Hatutan.com, (29 Novembru 2022), Díli—Organizasaun Nasoins Unidas (ONU) liu hosi programa Scaling Up Nutrition (SUN) apresia no fó valór ba esforsu Prezidente Repúblika (PR), José Ramos-Horta ne’ebé fó kontribuisaun boot ba hadi’a nutrisaun povu Timor Leste (TL).

Ekipa programa Saude Inan no Oan – Alola Sunrise Join Venture selebra semanal no fulan fó-susubeen inan 2022 iha suku Uma-Berloik no Dotik, Munisipiu Manufahi, (16/08/2022). Foto/Alolamedia.

“Ha’u mai fó valór tán de’it bá Prezidente Repúblika José Ramos-Horta ninia lideransa hodi gia nasaun ida ne’e, investe barak liu tán ema liuliu iha mal nutrisaun, tanba nutrisaun mak meiu ida atu dezenvolve ita nia dezenvolvimentu fíziku no kakutak tanba ida-ne’e importante ba dezenvolvimentu nasaun ne’e ba oin,” Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU), Gerda Verburg  hateten hafoin hasoru-malu ho Ramos-Horta iha Palásiu Prezidensiál Nicolau Lobato Bairru-Pité, Tersa (29/11/2022).

Lee Mós: ONU Husu Estadu Timor-Leste Foku Hadi’a Povu Nia Nutrisaun

Timor-Leste sai ona Membru ba Scaling Up Nutrition (SUN) durante tinan rua, nune’e Timor-Leste sai ona parte ida hosi nasaun 65 ne’ebé iha Scaling Up Nutrition (SUN) nia laran no governu Timor-Leste  halo servisu barak atu hadi’a no prevene mal nutrisaun no investe barak liu tán iha seguransa ai-han.

Advertisement

Investimentu ida-ne’e hala’o kolaborasaun di’ak tebes entre Ministériu sira relevante ne’ebé ligasaun ba nutrisaun no seguransa ai-han, nune’e mós kolabora di’ak ho ONU parseiru dezenvolvimentu sira hanesan doadores, setór privadu no sosiedade sivíl no haree katak, Timor Leste mós iha akademiku no juventude sira mós ativu liu.

Depois de Timor Leste harii demokrasia no hetan liberdade, páz iha tinan 20 nia laran, oras-ne’e tempu ona Timor Leste atu investe iha ema, nune’e ema bele sai hanesan parte ida atu lori dezenvolvimentu sosiál no ekonomia ba oin.

“Ho Prezidente Repúblika ami ko’alia prioridade sira hanesan prímeiru, oinsá fokus liu tán ba fó susu -been inan ninian, segundu kona-ba ai-han ne’ebé mak seguru, terseiru kona-ba oinsá fó valór bá ema sira ne’ebé halo prátika di’ak liu tán iha área nutrisaun no seguransa ai-han nian inklui Pré-eskolar no mós merenda eskolar nune’e mós fokus ba primeiru mill dias, atu bele prepara di’ak labarik no dezenvolve nia kakutak,” nia hateten.

ONU Hakarak Duni Hadi’a Problema Mál-Nutrisaun TL

Koordenadora Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU), Gerda Verburg ko’alia ba média hafoin hasoru-malu ho Ramos-Horta iha Palásiu Prezidensiál Nicolau Lobato Bairru-Pité, Tersa (29/11/2022).

ONU kompromete serbisu ho Governu oinsá bele hadi’a problema má-nutrisaun povu nian iha Timor-Leste.

Komitmentu ida ne’e, relasiona ho prezensa hosi Koordenadóra Global Movimentu Hadi’ak Nutrisaun, Gerda Verburg, hamutuk ho membru delegasaun tolu, inklui Srikanth Eadara, nu’udár Reprezentante Rejionál Sekretáriadu Movimentu SUN – Ázia no Alexandre Brecher, hanesan Asesór Komunikasaun no Advokasia Movimentu SUN, hodi vizita Movimentu Hadi’ak Nutrisaun (SUN) Timor-Leste.

Advertisement

“Koordenadóra Globál Movimentu Hadi’ak Nutrisaun Gerda Verburg to’o iha Timor-Leste atu diskute kona-bá progresu programa nutrisaun no halo advokasia hodi hadi’a prioridade no rekursu atu responde ba situasaun má-nutrisaun iha rai laran,” Hatutan.com komunikadu.

Durante vizita traballu iha TL, Koordenadóra Global Movimentu Hadi’ak Nutrisaun ka ho lian inglés SUN (Scaling Up Nutrisaun) Movementu no Asistente Jerál Nasoens Unidas, Gerda Verburg, sei hasoru malu ho lider nasionál sira, sosiedade sivíl, setór privadu no doadór sira hodi halo asesmentu ba progresu no diskute asaun atu hadi’ak nutrisaun ba grupu vulnerável sira, liu-liu feto no labarik sira iha Timor-Leste.  

Delegasaun hirak ne’e, mai iha TL, hodi hatán bá konvite hosi Primeiru Ministru (PM), Taur Matan Ruak nian, no iha tersa, (29/11/2022) ne’e, konsege to’o Aeroportu Internasional Nicolau dos Reis Lobato, Comoro Dili, TL.   

Gerda Verburg ho nia delegasaun sira ne’e, simu direta hosi Reprezentante Ministériu Negósiu Estranjeiru no Kooperasaun, Koordenadór Rezidente ONU, reprezentante UNICEFm, Programa Ai-han Mundial (WFP), Organizasaun Mundial Saúde (OMS), no Pontu Fokál Nasional Movimentu SUN, Filipe da Costa no Dirce Maria Soares.

“Vizita ida ne’e hanesan inisiativa global hamutuk ho nasaun 65 no parseiru sira ne’ebé komprometidu atu inspira no halo asaun hodi realiza vizaun mundu nian atu luta hasoru problema malnutrisaun iha forma hotu-hotu to’o 2030, ba ema hotu, liu-liu ba feto no labarik sira. Timor- Leste hola parte ona iha Movimentu SUN iha fulan Setembru tinan 2020,” subliña.

Advertisement

Durante ninia vizita, Verburg hasoru malu ho Prezidente Repúblika (PR), José Ramos-Horta, sei hasorumalu mós ho Primeiru Ministru (PM), Taur Matan Ruak no nia vise sira, Ministru Negósiu Estranjeiru no Kooperasaun (MNEK), Adaljiza dos Reis Magno, Ministru Agrikultura no Peskas (MAP), Pedro dos Reis, Ministra Saúde (MS), Odete Belo, Ajénsia Nasoens Unidas, Xefe Misaun Ajénsia Kooperasaun Bilateral, inklui Parseiru Dezenvolvimentu sira, Organizasaun Sosiedade Sivíl, Setór Privadu sira.

Sei hasoru malu mós ho reprezentante juventude no Akadémiku, no Verburg mós sei halo inaugurasaun ba sala amamentasaun iha MNEK, halo vizita bá eskola hodi observa Programa Merenda Eskolár, Kafé Amamentasaun iha Ospitál Nasional, no apoiu Kangaroo Métodu Suporta Inan (KMC), no sentru saúde hodi observa programa nutrisaun ba inan no labarik sira.                

Sekretáriadu Nasional ba Movimentu SUN Timor-Leste estabelese ona iha Gabinete Primeiru Ministru nia okos, ho objetivu atu lidera koordenasaun nasionál tantu governu no parseiru dezenvolvimentu sira atu hadi’ak problema malnutrisaun iha Timor-Leste.

Sekretáriadu ida ne’e hetan apoiu hosi Ajénsia ONU, (FAO, UNICEF no WFP), Uniaun Europeia, Governu Australia, Governu Japaun, no doadór sira seluk tan, parseiru dezenvolvimentu no akademia.

Lidera hosi nasaun no governu, suporta hosi organizasaun no individual sira, Movimentu SUN lidera asaun koletivu hodi asegura individual, espesialmente feto no labarik sira, atu bele realiza sira nia direitu ba ai-han no nutrisaun, hodi atinji sira nia potensiálidade no forma sosiedade ida ne’ebé sustentável no prosperidade.

Advertisement

Jornalista: Vito Salvadór/Rogério Pereira Cárceres