Hatutan.com, (13 Janeiru 2023), Díli-Prezidente Repúblika (PR), José Ramos-Horta, planeia ona, dekreta loron eleisaun Parlamentár.

Lee Mós : Diskursu Prezidente Repúblika José Manuel Ramos-Horta iha Serimónia Investidura

Prezidente Repúblika (PR), José Ramos-Horta. Foto/Elio dos Santos da Costa

Informasaun ne’ebé Hatutan.com asesu hosi fontes oioin iha Palásiu Prezidensiál katak  posivel boot liu iha loron 13 fulan-Fevereiru 2023, Prezidente Repúblika (PR) dekreta loron eleisaun Parlamentár nian. Maske nune’e, molok too  iha ne’ebá, Prezidente Repúblika sei konvoka sorumutuk ho ho líder partidu politíku (Parpol)  sira ne’ebé asentu iha Parlamentu Nasionál hodi koalia kona-bá markasaun bá data ka loron bá eleisaun parlamentár nian ne’e.

Bainhira konfirma ho Prezidente Repúblika kona-ba loron 13 fulan-Fevereiru hanesan loron ne’ebé PR atu dekreta loron eleisaun Parlamentár nian, Ramos-Horta haktuir katak, “seidauk marka, ha’u sei konsulta lai ho lider sira hotu, ho governu, para depois marka data ida ne’ebé mak hothotu simu. Ha’u lakohi ha’u mak deside, impoin,” Ramos-Horta, hateten.

“Ha’u espera katak, iha semana ruma nia laran, konsulta ho partidu, rona dadaun ona balu, rona dadaun ona lider sira, no depois sei marka eleisaun, konsulta ho Governu, konsulta ho STAE, CNE,”  José Ramos-Horta bá jornalista sira hafoin seremónia aniversáriu Komponente Navál iha baze Navál, Hera, Kinta (12/01/2023).

Tuir Ramos-Horta, eleisaun parlamentár ne’e, primeiru, tenke la’o di’ak ho 100% integridade, laiha fraude, laiha book mákina sira ne’e, kontajen, buat sira ne’e, depois importante fasilita eleitór para joven sira bele vota avontade, labele problema, halai bá mai, buka fatin atu vota.

“Halai bá distritu, to’o bá distritu, naran laiha ne’ebá, entaun, buat sira ne’e labele akontese tán, ne’e para populasaun, maiória Timor joven, sira tenke iha prioridade para haree oinsá sira bele vota,” Ramos-Horta hateten.

Jornalista: Rogério Pereira Cárceres