Hatutan.com, (19 Dezembru 2022), Díli—Virgílio da Silva Guterres “Lamukan” submete ona karta pedidu rezignasaun hosi kargu Prezidente no Membru Conselho de Imprensa (CI).

Plenária Ordinária Conselho de Imprensa, Segunda (19/12/2022). Foto/Hatutan.com.

Pedidu rezignasaun ne’e submete bá iha plenária ordinária Conselho de Imprensa, Segunda (19/12/2022).

Lee Mós: Virgílio da Silva Guterres “Lamukan” Eleitu Nu’udár Provedór bá PDHJ

Konteúdu hosi karta ne’e, Virgílio husu atu rezigna an tanba iha loron 12 fulan Dezembru 2022, Parlamentu Nasionál (PN) eleze ona nia nu’udár Provedór Direitus Humanus no Justisa (PDHJ) ba periúdu 2023 to’o 2027.

Ba knaar iha PDHJ, tempu tomak no rekere tenke husik kargu sira ne’ebé inkompatível ho pozisaun provedór dos Direitus Humanus no Justisa nian tuir karta notifikasaun ne’ebé Prezidente Parlamentu Nasionál iha loron 13 Dezembru 2022 ne’ebé subliña katak, rezignasaun hosi kargu inkompatível ne’e tenke halo loron 15 molok tomada de pose ba Provedór PDHJ iha loron 05 Janeiru 2023.

“Alende rezigna an hosi kargu nu’udár Prezidente CI, ha’u mós rezigna an hanesan membru CI, hein katak CI sei komunika ho organizasaun profisionál ne’ebé nomeia ha’u maka AJTL atu bele nomeia foun fali ninia reprezentasaun mai CI tuir prosedimentu legál ne’ebé iha,” Hatutan.com sita karta rezignasaun Virgílio Guterres.

Virgío mós agradese ba konfiansa ne’ebé konsilleiru sira depozita durante iha CI desde peridu dahuluk iha tinan 2016 to’o 2020 no mandatu 2021 nian.

Conselho de Imprensa liuhosi plenaria ne’e deside atu Tersa (20/12/2022), aprova pedidu Rezignasaun Virgílio Guterres nian hosi kargu Prezidente no Membru CI.

Plenária Ordinária ohin ne’e prezide hosi membru Conselho Imprensa, Expedito Loro Dias Ximenes no partisipa hosi membru CI Francisco Belo Simões da Costa, Otelio Ote, Benevides Correia Barros no Diretór ezekutivu Rigoberto Monteiro.

Tanba ne’e hahú Tersa (20/12/2022), Virgólio la’ós ona Prezidente no membru CI, nunee CI sei komunika fali ho AJTL atu halo konferénsia hodi hili fali nia membru ida ka jornalista atu bele troka Virgilio Guterres hanesan membru CI periúdu 2022-2026.

Karta Rezignasaun ne’e mós Virgílio hato’o koñesimentu ba Prezidente Parlamentu Nasionál no Prezidente AJTL.

Lee Mós: Virgílio Guterres “Lamukan” Sei Rezigna-An  Hosi Conselho de Imprensa

Jornalista: Elio dos Santos da Costa