Hatutan.com, (08 Dezembru 2022), Díli—Prezidente Repúblika (PR), José Ramos-Horta hasoru-malu ho grupu emprezariál hosi Kuwait no Estadus Unidus Amérika (UEA) iha Singapura, hodi ko’alia no deskute kona-bá oportunidade investimentu iha Timor Leste (TL).

Prezidente Repúblika (PR), José Ramos-Horta hasoru-malu ho grupu emprezariál hosi Kuwait no Estadus Unidus Amérika (UEA) iha Singapura, hodi ko’alia no deskute kona-bá oportunidade investimentu iha Timor Leste, iha Singapura, Kuarta (07/12/2022). Foto/Média PR.

Emprezáriu estranjeiru sira ne’e hakarak haree oinsá sira bele kontribui bá finansiamentu projetu infraestrutura iha Timor-Leste (TL).

Lee Mós: Ramos-Horta Konvida Emprezáriu Português Investe Iha TL

“Grupu ne’e grupu bo’ot ida, sira bele finansia diretamente ka bele mobiliza investidór seluk, inklui banku. Singnifika, empréstimu no tuir sira esplika katak funan sei kma’an menus 3%, laiha limite,” Hatutan.com sita deklarasaun Ramos-Horta iha komunikadu.

Advertisement

Empreza hirak hosi nasaun Kuwait no Estadus Unidus Amérika iha mós prontidaun no sira bele finansia Greater Sun Rise to’o billaun $12 no prefere halo mós investimentu iha área infraestrutura.

“Sira mós hakarak iha atividade investimentu barak liu, tanba sira iha investimentu iha Áfrika. Além de ne’e, sira mós bele halo planu bá Timor-Leste kona-bá Aeroportu, Estrada, ospitál,no uma ba kbi’it laek sira  rihun ba rihun tuir negosiasaun ruma karik governu interesadu bele hasoru sira hodi prepara planu investimentu ida-ne’e,” Xefe Estadu haktuir.

Prezidente Repúblika mós aproveita biban hodi hasoru-malu ho Open Society-Asia Pacific kona-bá planu investmentu ne’ebé antes ne’e Xefe Estadu ko’alia ona ho nia Fundadór George Soros Nu’udár billionáriu Amerikanu.

“Grupu ne’e ema billionáriu Amerikanu ida nian. Ha’u enkontru ona ho sira iha Díli no dala-ida iha Nova Iorké no ha’u husu ba sira ajuda halo revizaun ba Planu Estratéjiku Dezenvolvimentu Nasionál (PEDN) 2011-2030. Tanbá hahú planu PEDN no iha implementasaun 2011, tinan 10 liu ona atu haree saida mak halo di’ák, saida mak iha fallansu iha planu ne’e no tanbá ekonomia mundiál ne’e troka an ba mai, se aspetu planu balun ita mantém ka bele halo alterasaun no adaptasaun konforme situasaun rejionál no mundiál,”  Ramos-Horta esplika.

Ba Xefe Estadu, revizaun ba PEDN presiza duni hodi adapta tuir nesesidade industriál ne’ebé hanaran  intelijénsia artifisiál teknolojia dijitalizasaun.

Advertisement

Prezidente Repúblika mós husu atu ekipa avaliadór kontinua halo revizaun ba PEDN no bainhira remata bele halo diskusaun hamutuk entre revizaun husi Grupu Open Society no parte governu mós presija halo kle’an.

“Open Sosiety hahú servisu ona iha fulan sira ne’e nia laran no inisiu tinan 2023 bele entrega ona ba Prezidente Repúblika sira nia estudu no proposta estratejia ba Timor-Leste,” subliña.

Prezidente Repúblika (PR), José Ramos-Horta hasoru-malu ho grupu emprezariál hosi Kuwait no Estadus Unidus Amérika (UEA) iha Singapura, hodi ko’alia no deskute kona-bá oportunidade investimentu iha Timor Leste, iha Singapura, Kuarta (07/12/2022). Foto/Média PR.

Empreza husi Kwait, Al-Bader International Development Co.W.L.L disponivel atu ko’alia ho governu hodi harii uma ba sidadaun vulnerável, hosi dezeñu, proposta orsamentál no tuir padraun ne’ebé sira aplika ona iha rai barak.

“Sei la gratuita tanba halo konforme akordu entre investór ho governu. Além ida ne’e, xefe ekipa delegasaun hosi empreza Al-Bader, Yousef A. Albader deklara mós katak sira prontu atu investe iha area turízmu,” Xefe Estadu haktuir.

Antes hasoru malu ho emprezáriu sira hosi Kuwait no Estadus Unidus Amérika, Prezidente Repúblika, José Ramos-Horta atende uluk entrevista ida ho Rádiu ida hosi Melborne (Australia)  kona-bá saudoza Jill Jollife ne’ebé mate iha semana kotuk.

Horta koñese Jill Jolliffe hanesan sindikalista Australiana to’o sai nu’udár jornalísta koñesida iha Austrália tamba sempre publika no hakerek kona-ba luta povu Timor-Leste ba ukun-rasik-án, ne’ebé hahú hosi akontesimentu Balibó Five to’o funu remata.

Advertisement

“Nia mai Timor iha tinan 1975, mai nu’udár elementu delegasaun sindikalista Australianu nian no bainhira iha ha’u nia vizita solidariedade iha Jullu 1974, no liu tán tinan ne’e hakerek ona notísia kona-ba Timor,” Xefe Estadu haktuir.

Akompaña Xefe Estadu  iha enkontru ne’e, Ministru Koordenadór Asuntu Ekonomia Joaquim Amaral, Assesór Helder Lopes, embaixadora Maria Carrascalão, Prezidente Trade Investiment, Arcanjo Leite.

Jornalista: Vito Salvadór  

Advertisement