Hatutan.com, (15 Dezembru 2022), Díli- Prezidente Repúblika (PR), José Ramos-Horta, Kinta (15/12/2022), iha Kantina Matak, Palásiu Prezidensiál, hahú implementa programa kombate mánutrisaun hodi fó tulun bá ema vulneravel sira no liuliu hadi’a nutrisaun bá labarik no inan isin-rua sira.
Lee Mós : ONU Husu Estadu Timor-Leste Foku Hadi’a Povu Nia Nutrisaun
PR Ramos-Horta fó hahán nutirsaun bá labarik sira iha Palásiu Prezidensiál. Foto/Espesiál
Iha Kantina Matak, Palásiu Prezidensiál nian, Xefe Estadu halibur labarik sira hamutuk na’in-300 fahe oráriu bá dadeer na’in-150 no loraik na’in-150 kada loron lima iha semana ida hodi oferese hahán ho nutrisaun.
“Ho hahán sira nune’e la’ós atu rezolve kedas problema sub-nutrisaun ne’e, maibé pelumenus ajuda labarik na’in-300, no la’ós ne’e de’it depois espera embaixada ruma, Nasaun Unidas, setór privadu nasionál, internasionál sira hetan inspirasaun entaun sira bele loke ida iha Becora, Tasi Tolu, Aileu liu-liu iha aldeia ruma foho sub-nutrisaun piór liu tan ne’e hanesan feitu multiplikator ema seluk bele halo ho sira nia rekursu rasik,” Prezidente Repúblika José Ramos-Horta, haktuir bá jornalista sira.
Xefe Estadu hatutan, programa kantina matak nian hanesan buat ne’ebé simples atu loro-loron labarik sira bele mai han loron lima ho orsamentu prezidénsia nian, laiha orsamentu husi fatin seluk depois mak kontaktu setór privadu ruma, se sira hakarak oferese foos ruma, manu ruma no menu hahán sira ne’ebé bele kontribui tulun kombate mánutrisaun.
Iha fatin hanesan, responsavel Kantina Matak Bella Galhos hateten, alvu bá pakote nutrisaun Prezidénsia Repúblika nian ne’e labarik 300, maibé Prezidente Repúblika hatete ona katak sé enkuantu númeru ne’e aumenta laiha problema, nafatin loke espasu, tanba hatene katak iha familia barak tebes-tebes mak sei kontinua han hahán atu bosu maibé la’ós han hahán nutrisaun.
Programa ne’e hahú uluk iha Palásiu Prezidensiál, maibé Xefe Estadu rasik hakarak atu multiplika programa ida-ne’e iha fali fatin seluk hanesan mós programa pilotu, tempu hanesan mós Xefe Estadu hakarak sai inspirasaun boot ida bá parte Governu, setór privadu sira foti inisiativa halo iha munisípiu sira no espera iha munisípiu sira seluk.
Labarik sira simu hahán nutrisaun hosi Prezidente Repúblika. Foto/Espesiál
Labarik sira ne’ebé mai iha Kantina Matak ne’e, iha duni área Palásiu Prezidensiál maibé maioria mai husi foho ne’ebé balun foin muda mai Dili, ka balun mai hela iha Dili maibé la’ós kondisaun ne’ebé di’ak.
“Ami rasik tun hodi foti naran, haree rasik sira nia kondisaun no konvida sira mai iha Palásiu Prezidensiál,” Bella Galhos hateten.
Kantina Matak ne’ebé Prezidente Repúblika hatuur iha Palásiu Prezidensiál ba funsionáriu sira no mós fornese hahán ba grupu alvu ne’ebé hili ona, ne’ebé grupu ida-ne’e mai ousi Kodiva no Arquarius membru LGBT sira ne’ebé hetan oportunidade.
Iha oportunidade ne’e mós Xefe Estadu fahe fogaun, ne’ebé prodús husi Aquarius Timor-Leste ne’ebé halo hosi besi balun atu responde bá família sira ne’ebé kondisaun hein iha dapur ne’e sei uza nafatin fatuk no rai no uza ahi barak tebe-tebes.
Fogaun ida-ne’e hanesan alternativu ida oinsá uza de’it ai ida ka rua, maibé bele te’in hahán dala-rua ka tolu bá família ida.
Programa kombate mánutrisaun ne’ebé Prezidente Repúblika hahú iha Kantina Matak duadaun ne’e hetan ajuda husi setór privadu hanesan Hotel Timor, Dili Mart no mós Toto Fitun, maibé nafatin espasu bá sira seluk tan ne’ebé hakarak ajuda foos ka mina, manu tolun, na’an manu, no modo tahan.
Jornalista: Vito Salvadór