Hatutan.com, (16 Dezembru 2022), Díli—Atleta Taekwondo hosi Dojan KONI Timor-Leste (TL) sai hanesan mellór ekipa iha eventu Kajati Taekwondo Open Tournament, Kupang Indonézia hafoin oferese medalla 53 ba Timor-Leste iha modalidade ne’e.

Atleta Taekwondo hosi Dojan KONI Timor-Leste (TL) sai hanesan mellór ekipa iha eventu Kajati Taekwondo Open Tournament, Kupang Indonézia hafoin oferese medalla 53 ba Timor-Leste iha modalidade ne’e. Ekipa ne’e hasoru Prezidente Repúblika José Ramos-Horta iha Palásiu Prezidensiál Nicolau Lobato Bairru-Pité, Sesta (16/12/2022).

Prezidente Repúblika (PR), José Ramos-Horta kontente loos ho labarik sira hosi Dojan KONI Timor-Leste ba pasiar to’o Kupang, partisipa kompetisaun iha Indonézia, ho totál 58 di’ak tebe-tebes, parabens ba sira, ne’e insentivu ba sira, kontinua dedika an ba modalidade desportu ida-ne’e.

Lee Mós: Korea Apoia Fasilidade Treinu Taekwondo Bá F-FDTL

Ho prestasaun ne’ebé atleta sira hosi dojan KONI Timor-Leste oferese iha modalidade Taekwondo, iha 21 dezembru Prezidénsia Repúblika sei konvida sira mai Palásiu Prezidensiál partisipa festa Natál ne’ebé Prezidénsia oferese ba ema lubuk ida sei mai.

“Prestasaun taekwondo ne’ebé sa’e maka’as ne’e di’ak, modalidade ida jogu Olímpiku. Tanba ne’e di’ak liu haree jogu sira ne’ebé rekoñesidu internasionalmente atu ita ajuda sira,” Prezidente Repúblika José Ramos-Horta hateten hafoin simu atleta Taekwondo hosi dojan KONI Timor-Leste, iha Palásiu Prezidensiál Nicolau Lobato Bairru-Pité, Sesta (16/12/2022).

Prezidensia Repúblika mós promete katak sei haree posibilidade balun hodi ajuda atleta sira, maibé ne’e kompeténsia ministériu, governu, Sekretáriu Estadu Juventude no Desportu (SEJD), maibé Prezidénsia Repúblika mós sei buka meius atu apoia liu-liu labarik oan sira.

“Joven ida animadu bainhira buat ruma hanesan Desportu manán buat ruma, nia sei iha kbiit liu tán atu estuda,” subliña.

Horta promete sei haree prémiu ruma ba atleta sira, sei ko’alia ho funsionáriu Kaza Sivíl atu haree saida mak bele oferese ba labarik sira ne’e no sira nia asosiasaun.

Iha fatin hanesan Jestór Dojan KONI Timor-Leste, Óscar Lúcio hateten, sira hetan apoiu máximu hosi Prezidente Repúblika hodi ba tuir Kajati Taekwondo Open Tournament iha Kupan, Indonézia no Dojan KONI  Timor-Leste rasik hatun atleta 58, hetan medalla 53 no atleta na’in-lima seluk mak la hetan medalla.

“Atleta hosi dojan KONI Timor-Leste hetan mellór atleta iha eventu Kajati Taekwondo Open Tournament ba feto mane no totál medalla ne’ebé atleta sira hetan iha osan me’an 31, osan mutin 12 no osan metan10. Ho rezultadu ne’e halo dojan KONI Timor-Leste sai hanesan mellór ekipa iha eventu Kajati Taekwondo Open Tournament tinan 2022,” Óscar Lúcio hateten.

Vizaun ba oin maka dojan KONI Timor-Leste hanesan Dojan ida boot liu iha Díli sei nafatin dixiplina, treinu, hodi dezenvolve nafatin atleta sira atu bele iha korajen hadi’a an hodi badinas treinu atu bele hetan prestasaun di’ak liután iha futuru.

Partisipasaun dojan KONI Timor-Leste iha eventu Kajati Taekwondo Open Tournament hetan apoiu másimu husi Prezidente Repúblika, inan aman no entidades tomak.

Totál prémiu ne’ebé dojan KONI Timor-Leste hetan mak hanesan trofeu mellór ekipa, no medalla inklui osan ho montante Rp 10.000.000.

Jornalista: Vito Salvadór