Hatutan.com, (28 Dezembru 2022) Díli—Deskonfia membru Polísia Nasionál Timor Leste (PNTL) na’in-tolu iha Munisípiu Bobonaro, halo agresaun fízika hasoru labarik kiik ida ho naran Cristiano Emanuel  idade 14 to’o baixa iha Ospitál Referál Maliana, tanba kondisaun kanek grave.

Deskonfia membru Polísia Nasionál Timor Leste (PNTL) na’in-tolu iha Munisípiu Bobonaro, halo agresaun fízika hasoru labarik Cristiano Emanuel idade (14) to’o baixa iha Ospitál Referál Maliana, tanba kondisaun kanek grave, Tersa (27/12/2022). Foto/Espesiál.

Novelino dos Santos hanesan joven Bobonaro, informa kronolójia katak iha Tersa (27/12/2022), hale’u tuku 19:00 kalan otl, membru PNTL na’in-tolu ho fardadu utiliza karreta Polísia nian bá halo agresaun fízika bá nia alin viziñu Cristiano Emanuel ne’ebé ho idade minoridade iha Bairru Pemancar Maliana.

Lee Mós: Durante Natál, PNTL Rejistu Asidente 10 no Prende Karreta ho Motór 15

Hafoin insidente ne’e, Novelino dos Santos rasik iha dadeersan oras madruga, simu informasaun hosi vítima nia aman katak, vítima Sunu fugetes (Kembang Api), nune’e Membru PNTL Munisipiu Bobonaro na’in-tolu duni no kaer baku to’o isin lolon metan, ran nakfakar no nehan monu hotu to’o dezmaia durante oras balun nia laran.

Membru PNTL na’in-tolu ne’ebé lakohi temi identidade ne’e, tula hikas vítima iha karreta patrulla Polisia nian hosi Bairru Pemancar Maliana lori bá Ospitál Referál, atu halo tratamentu saúde.

“Bainhira to’o ona iha Ospitál, hetok aat liu tán, membrus PNTL na’in-tolu tenta manipula informasaun hodi informa ba médiku no família sira katak alin ne’e halai mak monu. Maibé depois dé alin ne’e rekoopera oitoan nia haktuir katak, realidade la’ós hanesan saida mak membru PNTL nain-tolu hato’o, maibé sira baku, sama, tuku no tebe até nehan monu hotu hosi ibun laran,” Hatutan.com sita deklarasaun Novelino dos Santos iha nia pájina facebook, Kuarta (28/12/2022).

Novelino dos Santos husu bá Komandante PNTL Komandu Munisípiu Bobonaro, Superintendente Polísia, Antoninho Mauluta atu halo identifikasaun bá nia membru sira ne’ebé hala’o servisu pikete, iha loron 27 Dezembru hodi responsabiliza sira nia aktu krime gráve ne’ebé sira prátika hasoru labarik menoridade.

“Bá membru PNTL na’in-tolu ne’ebé halo agresaun fíziku bá labarik menoridade, tau bá iha imi na’in-tolu nia kakutak, labele hanoin katak sira hela iha área izoladu nune’é laiha kapasidade atu asesu ba dalan justisa formal. Ne’e imi sala ona, no imi xoke ona morru hodi lori mehi aat ba imi na’in-tolu nia karreira servisu,” Novelino dos Santos lamenta.

Família hosi vítima fiar katak, médiku sira ne’ebé hala’o hela tratamentu bá vítima sei kaer metin bá prinsípiu kódigu étika médika nian no la konvensida hosi konspirasaun membru PNTL na’in-tolu, hodi fó-sai rezultadu atestadu médiku (fisum) ne’ebé ho lolos, nune’e sai hanesan baze ka dokumentu suportada, hodi bele komprova no ajuda anexa ho fotografia no deklarasaun hosi vítima, hodi enkamiña bá instituisaun relevante atu loke prosesu kontinuasaun nian.

“Bá Komandante PNTL Bobonaro Mauluta, hosi hakerek ida ne’e ha’u fanun ita bo’ot, tanba dalaruma ita bo’ot dukur liu ona. Nune’e deskontroladu ba ita bo’ot nia membru sira ne’ebé hala’o servisu iha terrenu la tuir ona Lei Orgánika PNTL nian,” Novelino dos Santos, hateten.

Presiza Investigasaun

Komandante PNTL munisípiu Bobonaruo, Superintendente Polísia Antoninho Mauluta. Foto/Hatutan.com.

Hatán bá lamentasaun ho krítika sira ne’e, Komandante PNTL Munisípiu Bobonaro, Superintendente Polísia, Antoninho Mauluta hateten, nia parte seidauk bele pronunsia katak nia membru sira mak halo duni agresaun fízika, tanba buat hotu-hotu tenke liuhosi prosesu investigasaun mak bele deskobre.

“Kona-bá ida-ne’e, ha’u labele hateten katak, ha’u nia membru sira halo agresaun fízika ka la’e. Maibé, depois ita haree prosesu, iha prosesu mak bele hatudu,” Antoninho Mauluta hateten iha Komandu Jerál Caicoli, ohin.

Komandante Mauluta informa, iha 27 Dezembru kalan, nia rasik hanesan komandante munisípiu simu informasaun hosi Padre Pároku Parókia Santa Kruza Maliana katak, kalan-kalan, joven sira sempre bá sunu fugetes halo tarutu, lian maka’as besik kedan rezidénsia Padre sira nian.

Bá situasaun ruídu ne’e, Padre Párokia kontaktu direta bá komandante Mauluta no orienta kedan membru sira ho karreta patrullamentu, tun bá lokál insidente atu oinsá mak bele halo atuasaun no prevensaun.

“Tanba sira toba, ida-ne’e mak Amu Pároku telefone mai, depois ita halo patrulla. Bainhira ita nia membru sira to’o iha fatin, ita nia alin na’in hira ne’e haree, tanba sira fahe ekipa, balun sa’e hosi kotuk, balun hosi oin. Depois sira haree ida halai sa’e, ida halai tesik, maka tuir relatóriu informasaun ne’ebé ha’u simu daudaun liuhosi WhatsApp dehan katak, alin ne’e nia halai, nia mak monu rasik, mak baku aan bá fatuk. Ne’e laiha polísia ida halo agresaun fíziku,” komandante Mauluta, hateten.

Komandu PNTL Munisipiu Bobonaro oras-ne’e identifika ona mós sidadaun ida ne’ebé lansa informasaun iha rede média sosial facebook, sei notifika sidadaun ne’e atu hato’o deklarasaun iha polísia, tanba hateten aat komandante Polísia munisipiu Bobonaro toba dukur.

“Ida-ne’e mak ita atu buka-tuir, atu bolu nia, mai deklara nia aan. Nia hatene katak ha’u nu’udár komandante ne’e toba dukur ne’e iha ne’ebé. Nia hatene iha ne’ebé mak ha’u toba dukur. Tanba nia mós nu’udár Bobonaro oan ida, nia joven ida. Ida-ne’e mak ita hatene ona, identifika ona. Depois alin oan ida ne’ebé monu ne’e oras-ne’e daudaun iha hela Ospitál, ida fali ohin ne’e nia hato’o hela nia deklarasaun iha parte investigasaun komandu Bobonaro. Ida-ne’e mak, buat ne’ebé oras-ne’e daudaun akontese iha Maliana,” Mauluta hateten.

Kona-bá informasaun sira seluk sei hein prosesu no prosesu ne’e Polísia loke bá ema hotu-hotu. Maibé, Mauluta dehan sidadaun sé de’it mak sente deskontente bele bá halo keixa, tanba ema hotu-hotu iha lei nia okos.

Atuasaun sira ne’ebé PNTL Munisipiu Bobonaro halo, ezekuta tuir ordén hosi komandu katak, presiza halo aperta oitoan, liu-liu ho situasaun Natál no tinan foun hodi estabiliza seguransa, nomós bazeia bá orientasaun katak, labele uza fugete.

“Depois buat ida sira uza ne’e, la’os fugetes, la’e. Sira halo rasik iha kalen boboot sira ne’e mak sira tiru, automátikamente tiru kedan iha Amu sira nia hela fatin, ne’e labele. Ida-ne’e mak ita halo prevensaun bá akontesimentu ida,” Mauluta hateten.

Oras-ne’e vítima nia família sira aprezenta ona mós keixa bá Komandu PNTL Bobonaro, tanba sente deskontente ho aktu ne’ebé halo hosi membru PNTL sira hasoru sira ninia oan to’o kanek grave.

“Sira dehan katak iha ne’ebá, sira nia oan ema baku hosi kotuk. Maibé, realidade mós ohin, ita haruka ona ekipa departamentu justisa nian bá akompaña vítima iha Ospitál halo konsulta. Iha nia kotuk ne’e dehan kanek, maibé tuir ita haree ho matan, katak laiha. Maibé, depois ita haree took keta hosi doutór sira iha atestadu médiku ruma karik, iha ne’ebá mak hatudu dehan katak baku duni ka la baku, kanek ruma ka la kanek, ita hein prosesu,” nia hateten.

Komandu PNTL husu bá sidadaun hotu atu selebra loron boot Natál ho tinan foun labele sunu tán fugete, tanba bele hamosu distúrbiu iha públiku. Husu atu komunidade no sarani sira kontribui bá estabilidade.

Jornalista: Rogério Pereira Cárceres