Hatutan.com, (14 Novembru 2022), Díli—Ministru Justisa (MJ), Tiago Amaral Sarmento rekoñese katak, mákina produsaun kartaun Billete Indentidade (BI), iha serbisu notariadu munisipiu Díli inklui iha munisípiu sira seluk maioria avaria, nune’e promete sei hadi’a ho Orsamentu Jerál Estadu (OJE) 2023.

Ministru Justisa (MJ), Tiágo Amarál Sarmento. Foto/Elio dos Santos da Costa.

“Mákina produsaun ba kartaun Billete Indentidade barak aat no sei rezolve iha tinan oin ho orsamentu foun,” Ministru Justisa, Tiago Amaral Sarmento hateten ba Hatutan.com iha Parlamentu Nasionál, Segunda (14/11/2022).

Lee Mós: Mákina Prodús BI iha Munisípiu Ne’en Kontinua Aat

Ministru Justisa hateten hodi responde ba preokupasaun komunidade ne’ebé kada loron sempre ba forma iha serbisu notariadu munisípiu hodi trata kartaun BI, maibé kuaze forma naruk no sei nafatin hetan kartaun provizóriu.

Tuir nia, Ministériu Justisa sei tau prioridade hodi hadi’a mákina ne’ebé aat iha tinan oin ho orsamentu ne’ebé iha.

Tuir observasaun Hatutan.com iha edifísiu Konservatóriu ba Servisu Rejistu Notariadu Díli (KSRND) iha Caicoli, Díli, Segunda dadeer (14/11/2022), hatudu katak sidadaun sira ne’ebé bá trata sira-nia dokumentu relevante kontinua sena-malu, forma naruk tanba KSRND hasai ona regra katak loron ida sira bele trata de’it dokumentu bá ema na’in 100.

Antes ne’e mós Hatutan.com asesu informasaun hosi sidadaun balun katak, sidadaun sira ne’e balun iha tuku 04:00 dadeer de’it bá forma ona hodi hein ekipa tékniku sira atu bele hetan atendimentu. Hatutan.com koko halo entrevista duni ho sidadaun sira-ne’e maibé sira lakohi fó entrevista ka komentáriu.

Antes ne’e mós Hatutan.com rekolla informasaun hosi sidadaun sira, liuliu hirak ne’ebé trata dokumentu sira ne’e iha fatin refere konfirma katak situasaun ne’e la’ós foin akontese iha períodu tinan 2022, maibé dezde kedan tinan 2021.

Maske forma tiha hodi han tempu naruk trata dokumentu sira-ne’e, maibé la sertamente tenke foti kedan rezultadu ka dokumentu sira ne’ebé mak trata. Maibé tenke hein to’o semana no balun tenke aguenta to’o fulan mak bele hetan sira-nia dokumentu orijinál hanesan BI, Sertidaun RDTL, Sertidaun Kazamntu no Sertidaun Óbitu.

Sidadaun sira ne’ebé bá trata sira-nia dokumentu relevante, kontinua sena-malu, forma naruk iha edifísiu Konservatóriu ba Servisu Rejistu Notariadu Díli (KSRND) iha Caicoli, Díli, Segunda dadeer (14/11/2022).Foto/Elio dos Santos da Costa.

Antes ne’e mós Hatutan.com konsege halo ona konfirmasaun ho Diretora Konservatóriu Servisu  Rejistu Notariadu Díli, Alda Maria José Pereira Soares da Silva, nia parte rekoñese atendimentu la’o hanesan ne’e dezde iha tinan 2021 tanba menus rekursu no ekipamentu ne’ebé la sufisiente hodi halo atendimentu bá ema barak iha loron ida de’it.

“Ami esplika ona ba komunidade kona-bá situasaun ne’ebé ami enfrenta tanba iha laran ne’e menus rekursu no ekipamentu la sufisiente tanba mákina balun avaria daudaun ona, inklui komputadór, mákina imprime no scanner mós aat daudaun, ho nune’e, ami fó atendimentu kada loron bá ema 100 hodi sukat mós ami nia forsa traballu iha laran no ekipamentu ne’ebé iha,” Alda Maria José Pereira Soares da Silva hateten.

Atendimentu bá BI, laiha limitasaun maibé konforme bá mákina Fargo ne’ebé prodús no imprime BI tanba daudaun ne’e iha mákina ida d’eit no bainhira manas maka tenke para atu nune’e malirin maka foin bele kontinua imprime. Bainhira obriga no aselera, bele avaria total no ema hotu iha Dili laran labele trata ona BI tanba susar tebes atu halo manutensaun.

Relasiona ho situasaun ne’e, Konservatóriu Servisu Rejistu Notariadu Díli hato’o ona pedidu bá Ministériu Justisa liuhusi Servisu Notariadu Nasionál, atu bele hetan solusaun.

Lee Mós: Abitante Sira Forma Naruk no Hein Kleur Trata BI ho Sertidaun RDTL

Jornalista: Vito Salvadór