiu transporte.

Estatutu deputadu sira nian hateten katak, deputadu sira iha direitu ba transporte, maibé direitu ba transporte ida-ne’e la signifika tenke hetan karreta.

“Interpretasaun ida-ne’e, uluk FRETILIN kontra ida-ne’e, ha’u xefe bankada, ha’u mak hamrik iha oin hodi kontra sosa karreta. Loloos atribui de’it subsídiu karreta tanba interpretasaun direta la signifika tenke sosa karreta ba deputadu sira,”

Presiza haree hikas polítika sosa karreta no bele hili dalan tuir polítika governu nian, hodi hetan subsidiu transporte ne’ebé klaru katak tenke razoável.

Nia husu ne’e tanba prosesu sosa karreta, hahú kedan ho akizisaun ne’e problema boot, aumenta despeza, selu motorista ne’ebé hahú husi II lejislatura, motorista ida nia saláriu mais de $300, no deputadu sira hetan subsídiu kombustível fulan-fulan, iha mós subsídiu anuál ba sosa roda ho montante $ 1.250, subsídiu manutensaun ho kategoria A ne’ebé liu $1000 kada tinan, no ba manutensaun ho kategoria B ezezaradu tanba foin mak hadi’a ohin aban aat.

“Kuandu sosa kareta problema iha hela deit, tanba ne’e mak di’ak liu muda politika, muda forma oinsa atu fasilita transporte ba deputadu sira,” nia sujere.

Jornalista: Vito Salvadór