Hatutan.com, (05 Dezembru 2022), Díli—Governu liuhosi Ministru Finansas (MF), Ruis Augosto Gomes fiar katak Prezidente Repúblika (PR) José Ramos-Horta sei promulga propósta Orsamentu Jerál Estadu (OJE) 2023, ne’ebé submete ona bá Prezidénsia Repúblika.

Ministru Finansas, Rui Gomes.

“Sé veta ita laiha orsamentu. Signifika ita tama iha rejíme duadésima. Mais ha’u fiar katak sua-exelénsia señor Prezidente Repúblika ema ida ne’ebé matenek, hadomi País depois ida ne’e mós orsamentu ikus liu ona. Ha’u fiar katak sei iha konsiderasaun di’ak bá orsamentu ida-ne’e,” Rui Gomes hateten hafoin sorumutu semanál ho Primeiru Ministru (PM), Taur Matan Ruak, iha Palásiu Governu, Díli, Segunda (05/12/2022).

Lee Mós: Prezidente Repúblika Sei Haruka Proposta OJE 2023 Bá TR Halo Fiskalizasaun Abstrata

Rui Gomes informa mós katak, to’o oras-ne’e ema barak sei konfuzaun ho OJE 2023 ne’ebé ho montante boot tebes kuaze billaun $3.16, tanba sempre mosu ho hanoin ida katak, orsamentu ida ne’e boot tebes no oinsá bele ezekuta hotu.

Nia klarifika, orsamentu ne’e la boot. Governu nia orsamentu loloos bá tinan oin ne’e maka billaun $1.8. Só ke, tuir Lei de Enquadramento Orsamentál (LEO), obriga katak, reseitas hotu ho despezas tomak tenke inskreve iha OJE atu labele iha dezorsamentasaun.

“Tanba ne’e maka, ita haree bá buat ne’e hanesan boot. Mais orsamentu ne’ebé ita ezekuta kada tinan  billiaun $1.4 to’o billiaun $1.5. Ne’e mak ita nia orsamentu,” Rui Gomes hateten.

Rui Gomes mós to’o oras-ne’e seidauk iha informasaun kona-bá Ramos-Horta haruka proposta OJE 2023 bá Tribunál Rekursu (TR) atu halo fiskalizasaun Abstrata.

“Ne’e ita boot sira bá husu de’it iha Gabinete Prezidente Repúblika. Ha’u mós seidauk rona ida-ne’e, ha’u seidauk hatene,” Rui Gomes haruka jornalista sira atu konfirma iha Prezidénsia Repúblika.

Antes ne’e Ramos-Horta mós preokupa ho OJE ba tinan fiskál 2023 ne’e boot tebes no la refleta bá nesesidade moris povu nian inklui kolokasaun persentájen orsamentu ne’e rasik bá seitór produtivu sira ki’ik tebes.

Tuir informasaun ne’ebé Hatutan.com asesu hosi Prezidénsia Repúblika iha Domingu 04 Dezembru 2022, Prezidente Repúblika (PR) José Ramos-Horta haree ona proposta Orsamentu Jerál Estadu (OJE) tinan 2023, no sei haruka ba Tribunál Rekursu (TR) atu halo fiskalizasaun abstrata molok foti desizaun atu veta ka promulga.

Prezidente Repúblika haruka proposta OJE 2023 ne’e ba TR tanba tuir Xefe Estadu nia haree, alokasaun orsamentu ba tinan ida-ne’e boot liu kompara ho tinan sira ne’ebé liu ona, nune’e Xefe Estadu presiza konfirma duni ho parte Tribunál Rekursu atu halo fiskalizasaun hodi haree ninia konstitusionalidade.

Lee Mós: Prezidente Repúblika Preokupa OJE 2023 La Refleta Situasaun Atuál TL

Jornalista: Rogério Pereira Cárceres