Hatutan.com, (29 Dezembru 2022), Díli—Governu liuhosi Ministeriu Turízmu Komérsiu no Indústria (MTCI), Diresaun Jerál Turizmu, gasta $15.000 hodi finansia eventu kompetisaun te’in Gastronomia ka “ai-hán lokál” entre kompetitór sira.

Ministériu Turízmu Komérsiu no Indústria (MTCI), realiza feira nasionál iha Portu Díli, Dezembru 2022. Foto/MTCI.

Kompetisaun te’in ai-hán lokál ne’e hala’o durante loron ida iha Kinta (29/12/2022), iha feira nasionál ne’ebé MTCI organiza, iha arredór Portu Díli.

Lee Mós: Feira Nasionál Promosaun Produtu Lokál Atu Promove Inovasaun

Diretór Jerál Turizmu no atuál Sekretáriu Jerál bá Feira Promosaun Produtu Lokál, Zelino Soares esplika, kompetisaun gasta $15.000 tanba uza hodi finansia ekipa juri sira, orsamentu balun distribui bá kompetitór sira no balun aloka bá prémiu hodi atribui bá manán na’in sira.

“Orsamentu ne’e ita sei haree bá ekipa juri sira, no mós valór bá primeiru-lugár, segundu-lugár to’o kuartu-lugár,” Zelino Soares hateten iha Portu Díli, Kinta (29/12/2022).

Ai-han ka produtu lokál sira ne’e Governu  prepara fundus bá sira hodi bá kompras ai-han, tuir ingridiente ka menu ne’ebé mak prepara ona hosi komisaun organizadora, hodi fó bá kompetitór sira. Sira ne’ebé primeiru-lugár, sei hetan osan hosi $500 to’o $1.000.

Objetivu hosi kompetisaun gastronomia “ai-hán lokál” ne’e, primeiru atu promove produtu lokál sira iha rai-laran, liu-liu promove Timoroan sira ne’ebé mak iha espesialidade bá área ospitalidade nian.

Iha kompetisaun ne’e partisipa hosi grupu 16 mai hosi munisipiu neen hanesan Viqueque, Baucau, Manatuto, Dili, Liquiça ho Ermera.

Jornalista: Rogério Pereira Cárceres