Hatutan.com, (13 Janeiru 2023), Díli- Prezidente Repúblika (PR), José Ramos-Horta, enkoraja sidadaun hotu atu kuda ai-kameli hanesan investimentu bá futuru família no nasaun Timor-Leste.

Prezidente Repúblika, José Ramos-Horta hateten lia hirak ne’e hafoin partisipa iha kampaña loron nasionál ai-kameli no floresta ne’ebé hala’o iha Jardín Nasionál bá Eroi sira  iha Metinaro, Sesta (13/01/2023).

PR Ramos-Horta partisipa iha kampaña loron nasionál ai-kameli no floresta ne’ebé hala’o iha Jardín Nasionál bá Eroi sira iha Metinaro, Sesta (13/01/2023). Foto/Vito Salvadór

Xefe Estadu hateten, inisiativa kuda ai-kameli ne’ebé Ministériu Agrikultura no Peska (MAP), halo ne’e di’ak, tanba ne’e buat ne’ebé Governu halo, Ministériu Agrikultura no Peska halo Prezidente Repúblika sempre apoiu.

Kampaña bá kuda ai-kameli ne’e, tuir PR Ramos-Horta, di’ak no importante tebe-tebes, ai-kameli hanesan ai ida ne’ebé orijinál iha Timor-Leste dezde tinan atus bá atus, no kuandu iha tinan 1400 liubá Xina sira mai Timor buka mak ai-kameli, tamba iha mundu ne’e uluk iha rai ruma mak iha domíniu ho ai-kameli mak Timor no Índia.

“Ai-kameli nia folin valór boot loos, maibé ida-ne’e lori tinan 20 too 30 mak nia kualidade no prontu para koa, ne’e signifika ita kuda ohin hanesan investimentu bá futuru,” Prezidente Repúblika José Ramos-Horta hateten.

Ba foin-sa’e sira, estudante no inan-aman sira ne’ebé  partisipa iha komemorasaun loron nasionál ai-kameli hodi mós kuda ai-kameli iha fatin Jardín bá Eroi sira sei haree nia rezultadu iha tinan 30 mai.

Iha futuru sei Prezidente Repúblika sei ko’alia ho Governu atu mobiliza foin-sa’e sira no joven arte-marsiál no arte-ritual sira atu sai hanesan ajente voluntáriu hodi hahú halo kampaña reflorestasaun kuda ai sira ne’ebé iha valór ekonómiku, ai fuan sira no kuda ai sira iha jardín no fatin sira ne’ebé nesesita atu kuda ai.

Iha fatin hanesan, Vise-Ministru Agrikultura no Peska, Abílio Xavier de Araújo hateten ohin hanesan loron nasionál ba ai-kameli no mos floresta, nune’e Ministériu Agrikultura hili fatin Jardín bá Eroi sira iha  Metinaro atu kuda ai-kameli oan hamutuk 200.

Ministériu Agrikultura no Peska hahú halo mós mobilizasaun bá iha munisípiu sira hotu atu bele hahú kuda ai-kameli hanesan investimentu ida baáfuturu.

Jornalista: Vito Salvadór