Hatutan.com, (09 Janeiru 2022), Díli—Prezidente Repúblika (PR), José Ramos-Horta lamenta ho invazaun hosi apoiante eis Prezidente Repúblika Federativa Brazíl, Jair Bolsonaro bá Kongressu Nasionál, Supermu Tribunál no Palásiu Planalto iha Brazilia.

Prezidente Repúblika, José Ramos-Horta partisipa iha serimónia tomada de posse ba Prezidente Luís Inácio Lula da Silva iha loron 01 fulan Janeiru tinan ne’e, iha Brazil. Foto/Média PR.

“Ha’u preokupa no konsternasaun kle’an, toma nota, eventu barbaru, assaltu violentu ba instituisaun demokrátika Brazileira, hosi apoiante eis Prezidente Bolsonaro ne’ebé daudaun ne’e sai refujiadu iha Estadus Unidus,” Hatutan.com sita deklarasaun Ramos-Horta relasiona ho situasaun polítika iha Brazíl, iha komunikadu, Segunda (09/01/2023).

Lee Mós: Horta Nia Prezensa iha Brazil Hato’o Solidariedade

Ramos-Horta konsidera asaun ne’ebé hala’o hosi apoiantes eis Prezidente Bolsonaro hanesan mós invazaun apoiante hosi eis Prezidente Estadus Unidus Amérika, Donald Trump bá Capitolio iha fulan Janeiru tinan 2021, tanba la konkorda ho rezultadu eleisaun ne’ebé fó vitória ba atuál Prezidente Estadus Unidus, Joe Biden.

“Fó lembra katak, assaltu ne’ebé organiza hosi eis Prezidente Donald Trump, bá instituisaun aas liu simbólika no demokrasia Brazileira, kongressu amerikanu ne’ebé ha’u pessoalmente koñese di’ak liu, iha tinan barak nia laran, ba servisu no moris ho instituisaun amerikana antiga ne’e, hanesan copy paste bá saida mak akontese iha Washington, Estadus Unidos Amérika hosi Apoiante eis Prezidente Bolsonaro ne’ebé ho konsidénsia iha hela Florida, Estadus Unidus,” Prezidente Repúblika ne’e hateten.

Ba Premiadu Nobel da Páz ne’e deklara, asaun violenta ne’ebé akontese iha Brasil, ema hotu tenke kondena no rejeita.

“Ne’e aktu gravidade extrema, ne’ebé ita hotu, nasaun CPLP, Uniaun Europeia, nasaun demokrátiku hotu iha mundu, Nasoens Unidas no ida hotu, tenke rejeita totalmente no tenke kondena maka’as,”  Xefe Estadu afirma.

Prezidente Repúblika, José Ramos-Horta partisipa iha serimónia tomada de posse ba Prezidente Luís Inácio Lula da Silva iha loron 01 fulan Janeiru tinan ne’e, iha Brazil.

Jornalista: Vito Salvadór