Hatutan.com, (07 Dezembru 2022), Díli—Komandu Polísia Nasionál Timor Leste (PNTL) liu hosi Gabinete Jéneru PNTL, Diresaun Vulnerable Person Unit (VPU) ho Tránzitu Nasionál hala’o kampaña kona-bá direitu labarik nian ba família no komunidade atu hasa’e sira-nia koñesementu kona-bá direitu labarik, iha Merkadu Comoro, Díli, Tersa (06/12/2022).

Komandu Polísia Nasionál Timor Leste (PNTL) liu hosi Gabinete Jéneru PNTL, Diresaun Vulnerable Person Unit (VPU) ho Tránzitu Nasionál hala’o kampaña kona-bá direitu labarik nian ba família no komunidade atu hasa’e sira-nia koñesementu kona-bá direitu labarik, iha Merkadu Comoro, Díli, Tersa (06/12). Foto/PNTL.

Komandu PNTL hala’o kampaña ne’e atu hasa’e koñesimentu família no komunidade kona-bá direitus labarik tanba protesaun primeiru ba labarik sira hahú uluk iha família liuliu kona-bá kombate traballu infantíl.

Lee Mós: Dadus KNDL, Labarik 300 Envolve iha Traballu Apoia Família

“Ami-nia programa ne’e hodi halo kampaña no konsiénsializasaun ba ema hotu hanesan família no komunidade, tenke fó protesaun ba labarik, tenke hatene direitu labarik nian atu labele fó servisu ne’ebé perigu ba sira-nia moris,” Hatutan.com sita deklarasaun Xefe Gabinete Jéneru, Kuartél Jerál PNTL, Inspetora Xefe Polísia Maria Martins Fátima iha komunikadu.

Atividade PNTL ne’e mós hanesan sosializasaun no prevensaun ba labarik sira ne’ebé fa’an sasán iha estrada públiku no konsiénsializasaun ba família atu labele autoriza labarik sira mai estrada tanba fó risku ba sira-nia vida.

PNTL mós Ita identifika no deteta labarik kiik oan sira hala’o atividade negósiu iha área Comoro hamutuk na’in-lima, hafoin membru Polísia lori fali ba entrega iha família no kontinua fahe kedan informasaun ba inan-aman sira atu labele viola labarik sira-nia direitu fundamentál ne’ebé lei atribui.

“Atividade negósiu fa’an sasán ida-ne’e inan-aman mak tenke responsabiliza maski família kbi’it la’ek mós responsabilidade ne’e iha inan ho aman. Labele fó todan ba oan sira tanba sira-nia tempu seidauk to’o atu fa’an sasán,” nia fó hanoin.

Parte PNTL hato’o mensajen ba públiku no husu inan-aman sira atu responsabiliza oan sira maski moris iha liña pobreza no ekonomia la sufisiente, inan-aman sira buka meius oinsá sustenta família tanba tempu agora presiza suporta oan sira ba eskola hodi bele dezenvolve nasaun ida-ne’e iha futuru.

Nune’e mós Xefe VPU Nasionál, Inspetór Polísia Ricardo da Costa hateten, sosializasaun ne’e hala’o tanba Timor-Leste ratifika ona konvensaun direitu labarik nian.

“Ita análiza situasaun labarik sira tuir realidade sosiál ne’ebé iha, kada loron labarik sira kontinua hala’o atividade negósiu iha Díli laran,” nia hateten.

Informasaun balun ne’ebé Hatutan.com halibur iha loron 19 Outubru 2021, levantamentu dadus ne’ebé Komisaun Nasionál Direitu Labarik (KNDL) halo durante ne’e ba labarik sira involve iha traballu apoia família hamutuk na’in 300.

Jornalista: Rogerio Pereira Cárceres