Hatutan.com, (21 Novembru 2022), Atauro- Komandante Polísia Nasionál Timor Leste (PNTL) Munisípiu Atauro, Superintendente Asistente Polísia  Eduardo Campos garante seguransa durante eventu festival Múzika no Kultura Atauro atu bele kontribui bá promove identidade kultural timoroan hotu nian.

Lee Mós : Festivál Múzika-Kultura Lori Ksolok bá Komunidade Ataúro

Komandante Polísia Nasionál Timor Leste (PNTL) Munisípiu Atauro, Superintendente Asistente Polísia  Eduardo Campos. Foto/Vito Salvadór

Situasaun jerál kona-bá seguransa iha área jurisdisaun Munisípiu Atauro  la’o ho di’ak no hakmatek.

“Ami nia preparasaun bá seguransa mós la’o tuir planu operasaun ne’ebé  iha,” Eduardo Campos hateten bá jornalista iha Atauro, Segunda (21/11/2022). 

Atu asegura seguransa di’ak durante eventu nasionál festival Múzika no Kultura Atauro, komandu Munisípiu Atauro hetan mós apoiu hosi komandu jerál PNTL no oras ne’e koloka ona iha fatin hotu ne’ebé komandu identifika ona.

Total membru PNTL ne’ebé komandu jerál apoiu nia númeru serteza seidauk hatene tamba seidauk iha konfirmasaun kona-bá total númeru maibé ho apoiu ne’ebé iha atu bele garante seguransa hodi eventu festival Múzika no Kultura ne’e bele susesu.

 Superintendente Asistente Polísia ne’e subliña kazu krime ne’ebé barak akontese iha Munisípiu Atauro mak kazu violénsia doméstika. Kona fali bá konfrontasaun hanesan arte-marsiál no arte-rituál ne’e iha munisípiu Atauro la eziste.

Jornalista: Vito Salvadór