Hatutan.com, (02 Dezembru 2022), Díli- Sekretáriu Jerál Partidu Frente Revolucionário do Timorense Independente (FRETELIN), Marí Bim Amude Alkatiri, hateten Resistência Nacional dos Estudantes de Timor-Leste (RENETIL) nu’udár organizasaun ida transversal biar nia emar ida-idak ho nia partidu polítiku, nunka fila kotuk ba malu no ida ne’e ezemplu ida ne’ebé ema hotu tenke respeita no agradese tamba Timor-Leste presija ezemplu sira nune’e.

Lee Mós : RENETIL “Hakas-an” Tulun Estadu Iha Dezenvolvimentu Nasionál

Sekretáriu Jerál partidu FRETILIN, Marí Bim Amude Alkatiri, halo diskursu iha kongresu RENETIL bá da- ualu iha CCD, Sesta (02/12/2022). Foto/Elio dos Santos da Costa

“Ha’u hateten pensamentu polítiku transversal maka sei determina futuru rai Timor-Leste. Ida-idak bele iha nia dalan rasik, iha nia partidu rasik, maibé bainhira ko’alia kona-bá hametin Estadu, ita tenke hetan pensamentu transversal no konsensual.” Marí Alkatiri hateten bá jornalista sira iha CCD, Sesta (02/12/2022).

RENETIL sai hanesan organizasaun apartidáriu ida-ne’e transversal no nia membru sira naklekar iha partidu polítiku oin-oin, maibé nafatin iha unidade, fraternidade no amizade hodi hamutuk hametin estadu.

Advertisement

Parabéns ba juventude sira ne’ebé oras ne’e katuas daudauk ona, tamba sei kontinua ho espíritu RENETIL nian. RRENETIL hahú organiza an iha rai Indonézia maibé sai ida de’it ho sira ne’ebé organiza an iha Timor-Leste.

“Ha’u deseju susesu iha kongresu ida-ne’e, no há’u hein katak rezolusaun saida de’it maka aprova iha kongresu ne’e sei reflete espíritu RENETIL nian hodi kontinua luta bá dezenvolvimentu nasionál,” antigu Primeiru-Ministru ne’e tenik.

Iha fatin hanesan, Prezidente Konsellu Kombatente Libertasaun Nasionál (CCLN, sigla portugés), Vidal de Jesus Riak Leman hateten, RENETIL hanesan organizasaun rezisténsia ne’ebé hola parte iha istória  luta Timor-Leste nian.

Nia husu  atu membru RENETIL tomak nafatin asegura organizasaun ida-ne’e nia espíritu hamutuk ho CCLN no organizasaun rezisténsia sira seluk, tamba uluk iha tempu funu hamutuk luta bá ukun an no tempu too ona atu hamutuk luta bá povu nia moris di’ak.

RENETIL, tuir Riak Leman, tenke nafatin sai organizasaun rezisténsia ida ne’ebé sai hanesan ibun no lia povu nian iha tempu ukun an, la bele halo afiliasaun bá partidu polítiku maibé mantein iha unidade nasionál hodi luta bá hametin Estadu.

Advertisement

Prezidente Konsellu Sentrál RRENETIL, Carlos da Silva Lopes “Saky” hateten, RRENETIL hanesan organizasaun apartidariu, katak organizasaun la halo afiliasaun bá partidu polítiku, maibé nia membru sira iha liberdade atu hili partidu ne’ebé sira hakarak tuir.

“Diresaun sira RENETIL nian mak labele hola parte iha estrutura partidu ruma nian, tamba bainhira estrutura kuandu hola parte iha partidu ruma ema bele halo interpretasaun katak sira lori tiha ona RRENETIL bá iha partidu polítiku balun,” Carlos da Silva Lopes “Saky” hateten.

Estatutu RRENETIL bandu atu estrutura organizasaun RENETIL nian atu okupa pozisaun ruma iha kualkér partidu polítiku, maibé livre sai hanesan membru bá kualkér partidu.

Jornalista: Vito Salvadór

Advertisement