Hatutan.com, (17 Janeiru 2023), Díli- Sekretáriu Estadu Asuntu Kombatente Libertasaun Nasionál (SEAKLN), Júlio da Conceição “Loro Mesak”,  hateten Konsellu Nasionál Veteranu liuhosi Komisaun Nasionál Verifikasaun bá veteranu sira ne’ebé rejista iha tinan 2009 sei halo validasaun bá veteranu hamutuk  90.000 ne’ebé komisaun rejista no tuir ona entrevista hosi komisaun nasionál iha postu no munisípiu sira iha territóriu nasionál.

Sekretáriu Estadu Asuntu Kombatente Libertasaun Nasionál (SEAKLN), Júlio da Conceição “Loro Mesak”. Foto/Elio dos Santos da Costa

SEAKLN Júlio da Conceição “Loro Mesak” hato’o ona dadus veteranu 2009 nian bá Primeiru-Ministru (PM), Taur Matan Ruak, katak komisaun verifikasaun sei halo validasaun nasionál hahú hosi loron 01-25 fulan-Fevereiru, tinan ne’e.

Nia afirma, dadus veteranu ne’ebé rejista iha 2009 hamutuk 124.000 no komisaun halo ona entrevista no ema hamutuk 90.000 liu mak lista tama ona atu komisaun halo verifikasaun ikus no hetan validasaun tuir grau ne’ebé iha.

“Validasaun ne’e katak ami sei bolu estrutura sira hosi munisípiu sei tun hotu, atu nune’e, bele deside ona ema ne’ebé mak bele bá grau 8-14, grau 15-19, grau 0-3 no grau 4-7,” Júlio da Conceição “Loro Mesak”  hateten bá jornalista sira hafoin hasoru malu ho Primeiru-Ministru Taur Matan Ruak iha Palásiu Governu, Tersa (17/01/2023).

Governante ne’e informa mós katak hafoin halo validasaun nasionál komisaun sei kontinua tun hikas ba iha terrenu atu halo entrevista bá veteranu sira ne’ebé rejistradu ona, maibé la konsege tuir entrevista iha data sira ne’ebé antes ne’e komisaun termina ona tamba ho razaun servisu no seluk tan.

“Ami halo validasaun nasionál hotu tiha, ami sei haruka komisaun verifikasaun tun fali bá atu halo prosesu kontinuasaun bá sira 30.000 ne’ebé rejista ona, maibé seidauk verifika no entrevista,” Nia subliña.

Xefe Governu entrega tomak kompeténsia bá iha Ministériu Asuntu Kombatente no Libertasaun Nasionál (MAKLN) atu lidera prosesu tomak.

Jornalista: Vito Salvadór