Hatutan.com, (15 Novembru 2022), Díli—Membru servisu sekreta hosi Polisia Nasionál Timor Leste (PNTL) ho naran MB, hetan kanek iha parte kotuk laran no membru FALINTIL Forsa Defeza Timor Leste (F-FDTL) ho naran CSJ, hetan kanek iha parte hasan loos tanba grupu joven sira utiliza fatuk maka tuda.

Membru servisu sekreta Forsa Polisia hamutuk ho BOP buka tuir suspeitu ne’ebé tuda kanek membru Forsa Ida ho Polisia ida iha área Audian Blok III, Estadium Dili,Segunda (14/11/2022). Foto/PNTL.

Insidente ne’e akontese iha loron Segunda tuku 08:40 kalan, banhira membru na’in rua ne’e bá apoia Polisia Tránzitu ne’ebé hala’o pasa revista iha área Audian ninian, no hetan atake hosi grrupu joven balun.

Lee Mós: Konfrontu Dare, Autór 27 Submete bá Primeiru Interrogatóriu Iha 05 Novembru

“Membru servisu sekreta Forsa Polisia hamutuk karreta rua ba apoia Tránzitu Díli, maibé bainhira ekipa to’o iha fatin derrepente hetan reazen hosi grupu joven sira iha área Audian Blok III (Estadium Dili), hodi kontinua lansa kedan fatuk mai iha grupu apoiu hodi rezulta kanek Kamán,” Hatutan.com sita komunikadu.

Hafoin akontesimentu, ekipa konjunta Forsa Polisia junta ho BOP buka tuir kedan suspeitu sira no konsege asegura joven ida ho naran inisial HP, tinan 25, hela iha Audian, Suku Santa Cruz, Postu Administrativu Nain-Feto hamutuk ho autór prinsipál ba akontesemintu refere.

Ekipa konjunta bolu mós sasin sira hodi fó deklasaun iha Eskuadra PNTL Vera-Cruz, relasiona ho akontesimentu ne’e.

Oras-ne’e daudaun membru servisu sekreta na’in-rua ne’e hala’o hela tratamentu saúde iha sentru saude Vera-Cruz.

Jornalista: Rogério Pereira Cárceres