Hatutan.com, (01 Janeiru 2023), Díli- Prezidente Repúblika, José Ramos-Horta hasoru malu ho Asesór Prinsipál Prezidente Eleitu Brazil, ne’ebé hanesan mós eis Ministru Relasaun Esteriór no Ministru Defeza Brazil, Celso Amorin, hodi ko’alia kle’an projetu kooperasaun iha área oi-oin entre Timor-Leste ho Brazil.

Lee Mós : Papa Emeritus Bento XVI Nia Falesimentu Hanesan Lakon Boot Bá Igreja Katólika

Prezidente Repúblika, José Ramos-Horta hasoru malu ho Asesór Prinsipál Prezidente Eleitu Brazil, ne’ebé hanesan mós eis Ministru Relasaun Esteriór no Ministru Defeza Brazil, Celso Amorin. Foto/GPR

Komunikadu imprensa ne’ebé Hatuta.com asesu hosi gabinete media Palásiu Prezidensiál iha Díli, Domingu (01/01/2023), relata  kona-bá Prezidente Repúblika José Ramos-Horta  nia atividade iha Brazil, liuliu sorumutuk importante sira no diskusaun ho gabinete Prezidente Brazil Lula para haree fábrika medikamentu iha Timor-Leste.

La’ós de’it ba ita-nia nesesidade, maibé, bá esportasaun, para Timor bele sai esportadór bá medikamentu no Brazil koñesidu teb-tebes iha mundu, iha indústria farmaséutika.

Nia afirma koñese Konsilleiru Prezidente Luís Inácio Lula da Silva durante tinan 30, no enkontru ne’e, deskuti mós prioridade ne’ebé Brazil sei aposta no halo rekonsiliasaun nasionál.

“Liu-liu prioridade ne’ebé Prezidente Lula haree, hanesan rekuperasaun polítika, rekuperasaun demokrátika, rekuperasaun ekonómika no sosiál internu iha Brazil. Sei enfrenta problema barak teb-tebes ke eis Prezidente Jair Bolsonaro mak haklean problema sira-ne’e ho nia polítika sira, ne’ebé konfrontasaun ho mundu tomak, sosiedade sivil brasilhera, fahe rai ne’e iha klaran, difísil atu haree halo rekonsiliasaun, taka kanek, para nia (Inácio Lula) bele governa”  Prezidente Repúblik José Ramos-Horta  hateten hafoin hasoru malu ho Asessór Prinsipál Prezidente Eleitu Brazil nian iha Brazil, Sábadu (31/12/2022).

Prezidente Repúblika mós hasoru malu ho Diretór Ajência Brasileira Kooperasaun – ABC, Ruy Perreira, hodi deskuti kona-bá kooperasaun iha àrea edukasaun, liu-liu iha ensinu língua portugueza.

Prezidente Repúblika, José Ramos-Horta hasoru malu ho Asesór Prinsipál Prezidente Eleitu Brazil, ne’ebé hanesan mós eis Ministru Relasaun Esteriór no Ministru Defeza Brazil, Celso Amorin. Foto/GPR

Enkontru ne’e, partisipa mós husi responsavel sosiedade sivíl Brasileira, Asosiasaun Antropolojia Brazileira, Defensoria Públika iha Brazília no responsavel Departamentu Antropolojia husi Universidade Brazília.

Prezidente Repúblika mós hasoru malu ho Prezidente Parlamentu Argélia Brahim Boughali, hodi diskute kona-bá situasaun jeopolítika no seguransa iha Áfrika.

Tuir Xefe Estadu, Argélia hanesan nasaun produtór no esportadór ba mina no gás bá Europa no apoiante Timor-Leste nia luta dezde 1975 iha Asembleia Jerál ONU no mós apoiante ba Sahara Osidentál ne’ebé iha relasaun istórika ho Timor-Leste.

“Ha’u so koñese sira-nia Prezidente Bouteflika (Abdelaziz Bouteflika), nia ema matenek, koñesidu, karismátiku. Ami ko’alia liu, kona-ba kestaun seguransa rejionál, iha sira-nia rejiaun, Rejiaun Magrebe (engloba Argélia, Marroko, Tunisia, Líbia no Mauritánia) ne’e iha Norte Áfrika, problema barak teb-tebes, extremizmu, terorizmu, ne’ebé taka sira no ataka rai selu-seluk, iha Áfrika Osidentál”  informa Prezidente Repúblika.

Jornalista: Vito Salvadór