Hatutan.com, (20 Dezembru 2022), Díli—Oknum Policia Ciêntifíca e de Investigação Criminal (PCIC) ho inisial Z, deskonfia ho kondisaun “tua-lanu” no halo agresaun fízika to’o hakanek feto estranjeira ida, iha Otél Hongkong, Hudi-laran, Suku Bairru-Pité, Postu Administrativu Dom Aleixo, Munisípiu Díli.

Xefe Departamentu VPU Nasionál, Inspetór Polisia, Ricardo da Costa. Foto/UNDP.

Insidente ne’e akontese iha Segunda, (19/12/2022) tuku 04:00 dadeersan madrugada Otl, bainhira vítima ho suspeitu sira hemu hamutuk hela alkól iha fatin karaoke ka kanta nian iha Otél Hongkong.

Lee Mós: PNTL Detein JPP Ne’ebé Deskonfia Sona-mate Aires Celestino Adelaide

Xefe departamentu VPU Nasionál, Inspetór Polisia, Ricardo da Costa informa, vitima ho inisiál N hato’o ona keixa bá sira iha Kuartél Komandu Jerál PNTL no rejísta ona mós kazu ne’e hodi kontinua prosesu bá oin.

Advertisement

“Daudaun ne’e nia hamutuk hela ho ami, rona hela nia informasaun katak, iha membru PCIC balun mak halo agresaun fízika hasoru ita nia sidadaun Indonézia ida. Maibé ida ne’e ita sei halo ninia prosesu no prosesu ne’e sei bá rejista iha Ministériu Públiku,” Xefe Departamentu VPU Nasionál, Inspetór Polisia, Ricardo da Costa hateten iha Kuartél Jerál PNTL Caicoli, Tersa (20/12/2022). 

Motivu hosi kazu ne’e, tanba vítima ho suspeitu sira hamutuk hela iha fatin karaoke nian, sidadaun ne’e mós la hatene, tanba hothotu hemu tua lanu, la hatene saida mak vitima ko’alia bá suspeitu ho nia maluk sira, derrepente akontese.

“Baku ne’e, nia la uza armas. Suspeitu ne’e, nia inisial Z no vitima ne’e ho naran inisiál N,” Inspetór Polisia, Ricardo da Costa haktuir.

Baibain kazu sira hanesan violénsia doméstika ne’e, bainhira PNTL liuhosi unidade VPU simu no rejista keixa tiha hosi vítima sira, medida polisiál ne’ebé halo maka hola kedan atuasaun, ezemplu haree bá vitima ne’e nia kondisaun fizika.

Bainhira haree katak, vitima sei iha kondisaun fízika ne’ebé moras ka kanek, polisia sei refere lai bá iha PRADET, atu sira bele fó tratamentu médika. Bainhira di’ak ona, vitima bele fó ona informasaun bá iha polisia, hodi foti ninia informasaun.

Advertisement

Vitima ne’e hetan kanek iha matan, ibun, hasan no kotuk-laran, nia sente moras tebes, nia mós mai fó informasaun, maibé nia forsa laiha atu ko’alia.

“Entaun, ha’u dehan, ita bele deskansa tiha lai sente bá iha forsa oitoan, foin bele ko’alia,” komandante Ricardo esplika.

PNTL sei haruka karta notifikasaun bá suspeitu hodi nune’e bele rekolla ninia informasaun.

Hafoin rekolla informasaun sira hotu hosi vítima ho suspeitu, PNTL sei enkamiña prosesu kazu ne’e bá rejísta iha Ministériu Públiku (MP), hodi prosesa kazu ne’e iha Tribunál.

Jornalista: Rogério Pereira Cárceres

Advertisement