Hatutan.com, (20 Dezembru 2022), Díli- Ministru Edukasaun Juventude no Desportu (MEJD), Armindo Maia, Tersa (20/12/2022), atribui prémiu bá atleta sira ne’ebé hamorin ona Timor-Leste nia naran iha eventu jogu Sea Para Games Indonézia no ASEAN University Games Tailándia  2022.

Ministru Edukasaun, Juventude no Desportu, Armindo Maia entrega premiu bá ne’ebé hamorin ona Timor-Leste nia naran iha eventu jogu Sea Para Games Indonézia no ASEAN University Games Tailándia 2022. Foto/Elio dos Santos da Costa

Atribuisaun prémiu ne’e atu hatudu kompromisu Governu nian liuhosi MEJD no Sekretáriu Estadu Juventude no Desportu  (SEJD) hodi fó prémiu bá atleta sira ne’ebé ho espíritu nasionalizmu no patriotizmu luta no hamorin Timor-Leste nia naran iha mundu internasionál liuhosi modalidade desportiva.

Atleta no Treinadór sira ne’ebé partisipa iha Jogu Sea Para Games Indonézia iha modalidade Modalidade Atletizmu mak hanesan, atleta Teófilo Freitas ne’ebé oferese medalla osan mean hetan prémiu ho montante orsamentu $10,500.00, atleta Domingos no Domingas ne’ebé oferese osan mutin no metan ho total prémiu osan ho montante $2,500.00 no treinadora Atletizmu Odete Belo $2.500,00.

Iha Modalidade Hiit-Besi, atleta José António Aniceto Serrano iha klase 65 kg, oferese medalla osan mutin hetan prémiu ho montante osan hamutuk $3.000,00 no Treinadór João Henrique de Deus hetan prémiu osan ho montante $1,500.00.

Modalidade Ténis Meza atleta Abelita Fernandes Borges hetan prémiu osan ho montante $2,500.00, Pascoela dos Santos Pereira ho totál prémiu osan ho montante $4,000.00 no Bernardo de Carvalho hetan prémiu osan hamutuk $750.00 no Treinadór Rogério Tadeu Cabral Soares hetan prémiu osan hamutuk $2,500.00.

Iha ASEAN University Games iha Modalidade Atletismu, atleta Felisberto de Deus hetan prémiu osan hamutuk $1,750.00. Iha Modalidade voli Praia mane, atleta Joel Savio Valente no Tito Morais Gusmão hetan osan ho montante $468.75 no iha Modalidade Taekwondo, atleta Ana da Costa Belo hetan prémiu osan hamutuk $750.00.

Ministru Edukasaun Juventude no Desportu, Armindo Maia iha nia diskursu hateten, atribui prémiu ba atleta sira husi modalidade oin-oin, ne’ebé sai manan nain ba iha eventu jogu rejionál rua importante ne’ebé Timor-Leste partisipa iha tinan 2022 hanesan Jogus SEA para Games Indonézia no ASEAN University Games Tailándia.

Nia afirma tuir lei no regulamentu ne’ebé iha, estadu no governu iha devér atu atribui prémiu ho forma finanseiru bá atleta sira ne’ebé ho dedikasaun no esforsu kontribui medalla ba Timor-Leste iha jogus rejionál ka internasionál ne’ebé atleta sira partisipa.

“Lori VIII governu konstitusionál nia naran, ha’u hakarak hato’o parabéns ba atleta manan na’in sira iha jogu Sea Para Games Indonézia no ASEAN University Games tinan 2022. Parabéns mós ba treinadór no jestór sira iha kada modalidade bá dedikasaun no esforsu ne’ebé halo bá nasaun doben Timor-Leste. Imi merese simu prémiu husi governu hanesan rekoñesimentu bá kontribuisaun ne’ebé fó.” Ministru  Armindo Maia hateten.

Husu mós ba atleta sira atu utiliza prémiu ne’ebé iha hodi kompleta nesesidade pesoál atu bele hadi’a no prepara an di’ak liután bá eventu sira ne’ebé sei mai.

Atleta atletizmu Felisberto de Deus, hato’o agradese bá Governu ne’ebé fó ona prémiu bá atleta hotu iha eventu Sea Para Games Indonézia no ASEAN University Games Tailándia.

“Hanesan Atleta ha’u sente orgullu tebes ho prémiu ne’ebé iha, no sei utiliza atu kompleta ha’u nia nesesidade loroloron no uza mos atu apoiu ha’u nia estudu,” Felisberto de Deus hateten.

Atleta Taekwondo, Ana da Costa Belo, kontente ho prémiu ne’ebé iha tamba ne’e hanesan motivasaun ida atu prepara an di’ak liután hodi bele ba kompete iha eventu rejionál no internasionál ne’ebé sei mai

“Prémiu ne’ebé ha’u simu ne’e sei utiliza atu hola ekipamentu ba treinu, liuliu ekipamentu sira ne’ebé ha’u seidauk iha, atu nune’e, bainhira bá treinu ha’u nia sasán kompletu,” Ana da Costa Belo hatete.

Jornalista: Vito Salvadór