Hatutan.com, (11 Janeiru 2023), Díli—Prezidente Repúblika (PR), José Ramos-Horta kontinua hala’o asaun karitativa hodi fó apoiu bá família vulnerável sira iha munisípiu Manufahi no Manatutu.

Prezidente Repúblika (PR), José Ramos-Horta kontinua hala’o asaun karitativa hodi fó apoiu bá família vulnerável sira iha munisípiu Manufahi no Manatutu, Janeiru 2023. Foto/Média PR.

Xefe Ekipa Palásiu Prezidensiál, Filomeno Lay hateten apoiu ne’ebé lori mai família vulnerável sira ne’e hanesan inisiativa hosi Xefe Estadu Ramos-Horta, hahú kedan iha Natál ho povu iha 21 Dezembru 2022 liu bá ho apoiu tomak hosi seitór privadu sira.

Lee Mós: Prezidente Repúblika Fahe Prezente Natal Bá Komunidade Balibar ho Tibar

“Prezidente Repúblika sempre deklara iha públiku katak, tenke iha sentídu umanízmu bo’ot liu ba sidadaun vulnerável sira, liu-liu inan-feton no labarik sira iha área remotas,” Hatutan.com sita deklarasaun Filomeno Lay iha komunikadu, Kuarta (11/01/2023).

Iha Munisípiu Manufahi, apoiu bá benefisiáriu hamutuk 25, kompostu hosi inan-feton na’in 11 no Mane na’in 14, avo feto ida ho mane ida mak iha kondisaun saúde krítiku, maske nune’e hetan ona asisténsia sosiál hosi Ministériu Solidariedade Sosiál.

Ekipa Prezidénsia Repúblika mós distribui apoiu ba família 25 iha Suku Ma’abat, Munisípiu Manatutu.

Família vulnerável sira identifikada hosi Servisu Sosiedade Sivíl Prezidénsia Repúblika servisu hamutuk ho autoridade lokál, hodi haree sidadaun ne’ebé merese duni hetan apoiu.

Benefisiáriu hosi aldeia Urufu, Suku Holarua, Postu Administrativu Manufahi Vila, Oscar Côrte-Real ho idade 80 agredese ba tulun hosi Prezidénsia Repúblika.

“Ha’u durante ne’e hela ho oan-mane ida, ha’u katuas ona, halo toos mós labele ona. Ho sasan ne’e mai ami kontente tebes, obrigadu ba Prezidente Repúblika,” Oscar Cortereál hateten.

Xefe Aldeia Urufu, Francisco Tilman mós apresia inisiativa hosi Prezidénsia Repúblika atu tulun sidadaun vulnerável iha área rurál.

“Ami agradese tebes ba Prezidente Repúblika nia laran luak iha aldeia Urufu. Hanoin duni nia povu iha área remotas, ne’ebé oras-ne’e presiza duni tulun,” Francisco Tilman hateten.

Nune’e mós Xefe Suku Ma’abat, munisípiu Manatutu António da Silva konsidera Prezidente Repúblika hatene kle’an povu nia sofrimentu, tanba ne’e deside tulun sidadaun sira.

“Iha Kampaña Eleitorál, Prezidente Repúblika deklara sei sai Prezidente ba ema hotu, ohin hatudu duni liu hosi asaun karidade ne’e, tanbá Prezidente Repúblika hatene katak agora daudaun povu enfrenta hela menus hahan no hamlaha. Tanbá ne’e mak lori ajudu ne’e mai. Labele haree ba sasan ne’ebé oferese maibé haree ba sentidu domin,” Xefe Suku Ma’abat António da Silva hateten.

Líder Komunitáriu ne’e deseza saúde di’ak ba Prezidente Repúblika José Ramos-Horta, atu ukun Povu tomak no atende sidadaun sira nia difikuldade.

Antes ne’e, Prezidénsia Repúblika hala’o ona asaun karidade iha Munisípiu Bobonaro, Ermera, Díli no sei realiza tán iha munisípiu seluk. 

Jornalista: Vito Salvadór