Hatutan.com, (05 Dezembru 2022), Díli-Conselho de Imprensa de Timor-Leste ho laran-susar tebes simu notísia kona-bá jornalista no ativista  Jill Jolliffe nia mate iha loron 2 fulan-Dezembru 2022. Timor-Leste lakon nia belun no defensór di’ak ida. 

Lee Mós : TL Lakon Belun Jill Jolliffe Ne’ebé Grava Memória Luta bá Ukun Rasik-Aan

Saudoza Jill Jolliffe. Foto/Wikiwedia

Nu’udár ativista no jornalista, Jill Jolliffe habelun-an profisionalmente ho kauza Povo Maubere nian, hahú kedas iha períodu invazaun militár Indonesia nian, tinan 1975.  Pesoalmente nia sai belun bá lider polítiku sira, pioneiru movimentu polítiku 1974-1975. Relasaun pesoál no profisionál ne’ebé lori nia grava hela memória ain-le’ut lider polítiku sira timoroan hanesan, Saudozu Francisco Xavier do Amaral, Saudozu Nicolau Lobato, Saudozu Borja da Costa, Roque Rodrigues, Saudozu Vicente Reis Sahe, no seluk tan liuhosi nia obra profisionál nu’udár jornalista no hakerek-na’in. Hosi nia obra mak jerasaun foun sira bele sani hanoin polítiku revolusionáriu liuhosi obra polítika no poétika lider jerasaun 1974 nian.

Sita hosi komunikadu imprensa Conselho de Imprensa Timor Leste, Segunda (05/12/2022), espresa katak mundo jornalizmu lakon advogada di’ak ida ba jornalizmu krítiku, jornalismo de advocacia bá justa kauza.

Jill Jolliffe hosi 1974 to’o loron ne’ebé hetan moras, nia nunka para atu hanoin no hakerek kona-ba Povo Maubere nia istória luta nian. Ninia hakerek halo istória dezempeñu jornalizmu nian iha Timor-Leste sai istória global liuhosi filme The Balibo Five.

Filme ne’ebé bazeia ba Jill Jolliffe nia livru ho títulu Cover-Up: The Inside Story of the Balibo Five. Historia kona-ba asasinatu Greg Shackleton ho nia kolega na’in 4 hosi kanál televizivu Australia nian iha Balibo hosi militár Indonesia sira iha 16 outubru 1975.

“Jill Jolliffe, jornalista ida ne’ebé prova duni verdade hosi afirmasaun ne’ebé hateten katak kaneta nia meik kro’at liu kilat-musan. Advokasia profisionál bá Povo Maubere nia kauza, halo Jill Jolliffe sai inimigo númeru um rejime Soeharto nian. Nia sai fatór determinante ba negosiasaun polítika entre Portugal-Indonesia bainhira diskute kona-bá planu vizita delegasaun Parlamentár Portugal iha fulan-Outubru 1991. Vizita ne’ebé ikus-mai kansela no sai fatór motivador ida mós bá Manifestasaun Polítika Pasiva Juventude iha 12 Novembru 1991,” Haktuir Conselho de Imprensa de Timor-Leste  iha sira-nia komunikadu imprensa.

Iha tinan 1994, Jill Jolliffe konsege hasoru-malu ho Komandante Nino Konis Santana iha Ermera. Hasoru-malu ne’ebé sai baze ba nia livru Finding Santana.

Conselho de Imprensa de Timor-Leste hato’o nia sentidu Kondolénsia kle’an bá Jill Jolliffe nia mate. Jill Jolliffe nia isin mak mate, maibé nia espíritu lutadór bá buka lia-loos sei la mate. Hanesan mós asuwa’in timoroan sira nian, Jill Jolliffe nia espíritu sei hamahon nafatin Povu Maubere nia jornada ba moris di’ak. Moris di’ak tuir dalan loos no sempre buka lia loos.

Conselho de Imprensa hato’o nia solidariedade bá Jill Jolliffe nia família no belun sira ne’ebé nia husik hela. Lia Loos sei la Mate!

Lee Mós : Timor-Leste Hato’o Sentidu Pêsames Bá Falesimentu Jill Jolliffe

Jornalista : Rogério Pereira Cárceres