Hatutan.com, (21 Novembru 2022), Díli—Hahú ohin, Segunda (21/11/2022) transporte kontentór labele halo ona movimentu iha tempu loron hahú tuku 07:00 dader to’o tuku 18:59, bainhira kontra sei selu multa hahú hosi $75 avansa ba $600 no másimu $3.000.

Sirkulasaun kontentór iha sidade Díli, Tersa (26/07/2022). Foto/Hatutan.com.

Polísia Nasionál Timor-Leste (PNTL) liu hosi Seksaun Tránzitu Munisípiu Díli simu ona orientasaun atu halo kontrolu másimu hodi bandu movimentu kontentór iha tempu loron, bazeia bá despaixu konjunta entre Ministériu Transporte Telekomunikasaun (MTK) ho Ministériu Interiór (MI).

Lee Mós: Tenke Halo Alterasaun bá Oráriu Sirkulasaun Kontentór

Despaixu ne’e autoriza de’it kontentór sira atu sirkula iha tempu kalan hahú tuku 19:00 to’o fali tuku 06:59 dader madrugada.

“Bainhira kontentór sira ne’e viola despaixu konjunta ne’e, ita sei implementa lei kódigu estrada iha artigu 10 aplika multa ho sansaun $75,” Komandante Polísia Tránzitu Munisípiu Díli, Inspetór Domingos Sarmento Gama hateten iha Caicoli foin lalais ne’e.

Parte Tránzitu husu ba kompañia sira katak, labele haree $75 no sasan kuantidade ne’e kiik hodi koko atu viola lei kódigu estrada artigu 10, tanba Polísia sei avansa bá artigu 57 kona-bá transporte ne’ebé boot liu no todan liu labele halo sirkulasaun iha Díli no estrada públiku sei selu multa másimu.

Avansu ba implementa aritgu 57 kona-bá selu multa ho mínimu $600, maibé ida ne’e Polísia sei aplika másimu $3.000, tanba sasaun ne’e hakerek lei.

Despaixu konjunta ne’e aprova kedan iha fulan Setembru tinan 2022, no tuir loloos Polísia implementa ona maibé fó tempu ba kompañia sira atu pasa informasaun ba kondutór sira.

Tanba ne’e iha implementasaun PNTL husu kompañia no kondutór sira tenke koopera ho autoridade seguransa liu liu Polísia Tránzitu, atu labele halo fali asaun krimi kontra PNTL iha terrenu.

“Bainhira viola regra infrasaun labele koko halo fali konfrontu hasoru ha’u nia membru sira. Ha’u sei la tauk se de’it no sei kaptura entrega ba parte invetigasaun atu prosesa,” nia ko’alia ho lian makas.

Despaixu konjunta ne’e hateten momoos katak, bandu totál kontentór tantu tula sasán ka mamuk, labele movimentu iha tempu loron no laiha esepsaun.

Jornalista: Rogério Pereira Cárceres