Hatutan.com, (28 Novembru 2022), Manatuto—Governu liu hosi Ministériu Administrasaun Estatál (MAE) agradese ba povu Manatuto ne’ebé partisipa ona iha feira nasionál ne’ebé realiza iha suku Aiteas, Postu Administrativu Manatuto Vila, hodi komemora loron proklamasaun unilatrál independénsia ba dala 47.

Kondisaun fatin feira nasionál hodi komemora loron proklamasaun unilaterál independénsia ba dala 47 iha suku Aiteas, Postu Administrativu Manatuto Vila, munisípiu Manatutu, hafoin akontese udan boot. Foto/José Ramos.

“Molok atu finaliza eventu ida-ne’e, ohin kalan, ita ensera feira ne’ebé hala’o durante loron neen, hahú hosi dia 23 de novembru. Agradese tebes bá komponente hotu, hosi kamada kraik to’o leten, ne’ebé mak kontribui no partisipa iha atividade komemorasaun ida-ne’e liuliu povu Manatuto tomak,” Vise-Ministru MAE, Lino de Jesus Torrezão hateten, Segunda (28/11/2022).

Lee Mós: Loron Proklamasaun Independénsia Bá Dala-47, Prezidente Repúblika Lansa Kritika Hasoru Setór Justisa ho Lei Sira Copy-Paste

Governu mós agradese bá Administradór Munisipiu, Berbardo Lopes ho Administradóra Postu Manatuto Villa, Clara Soares, tanba koopera maka’as no bele koopera hamutuk iha seremónia Isar Bandeira nasionál to’o taka feira.

Durante komemorasaun ida-ne’e, liuhosi komisaun organizadora nasionál, sub-komisaun munisipál, halo atividade barak tebes. Atividade balun mak hanesan, desportu, dansa tradisionais no seluk tán, tanba ema hotu-hotu nia partisipasaun.

Vise Ministru ne’e lori governu sentrál nia naran, agradese bá parte hotu-hotu ne’ebé mak la temi ida-pur-ida, tanba hotu-hotu nia koolaborasaun no servisu hamutuk hodi bele realiza eventu ida-ne’e, boot tebes ho susesu.

Iha fatin hanesan, Ministériu Turizmu Komérsiu Indústria (MTCI) liu hosi Diretór Jerál Turizmu, Jelino Soares agradese mós entidade tomak ne’ebé partisipa ona iha feira ne’e, hodi promove obra no lala’ok instituisaun ida-idak nian, nune’e mós anima komunidade ho atividade oioin.

Eventu ida-ne’e realiza, tanba hetan mós apoiu másimu hosi parseiru dezenvolvimentu sira, mak hanesan Banco Nacional do Comércio Timor-Leste (BNCTL), Empreza Telekomunikasaun Telemor, Telkomcel no seluk tán.

Feira nasionál ne’e, harrame hosi Artista sira hosi nasionál no munisipiu,  mak hanesan Timor Voice Pro ho ekipa Sound System no hetan apoiu mós hosi ekipa Klan.

Durante feira, kada ministériu uza nia osan rasik tuir kada stand ne’ebé sira destaka bá, maibé bainhira ministériu sira ne’ebé laiha orsamentu, parte MTCI mak fasilita.

Grupu Artezanatu sira ne’ebé partisipa iha feira ne’e hamutuk 36 mai hosi Munisipiu Dili, Likisá, Baucau, inklui Manatuto rasik ne’ebé mak hala’o sira nia negósiu ki’ik iha feira ne’e.

Jornalista: Rogério Pereira Cárceres