Hatutan.com, (22 Dezembru 2022), Díli—Ministru Defeza  (MD), Filomeno da Paixão de Jesus husu ba Komandu FALINTIL Forsa Defeza Timor-Leste (F-FDTL) ho Polísia Nasionál Timor Leste (PNTL) atu fó atensaun ba membru sira ne’ebé ho saláriu liu $500 labele simu subsídiu $200.

Ministru Defeza (MD), Filomeno da Paixão de Jesus. Foto/Hatutan.com.

Ministru hateten, Dekretu-Lei númeru 37/2022 esplika klaru, katak sidadaun ne’ebé ho saláriu kada fulan liu $500 labele simu.

Lee Mós: CAC Seidauk Hetan Infrasaun iha Pagamentu Subsídiu $200

“Ha’u husu ba Komandu PNTL ho F-FDTL atu implimenta ida-ne’e, tuir polítika governu nian. Funsionáriu no ema sira ne’ebé saláriu liu $500 labele simu subsídiu fim do ano,”  Ministru Paixão hateten hafoin partisipa serimónia aprezentasaun relatóriu atividade Defeza nian, iha Kuartél Jenerál Fatuhada Díli, Kinta (22/12/2022).

Iha fatin hanesan, Xefe Estadu Maiór Jenerál  FALINTIL Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” apela bá membru ne’ebé ho saláriu liu $500 labele simu subsídiu $200 tanba Dekretu Governu permite de’it sira ne’ebé saláriu menus hosi ne’e.

“Sé identifika membru sira ne’ebé mak ho saláriu liu $500 simu, ne’e la’ós ha’u mak foti desizaun maibé regulamentu sansaun administrasaun iha hodi regula sira. La’ós komadante mak foti desizaun,” Falur Rate Laek hateten.

Falur Rate Laek dehan, membru F-FDTL sira ne’ebé nia saláriu mensál ki’ik ka menus hosi $500 mak iha direitu simu subsídiu ne’e tanba Dekretu-Lei númeru 37/2022 mak haruka.

“Ha’u obedese bá lei, tanba desizaun Governu nian la bandu F-FDTL la bele simu subsídiu fim do ano. Maibé bandu ema ne’ebé nia saláriu liu $500,” Falur Rate Laek alerta.

Jornalista: Rogério Pereira Cárceres