Hatutan.com, (16 Dezembru 2022), Díli—Prezidente Repúblika (PR), José Ramos-Horta apresia ho inisiativa empreza Aero Díli ne’ebé ho intensaun di’ak hahú halo investimentu iha setór aero, hodi tulun Timoroan sira liuliu ho Bandeira Timor-Leste (TL) semo ba nasaun sira iha mundu.

Na’in ba Empreza Aero Díli, Lourenço de Oliveira.

Tanba ne’e Xefe Estadu husu atu empreza bele haree no tau importánsia ba kualidade servisu liuliu asegura pasajeiru sira.

Lee Mós: Aviaun Aero Díli Ho Bandeira TL Hahú Voo Regulár Iha 2023

“Prezidente Repúblika José Ramos-Horta apresia tebes ho inisiativa ne’ebé Aero Dili halo ba Timor Leste. Ne’e hatudu katak, Timor Leste mós bele iha aviaun ne’ebé ho Bandeira RDTL semo ba ema seluk nia nasaun,” Nain ba Empreza Aero Díli, Lourenço de Oliveira  hateten hafoin sorumutu ho Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité (16/12/2022).

Nain ba Empreza Aero Díli ne’e informa ona ba Prezidente Repúblika kona-bá preparasaun ba aviaun aero Dili nian, ne’ebé iha Janeiru tinan 2023 previstu atu tama mai Timor-Leste, hodi halo operasaun ba voo internasionál tuir rotasaun ne’ebé iha liu-liu ba nasaun sira ne’ebé Timor Leste halo ona agreement.

Primeiru voo aero Díli sei halo rotasaun ba iha nasaun tolu hanesan Indonézia, Singapura no Asutrália iha mós posibilidade atu semo ba nasaun sira ne’ebé selebra ona agreement ho Timor Leste.

Aproveita oportunidade ida-ne’e hanesan na’in ba empreza Aero Dili, husu mós Prezidente Repúblika nia disponibilidade atu bele partisipa iha seremónia inaugurasaun ba voo internasionál Aero Díli nian.

Tanba uluk Aero Dili hahú ho aluga de’it aviaun hosi nasaun seluk, Prezidente Repúblika atuál mak ba halo inaugurasaun nune’e hein katak ho aviaun rasik Xefe Estadu sei marka prezensa atu halo inaugurasaun.

“Prezidente Repúblika disponível no prontu atu ba halo inaugurasaun ba momentu importnate ne’e,” informa.

Antes ne’e mós Prezidente Repúblika José Ramos-Horta hateten katak, nia koñese di’ak emprezáriu Lourenço de Oliveira ne’ebé hanesan na’in ba empreza Aero Díli.

Lourenço de Oliveira hanesan Timoroan ida empreendedor ho inisiativa, korajen no kbiit sempre buka kontribui ba ekonomia nasaun nian, halo negósiu hakiak boek iha Ataúro, iha Ataúr express, no hanesan emprezáriu Timoroan oferese mós aviaun ba F-FDTL hodi halo operasaun no oras-ne’e halo tán list ba aviaun bo’ot ne’ebé sei tulun Timoroan sira.

“Prezidénsia sei apoiu 100%, ne’ebé tuir responsabilidade Prezidente Repúblika nian. Governu mak tenke hare insentivu, ha’u sei ko’alia ho Primeiru-Ministru no Ministru Finansas atu haree fó duni isentivu ba investór ida hanesan Lourenço de Oliveira,” Prezidente Repúblika José Ramos-Horta hateten.

Xefe Estadu mós promete atu uainhira Aero Díli hahu halo operasaun iha Timor-Leste sei utiliza deit aviaun Aero Díli iha nia viajen Estadu sira no sei apela mós ba Governu atu utiliza aviaun Timoroan nian rasik hodi garante sustentabilidade investimentu ne’ebé puramente mai hosi Timoroan.

“Há’u sei fó instrusaun ba entidade hotu atu halo viajen ruma uza aviaun Timoroan nian,” subliña.

Jornalista: Vito Salvadór