Hatutan.com, (09 Dezembru 2022), Díli—Prezidente Repúblika (PR), José Ramos-Horta prefere atu Timor Leste (TL) estabelese kooperasaun ho Singapura iha área seguransa no defeza liu-liu iha matéria servisu sekreta hanesan Intelijénsia hodi kombate krime organizadu, fase osan  ka money laundry no droga.

Prezidente Repúlika, José Ramos-Horta hasoru-malu ho nia omólogu Prezidente hosi Singapura, Halimah Yacoob iha Palásiu Orchard Rd, Kinta (08/12/2022). Foto/Média PR.

Prezidente Repúlika, José Ramos-Horta hatoo asuntu hira ne’e hafoin hasoru malu ho Nia Homólogu hosi Singapura, Halimah Yacoob no Primeiru Ministru Singapura, Lee Hsien Loong iha Palásiu Orchard Rd, Kinta (08/12/2022).

Lee Mós: Vizita Singapura, Ramos-Horta Sei Hala’o Palestra Públika Iha Institutu Yusof Ishak

Ramos-Horta fó-hanoin katak, Singapura hala’o operasaun missaun ba pás ONU dahuluk iha Timor-Leste iha  tinan 1999, maibé Timor-Leste laiha kooperasaun iha área seguransa ho Singapura, maske iha kooperasaun sólida ho Amérika, Nova Zelándia, Austrália no Portugál.

“Ha’u prefere atu estabelese kooperasaun iha área seguransa no defeza liu-liu iha matéria servisu sekreta ka Intelijénsia, hodi kombate krime organizadu fase osan ka money laundry no droga.  Tanba Singapura iha esperiénsia makaas iha área ne’e no mós apoia Timor-Leste iha área formasaun diplomátika hodi reforsa adezaun Timor-Leste ba ASEAN,” Hatutan.com sita deklarasaun Ramos-Horta iha komunikadu.

Ramos-Horta hasoru malu ho Prezidente Repúblika Halimah, nu’udár fígura konsensuál no koñesida hanesan advogada ne’ebé sempre luta ba direitu traballadór.

Prezidente Repúlika, José Ramos-Horta hasoru-malu Primeiru Ministru Singapura, Lee Hsien Loong, Kinta (08/12/2022). Foto/Média PR.

Alende ne’e, hanesan mós feto primeiru no Mulsumana ida ne’ebé sai Prezidente Repúblika, Halimah hato’o polítika Singapura nian no kontinua hasoru-malu ho Primeiru Ministru Lee Hsien Loong nu’udár oan mane hosi Lee Kuan Yew.

Relasaun bilaterál entre Timor-Leste ho ASEAN metin no promete atu aposta nafatin iha formasaun rekursu umanu no mós investimentu.

Timor-Leste ho Singapura iha relasaun ne’ebé metin iha tinan hirak ne’e, rai ki’ik liu Timor maibé sira hakarak apoiu TL tama ASEAN, nune’e sira hakarak apoia liu tán iha área formasaun no hakarak haree investimentu bo’ot liu iha Timor-Leste.

Ida-ne’e mak objetivu viájen mai Singapura hodi ko’alia kona-bá adezaun bá ASEAN no aumenta kooperasaun iha área formasaun no investimentu tanba ekonomia atu la’o di’ak presiza iha investimentu ne’ebé  barak.

Kooperasaun iha seitór seluk ne’ebé Xefe Estadu konsidera importante maka, funsionamentu administrasaun públika, tanba Singapura okupa pozisaun da-limak iha mundu, nasaun ne’ebé funsaun públika di’ak liu.

Prezidente Repúlika, José Ramos-Horta hala’o vizita bá Palásiu Orchard Rd, Singapura, Kinta (08/12/2022). Foto/Média PR.

Xefe Estadu mós relata ba nia omólogu no Xefe Governu hosi Singapura kona-bá progressu hosi situasaun ekonómika, dezenvolvimentu Greater Sun Rise no situasaun trankuilidade iha Timor-Leste tanba la iha ameasa, violénsia polítika, relijiaun, diskriminasaun étnika.

“Konforme ita rona hosi CEO Woodsite nian, problema uluk hanesan obstákulu ba pipe line mai Timor, agora la ko’alia, ne’e la’ós ona problema. Problema de’it maka finansiamentu, ne’e Timor bele mobiliza atu investe iha Greater Sun Rise. Ne’e hanesan ha’u esplika jeralmente nu’udár porta-vóz Estadu nian. Singapura interesadu loos ho ida-ne’e, emprezáriu sira hosi Singapura hakarak partisipa,” nia tenik.

Ramos-Horta promete atu  kontinua dezafia governu no Trade Invest Timor-Leste atu promove Timor-Leste tanba iha koolaborasaun di’ak entre líder sira no iha estabilidade polítika.

Palestra iha Marina Bay Sands Expo & Convention Center

Hafoin vizita Estadu ba Palásiu, Xefe Estadu mós hato’o palestra iha Marina Bay Sands Expo & Convention Center hodi hato’o konabá Timor Leste nia experiénsia iha rezolusaun konflitu, rekonsiliasaun, demokrasia no integrasaun iha Rejionál.

Antes vizita ofisiál ba Palásiu, Prezidente Repúblika hala’o uluk atividade kuda ai-funan iha jardím Botanic Singapura nu’udár kultura hosi alta entidade ruma hosi nasaun seluk mai Singapura. Foto/Média PR.

“Ha’u halo aprezentasaun Istória Timor nian, iha tempu luta ba independénsia hahú iha 1975-1999, inklui prossesu rekonsiliasaun no oinsa lidera luta hosi Maun Bo’ot Kay Rala Xanana Gusmão, nia ho nia autoriedade morál. Nia mak lidera prossesu rekonsiliasaun, ne’e sinál di’ak. Iha rai barak ha’u sempre dehan, Timor sai modelu rekonsiliasaun ne’ebé la iha ódiu-malu tanba Timor-Leste ho Indonésia la iha ódiu naruk, simu-malu. Rai barak difísil tebes simu-malu iha tempu badak hafoin ukun-rasik-an,” José Ramos-Horta hateten.

Remata  palestra, Xefe Estadu hamutuk ho delegasaun, kontinua fila ba Istana hodi partisipa iha jantar Estadu ne’ebé oferese hosi Xefe Estadu Singapura.

Maibé antes vizita ofisiál ba Palásiu, Prezidente Repúblika hala’o uluk atividade kuda ai-funan iha jardím Botanic Singapura nu’udár kultura hosi alta entidade ruma hosi nasaun seluk mai Singapura.

Jornalista: Vito Salvadór