Hatutan.com, (26 Novembru 2022), Díli— Comissão Anti-Corrupção (CAC) hahú realiza atividade semana anti-korrupsaun hodi komemora loron mundiál anti-korupsaun tinan 2022 nian ho programa semináriu ba partidu polítiku sira ne’ebé hahú ho Partidu Kmanek Haburas Unidade Timor Oan (KHUNTO), Sábadu (26/11/2022).

Comissão Anti-Corrupção (CAC) hahú realiza atividade semana anti-korrupsaun hodi komemora loron mundiál anti-korupsaun tinan 2022 nian ho programa semináriu ba partidu polítiku sira ne’ebé hahú ho Partidu Kmanek Haburas Unidade Timor Oan (KHUNTO), Iha Sede Nasioná Manleuana, Sábadu (26/11/2022). Foto/CAC.

Sensibilizasaun ne’e lideradu hosi Komisáriu CAC Sérgio Hornai ho Komisáriu Adjuntu Prevensaun no Sensibilizasaun (DPS), Luis Sampaio hamutuk ho ekipa Espesialista Anti-Korrupsaun (EAK).

Lee Mós: CAC Lansa Atividade Sanulu Hodi Komemora Loron Mundiál Kontra-Korrupsaun

Iha semináriu inísiu ne’e, CAC hahú uluk ho sensibilzasaun lei nú 7/2020-MPCC ba Estrutura no kuadru partidu polítiku KHUNTO nian ho tema, “Promove Partisipasaun Partidu Polítiku Iha Politika Estadu hodi Prevene no Kombate Korrupsaun liu husi Lei MPCC” iha edifísiu Nasionál Pártidu KHUNTO, Maneluana Díli.

Komisaun iha eventu komemorasaun loron mundiál anti-korrupsaun ne’ebé sei akontese iha dia 09 Dezembru tinan ne’e, fokus hala’o konsiensializasaun públiku, liu-liu ba dirijente no membru partidu polítiku sira.

Objetivu hosi sensibilizasaun ba partidu polítiku sira atu promove partisipasaun públiku ida poderozu liu-tán hodi unifika forsa hamutuk nu’udár movimentu nasionál ida iha asaun ne’ebé rigór ba luta prevene no kombate korrupsaun iha TL.

Partidu polítiku sira nu’udár organizasaun massa, halibur kuadrus intelektuál sira oioin ne’ebé sei ba serví povu iha obrigasaun morál no polítika atu radikaliza-an ho espritu kontra hahalok korrupsaun. Partikularmente, Lei MPCC ne’ebé mai ho espiritu prevensaun boot hodi haluan militante partidu polítiku sira nia koñesimentu jurídiku ba medida sira prevene krime korrupsaun.

Lei MPCC nia ezisténsia, ezize liu-tán kuadru sira partidu polítiku atu kuda formasaun polítika ba nia militantes sira ho baze emansipa povu no prinsípiu integridade aas no bainhira hetan poder ukun, hanoin de’it ba bem estar públiku nian.

Iha artigu 6 hosi lei ida ne’e nian ko’alia espesifiku liu kona-bá obrigasaun partidu polítiku sira atu adopta medida prevensaun sira, liu-liu promove koñesimentu no konsiensializasaun ba membru no dirijente partidu nian kona-ba medida prevensaun korrupsaun.

Komissáriu Sérgio Hornai iha eventu ne’e ko’alia ba estrutura másimu no kuadru sira partidu KHUNTO atu buka aprende no halo leitura kle’an ba ukun-fuan sira temi iha lei MPCC, partikularmente medida sira ba prevensaun nian atu kontribui iha asaun erradikasaun krime korrupsaun.

Komissáriu Sérgio mós bolu atensaun bá estrutura no kuadru partidu polítiku sira KHUNTO nian atu hala’o polítika públika ida ne’ebé tane aas interese nasionál.

“Evita forma hotu-hotu ba interese pesoál, grupu no partidáriu nian bainhira assume podér públiku. Dirijente sira Partidu KHUNTO nian bainhira hetan konfiansa iha instituisaun Estadu, ukun ho legalidade, objetividade no responsabilidade, liu-liu kumprimenta bá lei MPCC. Sé ukun de’it ho asaun subjetividade no hatudu forsa liu fali lei ida-ne’e, Komisaun sei la tolera,” Hatutan.com sita intervensaun Komissáriu Sérgio Hornai iha komunikadu.

Sérgio Hornai fó hanoin katak, uluk nia hetan fiar unanimidade hosi partidu asentu parlamentár sira iha Parlamentu Nasionál (PN) hodi mai tuur iha ne’e, hala’o knaar nu’udár komisáriu tuir de’it lei ne’ebé vigora iha Estadu.

“Ohin ha’u ho konsilleiru partidu KHUNTO tuur hamutuk dada lia, maibé se aban konselleiru hala’o nia funsaun iha instituisaun Estadu la tuir lei ida-ne’e nian haruka, ha’u sei hatudu liman no haruka ba tuur iha ne’eba, ba tuur hodi hatán iha Tribunál,” Komissáriu fó ezemplu.

Iha programa sensibilizasaun lei MPCC loron ida-ne’e, Komissáriu Adjuntu Prevensaun no Sensibilizasaun, Luis Sampaio foku esplika medida sira prevensaun krime korrupsaun nian ba estrutura no kuadru sira partidu KHUNTO nian hanesan polítika Estadu ba Estratejia Nasionál Anti-Korrupsaun (ENAK), Rekrutamentu ajénte sira seitór públiku, kódigu konduta ba ajénte públiku sira, publisidade no transpar’ansia kona-ba aprovizionamentu iha setór públiku, simplifikasaun ba prosedimentu administrativu sira, inklui rejime deklarasaun rendimentu, bens no interese.

Jornalista: Elio dos Santos da Costa