Hatutan.com, (18 Novembru 2022), Díli- Prezidente Repúblika (PR), José Ramos-Horta, Sesta (18/11/2022),  konvida ka “bolu”  órgaun eleitoral Komisaun Nasionál Eleisaun (CNE) ho Sekretariadu Tékniku Administrasaun Eleitorál (STAE) hodi husu preparasaun bá eleisaun parlamentár 2023.

Lee Mós : ParPol ho Nia Lider Sira La Bele Bosok Povu

Diretór Jerál STAE Acilino Manuel Branco ho Prezidente CNE, José Agostinho Belo. Foto/GPR

Xefe Estadu husu CNE ho STAE atu hadi’a lakuna balun ámbitu eleisaun prezidensiál liubá, atu nune’e, eleisaun parlamentár mai ne’e buat hotu bele la’o ho di’ak.

Nia afirma Prezidente Repúblika mós ohin hato’o atu órgaun eleitoral sira tenke hare atu partidu polítiku sira iha kampaña buka aprejenta programa labele buka mak insultu malu, tamba ne’e nu’udar orgaun eleitorál sei ko’alia mós ba partidu hotu-hotu maibé haree ba lei no ida ne’e hanesan responsabilidade partidu sira nian katak kampaña ne’e oinsá atu eduka eleitór sira kompriende liu tan, no aposta sira nia hanoin ba futuru.

“Sé ita sente katak ita kompriende hotu, ita sei la insulta malu, ida ne’e la ajuda partidu sira nian imajen, tanba ne’e mak ema hakarak pás, estabilidade, se iha partidu balun komete ho liafuan sira hanesan ne’e ha’u hanoin eleitór sira direitu atu julga,” Prezidente CNE, José Agostinho Belo, hateten bá jornalista sira hafoin hasoru malu ho Xefe Estadu iha Palásiu Prezidensiál.

Prezidente Repúblika  sei dekreta kalendáriu bá eleisaun parlamentár iha fulan-Fevereiru 2023,  tanba ne’e CNE nu’udár órgaun implementador kumpre  kualkér desizaun  Xefe Estadu.

Hanesan órgaun eleitorál CNE halo deit nia servisu no hanesan orgaun implementadór implementa saida mak lei hateten, maibé CNE mós fó hanoin atu partidu sira hadia kualidade partidu nian.

Diretór Jerál STAE Acilino Manuel Branco hateten, STAE mai hamutuk ho CNE kumpri ba konvite Prezidente Repúblika konvida orgaun eleitorál rua, Xefe Estadu hanesan hatene orgaun rua ne’e nia servisu.

Mai informa mós servisu sira ne’ebé STAE hala’o tiha ona liu-liu kona-bá eleisaun prezidensiál ne’ebé remata ona no haree prozesaun bá oin saida mak presija servisu maka’as hadi’a di’ak liu tan.

Xefe Estadu mós husu atu hamutuk buka medida foun sira balun ne’ebé bele garante di’ak liu tan partisipasaun sidadaun sira nian iha eleisaun liu-liu bá Timoroan sira ne’ebé iha estranjeiru.

STAE informa mós kona-bá planu preparasaun ba iha eleisaun parlamentár tinan 2023 nian ne’ebé foin konklui prosesu tomak bá iha eleisaun prezidensiál, hala’o hela resenseamentu no nia prosesu tomak ba iha preparasaun eleisaun parlamentár ne’e sei foka inisiu 2023 depois orsamentu hetan promulgasaun.

“STAE ninia levantamentu planu operasionál sei konkretiza depois orsamentu 2023 promulga,”  nia hateten.

STAE sei halo resenseamentu iha diáspora bazeia ba rekomendasaun MNEK

Acilino Manuel Branco haktuir mos katak kona-bá resenseamentu eleitoral iha diáspora no atu aumenta sentru votasaun sira ne’e hotu kabe bá rekomendasaun husi Ministériu Negósiu Estranjeiru no Kooperasaun nia kopetensia no STAE-CNE hanesan orgaun eleitoral implementa deit.

Resenseamentu diáspora nian momentu ne’e STAE identifika hamutuk ho CNE, parte Ministériu Justisa bele haree futuru kontinua iha atendimentu ida ne’ebé integradu haree kona-bá rekizitu bá dokumentu sira hamutuk mós MNEK re-identifika sentru atendimentu sira iha rai-li’ur, atu aumenta tan sentru foun sira iha rai- li’ur liuliu bá Timoroan sira ne’ebé la’ós nasaun ne’ebé  hala’o tiha ona prosesu sira anterior.

“Aumenta sentru resenseamentu ne’e iha país sira balun tuir kompeténsia MNEK ninian sei haruka bá Konsellu Ministru hodi aprova, maibé bá sentru sira ne’ebé eziste ona resenseamentu sira anteriór sei aumenta tan fatin hat ka lima,” Acilino Manuel Branco hateten.

Ba sentru votasaun ne’e, STAE iha nia planu operasionál atu  aumenta purvolta 300 sentru votasaun no iha 500 estasaun votus, entaun iha eleisaun prezidensiál 1.200 sentru votasaun, STAE propoin bá iha 1.500 sentru votasaun ba iha estasaun votu 1.900.

Jornalista: Vito Salvadór