Connect with us
Pakote Ahi

Justisa & Krime

Gravasaun CCTV Hatudu Ema Na’in-rua Mak Oho Isac Hornai iha Delta-Elemloi

Published

on

Hatutan.com, (06 Janeiru 2023), Díli-Gravasaun Closed-circuit television (CCTV) ne’ebé autoridade Polísia rekolla iha lokál akontesimentu  bá kazu omisídiu iha área Delta-Elemloi, Díli, hatudu ema na’in-rua kondús motór mak lori kro’at sona-mate vítima Isac Hornai Baptista ho naran estimadu “Essa”.

Lee Mós : Breaking News: Ema Deskoñesidu Oho Joven Ida iha Delta

Gravasaun CCTV hatudu ema ida tuun hosi motór sona vítima. Foto/Repro

Kazu asasinatu ne’e akontese Sesta (06/01/2023), hale’u tuku 02:00 dadeer, ne’ebé rezulta vítima mate iha fatin no monu bá trotoar leten ho raan suli hanesan bee.

Tuir gravasaun CCTV ne’ebé iha ona Polísia nia liman, hatudu katak vítima la’o hela, derrepente ema na’in-rua ho motór halai toman nia iha lokál akontesimentu. Nune’e, na’in-ida tuun lalais hosi motor diretamente lori kro’at atu hanesan tudik sona razada (dala-haat ka dala-lima) vítima nia kotuk klaran no sona  dala-ida iha vítima nia kabun-mamar hodi hlao vítima monu bá rai.

Advertisement

Vítima    Isac Hornai Baptista halo esforsu hamriik atu la’o, maibé la’o la dook, manu hikas bá trotoar leten ho kondisaun ran suli maka’as no mate fatin.

Komandante Polísia Nasionál Timor-Leste (PNTL), Munisípiu Díli, Superintendente Xefe Natércia Eufrasia Soares Martins, informa, komandu PNTL simu duni informasaun katak, iha akontesimentu iha parte Elembloi, joven ida hetan sona, la konsege salva.

Bainhira lori halai bá iha Sentru Saúde Comoro nian, iha tempu ne’e komandu simu informasaun vitima mate tiha ona, ekipa tun kedas iha fatin, no oras ne’e dadauk ekipa halo ona identifikasaun iha lokál akontesimentu no vitima ka mate-isin entrega ona bá iha investigasaun nasionál hodi submete bá iha prosesu autópsia.

“Parte investigasaun rekolla dadus balun, ita mós hetan informasaun hosi parte balu inklui gravasaun CCTV, maibé ita estuda para análiza hodi liga bá iha akontesimentu ne’e,” Superintendente Xefe Polísia Natércia Eufrasia Soares Martins, informa bá jornalista sira iha Sentru Akadémia Polísia, Comoro.

Komandante Natércia dehan, dadaun ne’e, komandu Díli ninia informadór no parte hothotu halo hela serbisu  iha terrenu, ho komandante eskuadra nia lideransa espera katak, parte sira ne’ebé hakarak serbisu hamutuk ho polísia ninia informasaun, bá oin, sei hetan autór ne’ebé maka komete krime omesídiu ida-ne’e.

Advertisement

Ligadu ho investigasaun bá kazu ne’e, iha prosesu inísiu, PNTL sei bolu mós joven sira ne’ebé hemu tua hamutuk ho vitima ne’e tanba sira sai hanesan xáve ka fontes informasaun bá iha polísia.

Komandu Munisípiu Díli fó ona mós orientasaun bá iha eskuadra no mós ekipa investigadór atu asegura joven sira ne’e, ne’ebé mak sira hemu tua hamutuk para Polísia bele rekolla informasaun hosi sira.

Komandante Munisipiu Dili ne’e dehan, liuhosi prosesu investigasaun sira ne’ebé ma oras ne’e la’o hela, garante katak sei bele kaptura suspeitu sira ne’e.

Joaquina Ximenes Gusmão, natebian nia inan, haktuir, akontesimentu ema deskoñesidu hakotu nia oan nia vida ne’e, nia rasik laiha, tanba hela tiha iha Taibessi. Nia oan mane vítima ne’e, durante hela ho nia inan-ki’ik sira iha Aldeia São José Ai-meti Laran, Díli.

Iha Kinta kalan (05/01/2023), vítima partisipa hela iha seremónia aniversáriu nia primu ida nian iha uma Ai-meti Laran, no han hamutuk mós ho família sira. Nune’e, to’o iha kalan boot, maizumenus tuku 2: liu, vitima deside atu fila bá nia avo sira nia uma iha Fatuhada. Maibé vitima fila bá, foin to’o de’it iha estrada ibun Delta-Elembloi, vitima hetan sona hosi ema deskoñesidu ho motór.

Advertisement

“Horkalan nia han hamutuk ho ho nia alin sira uma Ai-meti Laran, tanba iha nia primu ida mak halo tinan, To’o kalan boot, nia atu fila-fali bá nia avo sira nia uma iha Fatuhada. Maibe to’o iha dalan, estrada ibun área Delta-Elembloi, hetan sona hosi ema deskoñesidu to’o mate fatin,” matebian nia inan Joaquina Ximenes Gusmão, haktuir bá Hatutan.com iha Sala Mortuáriu, HNGV.

Vitima Isac Hornai Baptista “Essa”, moris iha loron 17 fulan-Setembru 2003, nu’udár oan primeiru hosi Florentino Ximenes no Joaquina Ximenes Gusmão, iha Suku Saelari, Postu Administrativu Laga, Munisípiu Baucau.

Durante sei ki’ik, vitima hela de’it ho nia avo sira iha Laga, to’o iha tinan 2013 mak vítima muda mai eskola iha Díli, hodi hela ho nia aman nia familia sira iha área Delta-4, Aldeia São José-Ai-meti Laran, Suku Comoro, Postu Administrativu Dom Aleixo.  Matebian foin konklui nia estudu sekundária iha Eskola Nobel da Paz, Quitál Boot.

Oras ne’e dadaun, vítima nia isin-mate rai  hela iha Sala Mortuáriu Hospitál Nacional Guido Valadres (HNGV) hodi hein autorizasaun hosi familia sira atu submete bá prosesu autópsia.

Jornalista: Rogério Pereira Cárceres

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Justisa & Krime

Eviksaun, PDHJ Konsidera Aprosimasaun SEATOU Sees Hosi Prinsípiu Direitus Umanus

Published

on

Hatutan.com, (19 Abríl 2024), Díli—Provedoria Direitus Humanus no Justisa (PDHJ), lamenta no konsidera aprosimasaun ne’ebé Governu halo liu hosi Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias  hasoru komunidade iha Díli, sees hosi prinsípiu direitus umanus ninian.

(more…)

Kontinua Le'e

Justisa & Krime

Prizioneiru Na’in-Lima Okupa Kuartu Ida, HAK Husu Governu Estabelese-tán Prizaun Foun

Published

on

Hatutan.com, (18 Abríl 2024), Díli—Asosiasaun HAK sujere atu Governu estabelese tán prizaun foun tanba liu hosi monitorisazaun ne’ebé mak sira halo iha prizaun Díli, Gleno no Suai hatudu katak kondisaun infra-estrutura barak mak aat no la sufisiénte bá dadur sira ne’ebé ema na’in-lima okupa lisku kuartu ida ho medida ne’ebé kiik.

(more…)

Kontinua Le'e

Justisa & Krime

MJ Sérgio Hornai Sei Foti Medida Hasoru Pesoál PCIC Husu Osan bá Oan-Mane Fujitivu Teves Jr

Published

on

Hatutan.com, (17 Abríl 2024), Díli-Ministru Justisa (MJ), Sérgio de Jesus Fernandes da Costa Hornai, sei foti medida forte to’o bele halo demisaun bá pesoál membru Policia Ciêntíficia e de Investigação Criminal (PCIC) ida ne’ebé deskonfia husu osan bá fujitivu Arnolfo Teves Jr nia oan-mane, foin lalais ne’e.

(more…)

Kontinua Le'e
Advertisement

Trending