Hatutan.com, (25 Dezembru 2022), Díli- Selebra loron Natal, 25 fulan-Dezembru ne’e, Prezidente Repúblika (PR), José Ramos-Horta,  halo vizita bá vítima sira inséndiu iha Merkadu Taibessi, Díli, ne’ebé daudaun ne’e hamahan iha Antigu Kuartél Jerál, Taibessi.   

Lee Mós : Ahi Han Uma 53 Iha Merkadu Taibesi, Vítima 356 Okupa Eis Kuartél Militár Portugés

Vítima sira inséndiu iha Merkadu Taibessi, Díli, daudaun ne’e hamahan iha Antigu Kuartél Jerál, Taibessi. Foto/GPR

Prezidente Repúblika Ramos-Horta haree besik liu kondisaun família uma-kain 54 ne’ebé sofre direta inséndiu ne’ebé akontese iha Kinta kalan (22/12/2022).  Nune’e, Ramos-Horta husu atu Polísia Nasionál Timor-Leste (PNTL) halo investigasaun ida kle’an hodi deskobre motivu hosi inséndiu ne’e.

“Ohin ha’u mai haree hanesan informal de’it, konfiansa autoridade governu, Bombeiru, PNTL sira halo daudaun ona investigasaun, tenke hatene loloos, tanba sá mak ne’e akontese? tanba provoka vítima, maibé ha’u kontente, haree apoiu lalais kedas husi Prezidénsia, Prezidente Autoridade Munisípiu, Sekretáriu Estadu Protesaun Sivíl,” Prezidente Repúblika José Ramos-Horta hateten  liuhosi komunikadu ne’ebé Hatuta.com asesu.

 Xefe Estadu husu mós bá Governu atu reabilita Merkadu Taibessi ho apoiu husi doadór balun, hodi bele  konstrui merkadu moderna, iha seguransa no ijiene.

“Ha’u hanoin ba oin governu tenke haree didi’ak, halo merkadu ida-boot liután karik, ho kondisaun di’ak liután,” Ramos-Horta fó hanoin.

Sekretáriu Estadu Protesaun Sivíl, Joaquim Gusmão, koordena  ona ho Autoridade Munisípiu Díli hodi identifika vítima sira, nune’e bele distribui apoiu emerjénsia.

PR Ramos-Horta vizita vítima sira inséndiu iha Merkadu Taibessi, Díli, ne’ebé daudaun ne’e hamahan iha Antigu Kuartél Jerál, Taibessi, Domingu (25/12/2022). Foto/GPR

“Ita identifika família vendedór sira hamutuk hotu família 54, ho totál komunidade sira 400 no besik 500 mak iha ne’e. Protesaun Sivíl nia papél kuandu akontese dezastre tenke hetan kedas apoiu emerjénsia. Apoiu emerjénsia ne’e, mak ai-han no la’ós ai-han tasak. Iha kazu ida-ne’e, ai-han tasak sei prepara hosi Autoridade Munisípiu Díli mak prepara ba ita-nia komunidade sira,” Joaquim Gusmão hateten.

Governante ne’e deklara katak, sei la distribui materiál konstrusaun ba vítima sira, tanba merkadu Taibessi hanesan espasu públiku.

“Agora ita haree to’ok haló nusa mak bele ba oin, tanba merkadu ne’e espasu públiku la’ós rezidénsia, tanba ne’e hanesan mós kazu iha Merkadu Comoro, Merkadu Manleuana, Merkadu Maubisse nian, ita labele fó apoiu material konstrusaun, tanba ida-ne’e ita entrega fila-fali bá jestaun merkadu mak sei haree,” Sekretáriu Estadu Protesaun Sivíl Joaquim Gusmão hateten.

Governu fó ona oras 72 bá vítima sira, atu buka hela fatin, tanba vítima balun iha rezidénsia iha Díli no apela mós bá vendedór sira katak, merkadu hanesan edifísiu públiku no labele hela permanente iha estabelesimentu laran.

Vizita Xefe Estadu bá merkadu Taibesi akompaña husi Prezidente Autoridade Munisípiu Díli, Autoridade Protesaun Sivíl no Segundu Komandante PNTL Munisípiu Díli.

Jornalista: Vito Salvadór