Hatutan.com, (07 Janeiru 2023), Díli-Emanuel Moniz Martins da Costa, ne’ebé  ajuda  transporta matebian Isaac Hornai bá Sentru Saúde Comoro, Sábadu ne’e, hato’o ona  keixa bá Policia Ciêntífica e de Investigação Criminal (PCIC) hodi bele buka tuir autór ne’ebé espalla nia fotográfia iha média sosiál Facebook katak, nia mak autór prinisipál bá kazu omesídiu iha área Delta-Elemloi.

Lee Mós : Gravasaun CCTV Hatudu Ema Na’in-rua Mak Oho Isac Hornai iha Delta-Elemloi

Emanuel Moniz Martins da Costa, ne’ebé ajuda transporta matebian Isaac Hornai bá Sentru Saúde Comoro, hato’o ona keixa bá PCIC, Sábadu (07/01/2023). Foto/Elio dos Santos da Costa

Iha Sesta dadeer (06/01/2023),  hale’utuku 02:00 Otl, mosu kazu omesídiu ida iha área Delta-Elemloi, Díli, ne’ebé rezulta vitima Isaac Hornai Baptista “Esa” mate tanba hetan sona ho kro’at atu hanesan tudik.

“Ha’u mai iha PCIC  atu aprezenta keixa kona-bá defamasaun mai ha’u iha Facebook no partilla iha mós WatsApp,  hodi akuza ha’u mak suspeitu bá kazu omisídiu iha Delta-Elemloi, foin lalais ne’e,” Emanuel Moniz Martins da Costa, hateten bá jornalista sira, hafoin hato’o nia keixa bá PCIC.

Emanuel Moniz Martins da Costa haktuir kronolójia katak, iha Sesta (06/01/2023), haleu tuku 02:00 (la lembra minutu), nia ho kolega balu, hosi seremónia festa ida, fila bá uma.

To’o iha uma, haree xáve motór monu ka naklosu sai, maibé motór sei moris. Emanuel katak, dala-ruma xáve motór monu hela fatin festa nian. Nune’e, nia deside fila mesak bá fatin festa nian hodi buka fila-fali nia xáve motór ne’ebé monu.

“Ha’u fila-fali bá foti xávi motór ne’e, hetan duni seguransa sira iha ne’ebá, ha’u tun fila-fali mai iha fatin akontesimentu Elemloi, ha’u haree ema barak iha ne’ebá, ne’e mak ha’u rasik bá hamriik iha ne’ebá, no família hosi matebian ne’e nia primu sira, no nia kolega sira ne’ebé mak momentu kalan sira hemu tua, la’o hamutuk ne’e, iha ne’ebá hela,” Emanuel Moniz Martins da Costa haktuir.

Iha lokál akontesimentu, matebian nia kolega sira ho família balun akompãña hein hela vitima Isaac Hornai ne’ebé ho kondisaun kanek gráve, toba hela iha trotoar leten, no hein hela karreta ambulánsia ne’ebé kontakta ona, atu bele tula vitíma lori bá Ospitál. Maibé, tanba ambulánsia tarde, nune’e matebian nia primu sira-ne’e, husu ajuda bá nia (Emanuel), atu ho ninia motorizada ne’e, bele transporta hela  vitima bá Sentru Saúde Comoro.

Lee Mós : Breaking News: Ema Deskoñesidu Oho Joven Ida iha Delta

“Agora, matebian latan hela iha rai ne’e, ha’u mós see tilun bá matebian, nia iis sei iha hela, entaun, ne’e mak ha’u dehan, loos ona, ha’u ajuda lori bá Sentru Saúde Comoro. Entaun, matebian ho nia primu sira ida hamutuk ne’e, ha’u lori motór, matebian nia primu ne’e tuur iha kotuk liu, matebian iha klaran. Entaun hiit mai, ami na’in-tolu mak lori bá,” Emanuel haktuir.

Emanuel Moniz Martins da Costa, ne’ebé ajuda transporta matebian Isaac Hornai bá Sentru Saúde Comoro, hato’o ona keixa bá PCIC, Sábadu (07/01/2023). Foto/Elio dos Santos da Costa

Bainhira to’o iha Sentru Saúde Comoro, Emanuel rasik ho matebian nia primu ho inisial D ne’e, sira na’in-rua mak hatun metebian hosi motór leten, hodi lori tama bá hatoba iha maka leten (kama bá pasiente nian). Hafoin hatoba tiha vitima, médiku ka doutór ne’ebé halo cheek-up kedan bá vitima ninia kondisaun fizika sira ne’ebé kanek.

“Maibé doutór hatete de’it katak, matebian iis laiha ona. Entaun, ha’u sei iha inisiativa obriga doutór, ha’u dehan, doutór, por favór ceek tán dala-ida lai. Entaun, doutór mós halo tuir, hodi ceek tán matebian ne’e, doutór loke matebian nia matan, hatudu mai ha’u dehan, nia iis laiha ona. Doutór fó sentidu kondolénsia, entaun, ha’u mós nonook, hakru’uk tun, ha’u sai mai hamriik iha liur,” Emanuel da Costa, hateten.

Iha Sentru Saúde Comoro, Emanuel hetan mós membru PNTL ida, husu tuir nia kona-bá akontesimentu kazu ne’e. Maibé, Emanuel haktuir bá membru polísia ne’e, tuir saida mak nia haree iha akontesimentu ne’e.

Hafoin konta tiha nune’e, membru Polísia ne’e, hasai mós Emanuel nia fotográfia ida, inklui motór ne’ebé sira transporta vitíma bá Sentru Saúde Comoro.

“Depois ida ne’e, kolega polisia ne’e, hasai ha’u nia foto, foto ida agora dadauk espalla iha Facebook ho WhatsApp  ne’e, ho motór nia xapa matrikula, ha’u la hatene, agora dadauk, foto ne’e, ha’u haree tutan fali hosi ema seluk,” Emanuel konta.

Liu tiha ida ne’e, vitima ninia primu sira haruka nia fila uluk ona bá uma. Maibé, uainhira to’o iha uma, nia (Emanuel) simu fali kontaktu hosi polísia, katak atu bá fali Sentru Saúde Comoro. To’o iha ne’ebá, vitima nia aman ho inan inklui familia balu mós, iha hotu ona Sentru Saúde Comoro.

“To’o iha uma, polisia telefone fali, ha’u fali Ospitál Comoro, familia nia Pai ho Mãe mak iha ne’ebá ona. sira sei fó agradese mai ha’u, sei dehan obrigadu mai ha’u, no ha’u mós hatán de’it katak, ita labele halo buat ida ona. Ha’u hakarak ajuda mak nune’e, nu’udár sentimentu umanu, famiíia matebian mós ha’u la koñese, tantu ema sé-sé mak sira la’o hamutuk ne’e, ha’u la koñese, tanba de’it sentimentu umanu mak, ha’u ho inisiativa rasik mak hakarak ajuda matebian, maibé, la konsege salva nia vida,” Emanuel hateten.

Emanuel Moniz Martins da Costa nia foto ne’ebé ema espalla iha Facebook ho WhatsApp.

Hafoin ida-ne’e, iha madrugada ne’e kedan, polísia lori Emanuel bá kompleta ninia dokumentu identidade inklui hato’o mós deklarasaun balu kona-bá kazu ne’e iha ekipa sira investigasaun nian iha Centro de Formação Policia (CFP) Akadémia Comoro. Depois ne’e, nia mós fila-fali uma.

La to’o de’it iha ne’e, iha dadeer, Emanuel simu kontaktu ida hosi polísia sira, husu nia atu bá fila-fali iha Servisu Investigasaun Kriminál Nasionál (SIKN) iha kuartel Komandu Jerál PNTL, Caicoli. Maibé, Emanuel dehan, molok sumbete ninia deklarasaun sira bá SIKN, ninia fotográfia espalla ona iha média sosial sira, hosi duun katak, nia mak autór kazu omesídiu ne’e.

“Depois de investigasaun hotu, ida ne’e mak polisia sira foin hatete mai ha’u dehan, agora dadauk ne’e, ema hothotu hatene dehan ó mak agora suspeitu. Entaun oinsá, ha’u haree iha ne’ebá, ha’u nia vida mós komesa hetan ameasadu maka’as ona hosi parte hothotu, hosi ne’ebé-ne’ebé, katak ha’u mak suspeitu. Tanba ida ne’e mak ha’u mai keixa iha ne’e, hodi bele buka tuir,” nia hateten.

Emanuel Moniz Martins da Costa, sente ofendidu ho ninia imajen fotográfia ne’ebé espalla ona iha média sosial, tanba duun nia mak hanesan autór bá iha kazu ne’e. No tuir Emanuel, situasaun ida ne’e, fó perigu ka ameasa tebes bá nia vida la seguru. Tanba ne’e, husu PCIC atu kontinua prosesa nia karta keixa ne’e bá oin, hodi buka tuir autór sira ne’ebé espalla informasaun ‘bosok’ iha média sosial.

Oras ne’e dadaun, Polisia Nasional Timor-Leste (PNTL) liuhosi unidade Servisu Investigasaun Kriminál Nasionál (SIKN) bolu ona sidadaun mane hamutuk na’in-lima, hodi hato’o sira nia deklarasaun bá polisia ligadu ho kazu omisídiu ne’e.

Autoridade Seguransa Identifika Autór Prinsipál

Informasaun hosi ekipa sekreta bá Hatutan.com informa katak daudaun ne’e autoridade seguransa identifika ona autór prinsipál ne’ebé oho matebian  Isaac Hornai.

Liuhosi gravasaun CCTV, autoridade seguransa identifika ona autór prinsipál na’in-rua, ida sona matebian Isaac Hornai no ida seluk kondús motór ne’ebé involve direta iha kazu omisídiu ne’e.

PNTL liuhosi Departamentu Investigasaun Kriminál hein orientasaun identifika no intensifika paradeiru autór na’in-rua  ne’e nian no sei halo kapturasaun iha tempu badak.

Matebian Isaac Hornai Baptista “Esa”, moris iha loron 17 Setembru 2003, nu’udár oan primeiru hosi Florentino Ximenes no Joaquina Ximenes Gusmão, iha Suku Saelari, Postu Administrativu Laga, Munisípiu Baucau.

Matebian Isaac Hornai Baptista “Esa”, nia isin-mate oras ne’e rai hela iha sira nia rezidénsia Aldeia São José Ai-meti Laran, no tuir planu, Domingu (08/01/2023), família sira sei haloot matebian nia isin iha semiteiru públiku, Kakaulidun, Bairru Pité, Díli.

Jornalista: Rogério Pereira Cárceres