Hatutan.com, (05 Dezembru 2022), Díli-Saláriu Désimu Terseiru ka gaji ke-13 bá tinan ida-ne’e (2022) nian hamosu polémika no konfuzaun iha públiku.

Lee Mós : HOAX, Prezidente Repúblika Veta Saláriu Désimu Terseiru

Sorumutuk Ministru Rui Augusto Gomes ho PM Taur Matan Ruak iha Palásiu Governu, Segunda (05/12/2022). Foto/Elio dos Santos da Costa

Iha diskusaun ne’ebé viral ona iha rede sosiál Facebook hatudu tendénsia duun-malu. Balun dehan saláriu désimu terseiru bá tinan-ne’e la iha ona tanb Prezidente Repúblika mak veta tiha Dekretu Lei ne’ebé Governu submete, no seluk fali dehan Governu liuhosi Reuniaun Konsellu Ministru iha loron 03 fulan-Dezembru 2022, aprova ona alterasaun bá diploma kona-bá pagamentu estraodinária bá saláriu adisional fulan ida nian. Enkuantu gaji ke-13 ne’e rasik konsagra nanis ona iha Lei do Trabalho artigu 44 kona-bá Subsídiu Anuál. 

Sita hosi komunikadu imprensa sorumutuk Konsellu Ministrus nian iha loron 9 fulan-Novembru tinan 2022, katak Ministru Finansas, Rui Augusto Gomes, aprezenta projetu Dekretu-Lei ne’ebé aprova husi Konsellu Ministrus kona-bá pagamentu estraordináriu hosi saláriu adisionál fulan ida nian bá funsionáriu, ajente kontratadu sira Administrasaun Públika nian, bá titulár kargu públiku, membru F-FDTL, PNTL, no Sistema Nasionál Intelijente no bá eis titulár no eis-membru órgaun soberania sira. Funsionáriu kontratadu estranjeiru sira laiha direitu bá pagamentu estraordináriu ne’e. 

Iha fali reuniaun Konsellu Ministru nian iha loron 03 fulan-Dezembru 2022, aprova ona alterasaun bá diploma kona-bá pagamentu estraodinária bá saláriu adisional fulan ida nian.

Alterasaun ne’ebé Governu aprova, sei iha diretu bá pagamentu ne’ebé refere funsionáriu sira no ajente administrasaun públika no mós traballadór bá administrasaun públika kontratadu termu sertu ho saláriu ne’ebé ki’ik hosi $500 no ne’ebé la presta atividade profesionál iha gabinete ministerial sira.

Iha Palásiu Governu, Segunda (05/12/2022),  Ministru Finansa, Rui Augusto Gomes, esklarese bá jornalista sira kona-bá  polémika ne’e hodi dehan katak, iha loron 17 fulan-Novembru liubá, Governu haruka tiha ona propósta bá Prezidente Repúblika (PR), José Ramos-Horta. Propósta ida-ne’e, kada tinan sira liubá hanesan de’it, hahú kedan iha 2019, 2020 no to’o 2021 nian mós hanesan.

“Iha gabinete Prezidente da Repúblika, husu para atu halo ajustamentu balu. Tanba ne’e mak, loke fila-fali iha Sesta-feira liubá, koalia kona-bá, kontratadus ho termu-sertu de’it. Mais o restu, hanoin, parese permanese. Mais ne’e, ha’u hanoin kestaun ida  ita- boot sira di’ak liubá husu diretamente bá Prezidente Repíublika. Tanba proposta orijinál ne’ebé ami (Governu-red)  haruka bá mós, iha loron  17 fulan-Novembru,” Ministru Finansas (MF), Rui Augusto Gomes, hateten hafoin hasoru malu ho Primeiru-Ministru (PM) Taur Matan Ruak.

Hatán kona-bá, razaun saida mak Prezidente Repúblika husu bá halo ajustamentu ne’e, Ministru Rui Gomes, husu bá jornalista sira atu konfirma direta asuntu ne’e ho Prezidente Repúblika José Ramos-Horta.

“Ne’e mak ha’u hanoin, pergunta ida  ita-boot sira bele bá husu diretamente bá sua-exelénsia Prezidente Repúblika, tanba ministru das finansas laiha kompeténsia para atu hatán em nome de orgaun de soberanu sira seluk,” Ministru Rui Gomes tenik.

Prezidnésia Repúblika liuhosi liuhosi Gabinete Prezidénsia Republika nian rasik, fó sai katak, la’os Prezidente Repúblika mak husu Governu atu halo ajustamentu balu, maibé parte Governu maka halo alterasaun.

“Sé ita-boot sira haree iha proposta ne’ebé ami haruka bá, loron 17 fulan-Novembru, proposta ne’e hanesan, kada tinan hanesan. Pergunta ne’e, bele husu bá Sua-exelénsia Prezidente Repúblika. Sé promulga ka lae, ne’e prerogativa Prezidente Repúblika nian, la’os hosi ami,” Ministru Rui Gomes afirma.

Mministru Rui Gomes hateten, bainhira Prezidente Repúblika, José  Ramos-Horta la promulga proposta alterasaun ne’e, signifika ema hotu sei la asesu bá saláriu désimu teriseiru ka  gaji-13.

“Sé la promulga, ita laiha désimu-teriseiru. Ita hotu laiha. Purtantu, proposta ne’e tinan-tinan hanessan,” Rui Gomes afirma tan.

Jornalista: Rogério Pereira Cárceres