Hatutan.com, (18 Novembru 2022), Díli-Governu liuhosi Ministériu Justisa (MJ),  Diresaun Jerál Terras no Propriedade (DJTP), sei atribui sertifikadu na’in bá rai bá abitante na’in-39 iha loron 27 fulan-Novembru 2022. 

Lee Mós : Atribuisaun Sertifikadu Rai Sei Fó Uluk Prioridade ba Veteranu-UKL

Ministru Justisa (MJ), Tiágo Amaral Sarmento, hala’o konferénsia imprensa iha sala auditóriu Ministeriu Justisa, Díli, Sesta (18/11/2022). Foto/Elio dos Santos da Costa

Ministru Justisa (MJ), Tiágo Amaral Sarmento informa, iha lansamentu dahuluk bá sertifikadu na’in bá rai  sei lansa iha Rejiaun Administrativa Espesiál Oé-Cusse Ambeno (REAOA), tanba Oé-Cusse mak nu’udár odamatan-boot Timor-Leste nian iha mundu.

“VII Governu Konstitusionál liuhosi Ministériu Justisa sei halo lansamentu bá atribuisaun sertifikadu Na’in bá Rai (Certidão do Direito da Propriedade)  iha loron 27 fulan-Novembru  iha RAEOA, no simultáneamente iha munisípiu 12 iha loron 28 fulan-Novembru iha ámbitu Komemorasaun Loron Proklamasaun Independénsia bá dala-47, bá sidadaun ka benefisiáriu hamutuk 39, iha territóriu Timor laran tomak,” Ministru Justisa (MJ), Tiágo Amaral Sarmento, hateten bá jornalista sira liuhosi konferénsia imprensa iha sala auditóriu Ministeriu Justisa, Díli, Sesta (18/11/2022).

Sidadaun na’in-39 ne’e, kompostu hosi Munisípiu Aileu na’in-rua (2), Ainaro na’in-rua (2), Baucau na’in-rua (2), Bobonaro na’in-tolu (3), Covalima na’in-tolu (3), Dili na’in-hitu (7), Ermera na’in-tolu (3), Lautem na’in-haat (4), Liquiça na’in-tolu (3), Manatuto na’in-ida (1), Manufahi na’in-rua (2), REAOA na’in-neen (6) no Viqueque na’in-ida (1).

Hosi númeru ne’e, na’in-33 identifika hosi benefisiáriu bá programa Uma Kbiit Laek (UKL), no na’in-neen (6) seluk nu’udár veteranu, tanba sira nia rai laiha problema.

Tiágo Amaral Sarmento, esplika, objetivu hosi atribuisaun títulu na’in bá rai ne’e, primeiru mak, oinsá atu asegura ka fó seguransa bá sidadaun sira-nia direitu bá rai (prevene ema seluk hadau na’in loloos nia rai). Ho sertifikadu na’in bá rai bele fasilita sidadaun sira asesu kréditu iha banku sira.

“Hamenus disputa rai, tanba baliza klaru ona iha terrenu no informasaun loloos kona-bá na’in bá rai rejístadu iha baze dadus Kadastrál. Prevene fraude iha prosesu fa’an no sosa rai ka fasilita prosesu fa’an no sosa rai tuir dalan legál,” Ministru Tiágo Amaral Sarmento, hateten.

Ho sertidaun direitu bá propriedade nian ida ne’e, bele fó valór aumentu iha prosesu fa’an no sosa rai (ezemplu iha legalidade nune’e folin rai sei aas liu, kompara ho rai ne’ebé laiha sertidaun direitu bá propriedade nian).

“Sidadaun sira bele halo kontratu ho setór privadu sira ho seguransa ne’ebé di’ak liu kona-bá sira-nia direitu bá rai,” Ministru Justisa esplika tán.

Progresu no preparasaun bá atribuisaun sertifikadu títulu na’in bá rai hahú kedan iha fulan-Fevereiru 2022, ho Promulgasaun Kódigu Rejistu Predial no Promulgasaun Dekretu-Lei informasaun Kadastrál hosi Prezidente Repúblika iha fulan-Agostu tinan ne’e.

Baze legál sira kona-bá administrasaun rai nian maka:

1.         Lei rai númeru 13/2017 : Rejíme Especial para a Definição Titularidade dos Bens Imóveis.

2.         Dekretu-Lei númeru 14/2022 : O Código do Registo Predial.

3.         Dekretu-Lei númeru 65/2022 : Informação Cadrastrál Predial.

4.         Diploma Ministérial o Modelo Ceridão do Direito de Propriedade iha loron 09 fulan-Novembru 2022.

5.         Dimploma Ministerial Número Único de Identificação do Prédio, publika iha loron 09 fulan-Novembru 2022.

6.         Diploma Ministerial a Certidão de Registo Predial, publika iha loron 09 fulan-Novembru 2022.

7.         Diploma Ministerial o Modelo dos Impostos do Registo Predial, publika loron 09 fulan-Novembru 2022.

Molok ne’e, iha 09 setembru ne’e, Primeiru Ministru (PM), Taur Matan Ruak, diretamente fó orientasaun bá tékniku DJTP kona-bá atribuisaun Certificado do Direito de Propriedade (Títulu Na’in bá Rai).

Nune’e, iha 26 setembru to’o 11 Outubru 2022 ne’e, ekipa tékniku halo kedan levantamentu terrenu ka rekonstrusaun baliza iha munisipiu 12 ho REAOA. Ikus mai, iha 17 to’o 27 Outubru, ekipa halo kedan levantamentu terrenu ka rekonstrusaun baliza iha Munisipiu Dili.

Hafoin atividade iha terrenu, ekipa halo prosesamentu, analiza no verifika dadus iha loron 28 fulan-Outubru to’o 29 Novembru 2022. Iha 16 fulan-Novembru ne’e, publika ona Diploma Homologasaun no oras ne’e daudaun sei finaliza hela prosesu imprími Certidão do Direito de Propriedade.

Dadus rai ne’ebé mak daudaun ne’e MJ iha, mai hosi dadus rai ne’ebé mak antes ne’e Sistema Nacional de Cadastro (SNC) halo ona levantamentu iha territóriu Timor laran tomak.

Jornalista: Rogério Pereira Cárceres