Hatutan.com, (17 Novembru 2022), Díli—Governu liuhosi Ministériu Solidariedade Sosiál no Inkluzaun (MSSI), iha ona oráriu fixu atu distribui subsídiu “Fim do Ano” $200 bá família vulnerável no sira ne’ebé rendimentu kiik liu $500, iha fulan Dezembru tinan ne’e.

Osan Dolar Amérika. Foto/Google.

“Iha primeiru semana dezembru ne’e ita halo pagamentu,” Ministra Solidariedade Sosiál no Inkluzaun, Armanda Berta dos Santos hateten hafoin partisipa debate no votasaun espesialidade OJE 2023 iha Parlamentu Nasionál, Kinta (17/11/2022).

Lee Mós: Prezidente Repúblika Promulga Dekretu Lei Subsídiu $200

Oras-ne’e daudaun ekipa tékniku sira haree hikas dadus uma-ka’in 339.000 ne’ebé molok ne’e Ministériu Administrasaun Estatál (MAE) submete ona bá MSSI.

Iha prosesu filtrazen ne’e sei hala’o separasaun bá dadus funsionáriu sira ne’ebé mak ho saláriu menus hosi $500, mai kraik.

Kona-bá dadus, nia la lembra dadus atuál tanba tékniku sira sei halo filtrazen, maibé dadus antes ne’e iha totál Xefe Família 339.000 ho montante orsamentu millaun $68.

Iha Kuarta (16/11/2022), Prezidente Repúblika (PR), José Ramos-Horta, promulga ona Dekretu-Lei 37/2022, kona-bá pagamentu “Subsídiu iha Fim do Ano”.

Jornalista: Rogério Pereira Cárceres