Hatutan.com, (13 Dezembru 2022), Díli- Prezidente Repúblika (PR) nu’udár mós Xefe Estadu, José Ramos-Horta, preokupa ho servisu autoridade polisiál ne’ebé laiha seriedade hodi kombate krime organizadu sira ne’ebé halo Timoroan sira kontinua hela abandonadu no ‘terus’  iha Portugál.

Lee Mós : Ulun-Boot RDTL Halo Kontrolu Rigorozu Bá Timoroan Bainhira Sai Hosi Timor

PR Ramos-Horta to’o fali iha Timor-Leste, Tersa (13/12/2022). Foto/Elio dos Santos da Costa

Xefe Estadu  hateten, ema ida-idak sai hosi Timor konforme nia hakarak, Governu ho nia rasik aviza dala barak ona, atu bá li’ur buka servisu hetan kontratu bá li’ur, bainhira idade 17 bá leten ema maióridade no iha ona desizaun rasik, maibé tenke ho responsabilidade.

Nia afirma Eea ne’ebé husi Áfrika, Xina, ba Portugál, sira la buka toba iha jardín, sira iha billete marka otél iha kontratu servisu mak bá, agora  Timoroan sai arbiru la rona avizu husi Governu. Nune’e mós autoridade polísia sira to’o agora la rona buat ida, grupu krime organizadu ne’ebé bosok joven sira la halo buat ida.

“Polísia Servisu Investigasaun Kriminál (PSIK) preokupadu liu mak ho joven sira ne’ebé halo buat ruma ne’ebé iha laran, maibé kona-bá krime organizadu hanesan haruka Timoroan bá abandona iha Portugál to’o agora ha’u ezije, husu tiha ona relatóriu fulan hira ona nem rona kazu ida ne’ebé liuhosi Prokuradór Jerál Repúblika (PJR) bá Tribunál,” Prezidente Repúblika José Ramos-Horta hateten bá jornalista sira bainhira fila hikas mai Timor iha Aeroportu Internasionál Prezidente Nicolau Lobato, Díli, Tersa (13/12/2022).

Situasaun ne’ebé iha halo ema kontinua sai, ajénsia sira kontinua bosok joven sira, sira bá toba iha li’ur tanba osan laiha atu bá otél..

“Ha’u sei konvoka fila fali konsellu Superiór Defeza Seguransa atu rona informasaun husi órgaun sira-ne’e haree bá krime organizadu ne’ebé bosok ema tuun-sa’e sai vítima,” Ramos-Horta afirma.

Xefe Estadu hatutan iha informasaun barak loos, kona-bá servisu ajénsia traballadór sira nian iha Timor-Leste, maibé kontinua balun halai bá Malázia, Embaixadór iha Malázia hatete, joven balun ema bosok sira bá Indonézia lori bá Malázia depois mak joven sira ne’e halai bá Embaixada husu ajuda ne’e krime organizadu.

Lee Mós : TL-Portugál Konkorda Rezolve Situasaun Imigrante Timoroan iha Portugál

Jornalista: Vito Salvadór