Hatutan.com, (12 Janeiru 2022), Díli- Primeiru-Ministru (PM) Taur Matan Ruak, rejeita fó komentáriu relasiona  membru Governu, Ministru Asuntu Parlamentár no Komunikasaun Sosiál (MAPKOMS),  Francisco Martins da Costa Pereira Jerónimo, ne’ebé Komisaun Anti Korrupsaun (CAC, sigla portugés) konstitui ona hanesan arguido.

Lee Mós : CAC: MAPKOMS Hanesan Arguido Bazeia Bá Artigu 59 KPP

CAC konstitui Ministru Francisco Martins da Costa Pereira Jerónimo hanesan arguido bá kazu instalasaun Set-Top Box Rádiu Televizaun Timor-Leste, Empreza Públiku (RTTL,E.P) ho baze bá prova investigasaun sira iha kazu refere.

Primeiru-Ministru (PM), Taur Matan Ruak. Foto/Elio dos Santos da Costa

Primeiru-Ministru Taur Matan Ruak hateten nia parte sei la fó komentáriu bá kazu instalasaun Set-top Box RTTL, E.P tamba ne’e iha área justisa nia servisu.

“Ha’u la halo komentáriu bá buat ne’ebé liu ona, tamba ne’e justisa nia área tan ne’e ha’u lahalo komentáriu ba ida-ne’e,” Primeiru-Ministru Taur Matan Ruak, hateten bá jornalista sira iha Palásiu Prezidensiál Nicolau Lobato, Díli, Kinta (12/01/2023).

CAC konstitui Ministru Francisco  Martins da Costa Pereira Jerónimo  nu’udár arguido tuir baze legal ka Kódigu Prosesu Penál (KPP) artigu Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé lei fó kompeténsia maka halo notifikasaun tuir despaxu ka ho oden ofisioza hosi sekretaria judisiál.

Ministru Francisco Martins da Costa Pereira Jerónimo, Kuarta (04/01/2023), hale’u tuku 09.04 Otl, marka prezensa iha edifísiu CAC hodi hatán bá notifikasaun hosi sesaun investigadór CAC nian para presta deklarasaun relasiona ho kazu projetu instalasaun Set-top Box RTTL,E.P ne’ebé lori prejuízu bá Estadu ho montante orsamentu $7,680.00.

Iha altura ne’ebá Ministru Francisco Jerónimo, lamenta ho asaun sira hosi investigadór CAC nian, ne’ebé husu nia hanesan ministru atu bá hato’o ninia deklarasaun. Tanba tuir nia, CAC tenke respeita ierarkia bá órgaun konstitusionál Estadu ka Governu nian, tanba nia (MAPKOMS) hanesan ‘membru governu’ ida.  Nune’e, CAC tenke halo karta bá Xefe Governu Taur Matan Ruak, atu bele iha ‘koñesimentu no fó autorizasaun’. 

Lee Mós : Kazu Instalasaun Set-Top Box RTTL,E.P, CAC Halo Buska no Apreensaun iha Gabinete MAPKOMS, FFTL ho Rezidénsia Likisá

Diretór Investigasaun CAC, José Verdial afirma CAC halo nia servisu investigasaun bazeia bá delegasaun husi Ministériu Públiku no aktu sira ne’ebé CAC hala’o ne’e tuir de’it saida mak Lei Prosesuál dehan.

Nia afirma relasiona ho Kazu Set-top Box RTTL, E.P, CAC konstitui Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo,  hanesan arguido bazeia ba artigu 59 KPP tamba atu halo inkéritu bá ema ruma  tenke konstitui uluk ema ne’e ba arguido foin halo inkéritu.

“Atu halo inkéritu bá suspeitu ida, lei hateten katak molok atu halo interrogatóriu bá suspeitu ida tenke konstitui nia hanesan arguido no tenke  aplika kedas medida de koasaun hanesan TIR (Termu Identidade Rezidénsia), no iha artigu 59 KPP hateten klaru no CAC hala’o nia servisu bazeia de’it bá iha saida mak KPP dehan, hanesan órgaun polisiál kriminál ita halo ita-nia servisu tuir de’it lei,” José Verdial hateten hodi responde Hatutan.com, Kuarta (04/01/2023).

Nia hatutan, lei konstitui ona Ministru MAPKOMS Francisco Martins da Costa Pereira Jerónimo  hanesan arguido, automatikamente nia hanesan arguido no tuir artigu 59 KPP, artigu 5 hateten kualidade hanesan arguido moris durante prosesu nia laran tomak. 

Hatán kona-bá Ministru MAPKOMS Francisco Martins da Costa Pereira Jerónimo  nia lamentasaun katak CAC la halo karta koñesimentu bá iha Primeiru Ministru hanesan Xefe Governu, diretór investigasaun CAC ne’e hateten, iha notifikasaun ne’e ko’alia klaru hela katak notifika direita bá ema ne’e, tuir saida mak hakerek iha artigu 91 no 92 KPP, tamba ne’e CAC hala’o de’it nia servisu tuir saida mak KPP dehan.

“Hanesan órgaun polisiál kriminál, ami hala’o servisu bazeia de’it bá saida mak KPP dehan,” José Verdial haktuir.

Lee Mós : PM Taur Simu Karta Lamentasaun Hosi IFJ Kona-bá “Denuncia Caluniosa”

Jornalista : Vito Salvadór