Hatutan.com, (28 Dezembru 2022), Díli- Prezidente Repúblika (PR), José Ramos-Horta, organiza simpóziu nasionál iha ámbitu komemorasaun loron eroi nasionál hodi fó omenajen bá eroi nasionál hotu, liuliu  Saudozu Nicolau Lobato no eroi nasionál sira ne’ebé konsideradu hanesan mós pioneiru ba luta libertasaun  Timor-Leste nian.

Lee Mós : Loron 07 Dezembru, Istória Moruk Povu Timor-Leste

ai-han sira ne’ebé FALINTIL sira konsumu hodi rejiste iha ai-laran durante tinan 24 nia laran. Foto/Elio dos Santos da Costa

Prezidente Repúblika, José Ramos-Horta hateten, kada tinan Timor-Leste selebra loron nasionál eroi nian,  no iha loron 31 fulan-Dezembru hanesan loron falesimentu Saudozu Nicolau Lobato nian iha kombate.

Simpóziu nasionál ida-ne’e hanesan mós reinkarnada frente polítika, frente klandestina nia atividade iha kontestu omenajen bá Nicolau Lobato no eroi sira hotu-hotu.

Advertisement

“Simpóziu ida-ne’e hanesan omenajen bá Nicolau Lobato, labele haluhan Leorema oan ida-ne’e, Soibada oan ida ne’e no Timoroan ida-ne’e, tamba família Lobato ne’e imi hotu koñese família mohu bá Timor-Leste nia luta bá ukun rasik an,” Prezidente Repúblika José Ramos-Horta hateten iha nia diskursu ba simpóziu nasionál ne’ebé hala’o iha Palásiu Prezidensiál, Kuarta (28/12/2022).

Xefe Estadu mós aproveita oportunidade ne’e hodi haktuir mós prosesu sira ne’e Timor-Leste enfrenta hahú husi koloniál Portugés nia tempu mai too iha loron 28 fulan-Novembru 1975 ne’ebé sai loron proklamasaun unilateral.

Hafoin proklamasaun unilateral, hahú ho pose bá primeiru Governu ne’ebé lista Governu nian la tuir orden ierarkia ruma no tuir de’it orden alfabétika ne’ebé nia kolokasaun tuir de’it situasaun ne’ebé momentu ne’ebá hasoru iha ne’ebé obriga desizaun tenke halo lalais tamba negosiasaun ho Portugal laiha solusaun tamba laiha serteza atu iha proklamasaun iha ne’ebé situasaun iha Batugade, Balibo no Maliana hahú monu no Atabae rasik monu iha final de Novembru 1975.

Deklarasaun proklamasaun unilateral ne’e hatudu, apezarde Nicolau Lobato relativamente joven iha ona hakarak atu Timor-Leste hetan independénsia.

“Ha’u admira ha’u nia kolega sira ne’ebé ho korajen no determinasaun deklara independénsia hodi defende Repúblika Demokrátika Timor-leste,” Ramos-Horta subliña.

Advertisement

Ai-han sira-ne’e mak FALINTIL sira konsumu hodi aguenta funu durante tinan-24 nia laran. Foto/Elio dos Santos da Costa

Luta ne’e kontinua, Orden mai husi Nicolau Lobato iha loron 01 fulan-Dezembru 1975, liu husi primeiru reuniaun Konsellu Ministru ne’ebé Nicolau Lobato rasik mak deside hodi halo desizaun atu ami na’in tolu sai husi Timor-Leste.

Rogério Lobato bá buka kilat para ajuda FALINTIL no Marí Alkatiri ba Moçambique hamutuk ho partidu Frelimo buka apoiu diplomátiku iha Áfrika, no Nicolau Lobato haruka Ramos-Horta bá Nasaun Unidas para atu advoga Timor-Leste nia kauza.

“Nicolau Lobato ema ida moris kedas ho kualidade lider, nia mak halo desizaun ami rona de’it nia, tuir de’it. Alémde Nicolau Lobato, Xanana mós nune’e, ema ida  moris kedas ho kualidade hanesan lider no hatutan lori luta Timor-Leste nia too hetan independénsia,” Ramos-Horta hateten.

Iha simpóziu nasionál ne’e partisipante sira haree ho matan oinsá veteranu sira frente armada no frente klandestina moris ho ai-han tradisionál no hetan kurativu ho ai-moruk tradisionál ne’ebé natureza oferese.

Partisipa iha simpóziu nasionál ne’e Prezidente Parlamentu Nasionál Aniceto Longuinhos Guterres, Prezidente Tribunál Rekursu Deolindo dos Santos, no korpu diplomátiku sira iha Timor-Leste , konvidadu de onra sira seluk hamutuk ho veteranu sira hotu.

Jornalista: Vito Salvadór

Advertisement