Hatutan.com, (31 Dezembru 2022), Díli— Papa Eméritu Bento XVI remata peregrinasaun iha mundu (mate) ho idade 95, iha Sábadu (31/12/2022), iha ninia rezidénsia Vatikanu.

AP Photo/Andrew Medichini

Notísia kona-bá Papa ninia mate ofisialmente anunsia hosi portavóz Vatikanu, Matteo Bruni.

“Ho triste, ha’u informa ba ita boot sira katak, Papa Eméritu, Bento XVI mate ona iha loron ohin tuku 09.34 iha Komunidade Mater Ecclesiae iha Vatikanu,” Hatutan.com sita deklarasaun Matteo hanesan publika hosi pájina ofisiál Média Vatikana nian.

Papa Bento XVI ho naran Joseph Alois Ratzinger ne’e mate ho idade 95. Antes ne’e, Papa Bento ne’ebé rejigna an hosi kargu Papál iha tinan 2013 tanba ninia saúde ladun di’ak no sofre moras makas.

Iha tinan 2020 konsege halo tratamentu iha ospitál iha Roma. Hanesan publika hosi laman Rome Report, Papa eméritu ne’e hetan tratamentu saúde tanba iha problema sériu ho ninia rins.

Iha reportajen ida hosi National Catholic Register hateten katak Papa eméritu Bento XVI ne’e iha problema mós ho ninia fuan. Bento XVI mós sofre sériu moras rins iha tinan 2020 no tenke hetan tratamentu intensivu.

Maski nune’e, Matteo hateten kondisaun saúde grave nee tanba kestaun idade mós.

Alende moras rins Papa eméritu ne’e mós sofre moras seluk hanesan struk Hemoragik iha tinan 1991 no kontinua sofre tan iha tinan 2005 hanesan publika hosi New York Post.

Joseph Ratzinger sai Kardeál iha tinan 1977 no hanesan Prefeitu ba Kongregasaun Doutrina da Fé iha tinan 1981, Dekanu ba Konsellu Kardeál desde tinan 2002.

Joseph Ratzinger  moris iha Marktl am Inn, iha área dioseze Passau (Alemaña), ida dia 16 Abril 1927.

Iha dia 25 Novembru 1981, Papa João Paulo II nomea nia hanesan prefeitu ba Kongregasaun Doutrina da Fé, nia mós hanesan Prezidente ba Komisaun Liturjia Papál no Komisaun Teolojia Internasionál.

Iha dia 19 Abril 2005, Joseph Ratzinger eleitu hanesan Papa hosi Komisaun Kardeál, ikusmai mosu iha  di balkon Basilika São Pedro, iha Vatikanu, iha ne’ebé hetan alreditasaun hosi ema rihun ba rihun ne’ebé halibur malu iha prasa São Pedro.

Joseph Ratzinger assume knaar iha loron 24 Abril liu hosi serimonia iha Basilika São Pedro. Hili naran  “Bento”, mai hosi Lia Latin “Benedictus” signifika onra ba Papa Bento XV hosi Itália ikus liu (1914-1922).

Iha 28 Fevereiru 2013, Papa Bento XVI rejigna aan sai hanesan Papa eméritu, nu’udár ninia títulu ofisiál.

Tuir ajenda, serimónia funerál  bá Papa Bento XVI ninia isin-mate sei hala’o iha Igreja São Pedro iha Basilica iha Segunda, 02 Janeiru 2023.

Jornalista: Elio dos Santos da Costa