Hatutan.com, (17 Dezembru 2022), Díli—Prezidente Conselho de Imprensa de Timor-Leste períodu 2022-2026, Virgílio da Silva Guterres “Lamukan”, iha tempu badak, submete karta rezignasaun total  hosi Conselho de Imprensa hodi hala’o hikas knaar foun Estadu nian nu’udár Provedór bá Providoria Direitu Umanu no Justisa (PDHJ).

Virgílio da Silva Guterres “Lamukan”.

Virgílio Guterres “Lamukan” nu’udár ativista no jornalista hetan nomeasaun hosi Parlamentu Nasionál nu’udár Provedór bá órgaun independente PDHJ ho mandatu tinan 2023-2026.

Lee Mós: Virgílio da Silva Guterres “Lamukan” Eleitu Nu’udár Provedór bá PDHJ

Eis prizioneiru polítiku luta  ukun rasik an ne’e, hateten, bainhira nia simu informasaun katak nia eleitu nu’udár provedór bá PDHJ, nia buka konsulta uluk ho estatutu PDHJ nian ho parte kompetente sira. Nune’e, ikus mai foti konkluzaun katak, nia tenke husik hela  ka rezigna an total hosi organizasaun ka instituisaun indireta sira ne’ebé nia hala’o knar bá, inklui mós Conselho de Imprensa atu bele foku bá kna’ar foun nu’udár Provedór bá PDHJ.

Estatutu PDHJ nian regula iha Lei-Númeru 7/2004 de 5 de Maio, iha artigu 17 ko’alia kona-bá inkompatibilidade funsaun PDHJ nian. Nune’e, iha númeru 1 hosi alínea (a) to’o alínea (g).

Hosi kedas alínea (a)  Estatutu PDHJ nian regula katak provedór bá PDHJ tenke husik total  kargu responsavel ka kualkér funsaun hotu iha órgaun konstituisaun. 

“Baze bá fundamentasaun sira iha Estatutu PDHJ nian, ha’u tenke rezigna an ka husik hela Conselho de Imprensa, inklui kargu funsaun sira seluk iha organizasaun sira seluk ne’ebé ha’u haknaar an bá, hanesan Asosiasaun eis Prizoneiru Politiku Timor-Leste  (ASSEPOL) ho mós KADAI,”  Virgílio da Silva Guterres “Lamukan” hateten iha Retiru Annual Conselho de Imprensa 2022 ne’ebé hala’o iha Railaco, Munisípiu Ermera, Sesta (16/12/2022).

Iha okaziaun ne’e, Provedór eleitu bá PDHJ, Virgílio da Silva Guterres “Lamukan”  hato’o agradesimentu ida kle’an tebes bá apoiu no apresiasaun hosi entidade hotu-hotu, ne’ebé hato’o ona bá nia liuhosi mensajen, telefónika direta, inklui mós apresiasaun sira ne’ebé hato’o liuhosi media sosiál Facebook, WhatsApp bainhira nia eleitu bá knar foun ne’e.

“Bá dala ukun ha’u hato’o ha’u nia agradesimentu bá apoiu sira hotu no apresiasaun sira mai hosi kamada oioin. Ha’u sei hala’o knaar ida-ne’e ho koidadu no responsabilidade atu luta bá liberdade no direitu timoroan hotu nian, liuliu timoroan sira ne’ebé moris terus no vulneravel liu,” Virgílio “Lamukan” hateten.

Virgílio mós halo ona ajenda rasik atu hasoru órgaun soberanu sira, inklui hasoru mós partidu polítiku sira ne’ebé fó apoiu ona bá nia hodi sai hanesan Provedór bá PDHJ.

“Bá partidu polítiku sira ne’ebé asentu iha Parlamentu Nasionál ne’ebé fó apoiu bá ha’u nia kandidatura bá Provedór PDHJ,  ha’u sei bá hasoru sira ida-idak atu hato’o ha’u nia agradesimentu no ha’u mós sei hato’o bá sira katak, obrigadu barak bá apoiu sira ne’e, maibé ha’u sei la halo tuir partidu ida-idak nia hakarak. Buat ne’ebé ha’u sei halo no ha’u sei kumpre de’it mandamentu sira iha ita-nia Konstituisaun RDTL,” Virgílio “Lamukan” hateten.

Bá membru sira hotu Conselho de Imprensa Timor-Leste no mós funsionáriu sira hotu Conselho de Imprensa nian, Virgílio “Lamukan” la hato’o obrigadu no la halo despedida tanba knaar PDHJ sei interligadu ho knaar Conselho de Imprensa nian iha luta bá liberdade imprensa no liberdade espresaun.

“PDHJ luta bá direitu umanu  no justisa no bá direitu sira-ne’e engloba mós ita-nia luta bá hametin liberdade espresaun no liberdade imprensa. Atu dehan de’it katak PDHJ ho Conselho de Imprensa nia uma-kain mak ketak-ketak, maibé interese ida de’it; serbí bá povu no serbí bá Estadu hodi hametin liután knar ne’ebé horik iha Lei no Konstituisaun bá instituisaun rua-ne’e,”  nia afirma tan.

Substituisaun

Tuir estatutu Conselho de Imprensa prevee katak, bainhira Prezidente CI rezigna- an, automatikamente sei substitui hosi konsilleiru ida ne’ebé ho idade tuan liu, no oras-ne’e daudaun Konsilleiru Expedito Loro Dias Ximenes mak idade tuan liu entre Konsilleiru nain tolu seluk, hodi provizoriamente lidera CI.

Iha periúdu ida-ne’e, Prezidente interinu sei komunika hikas ho Asosiasaun Jornalista Timor Leste (AJTL) atu bele realiza kongressu ida hodi  hili hikas sira ninia reprezentante ida hodi substitui Virgílio Guterres.

Nune’e, bainhira iha ona reprezentante hosi AJTL maka, Prezidente Interinu CI sei konvoka fali plenaria hodi hili Prezidente CI foun.

Tuir ajenda hosi Parlamentu Nasionál katak Provedór PDHJ foun períodu 2022-2026 ne’e sei simu tomada de posse hosi Parlamentu Nasionál iha loron 05 fulan-Janeiru 2023. Nune’e, tuir Lei hateten, molok loron 15 atu tomada de posse, Provedór PDHJ tenke livre ona ka rezigna an totalmente ona hosi organizasaun sira ne’ebé nia serbí bá inklui Conselho de Imprensa de Timor-Leste.

Jornalista: Vito Salvadór