Hatutan.com, (17 Janeiru 2023), Díli—To’o oras-ne’e, prosesu investigasaun bá kazu omesidiu ne’ebé akontese iha área Elemloi, Delta sei iha faze identifikasaun.

Iha faze ida-ne’e, Polísia Nasionál Timor-Leste (PNTL) liuhosi Servisu Investigasaun Kriminál Nasional (SIKN), bolu ona sidadaun mane na’in 23 hodi hato’o sira nia informasaun bá kazu ne’e.

Lee Mós: Breaking News: PNTL ho F-FDTL Kaptura Suspeitu bá Kazu Omisídiu Delta-Elemloi

Iha Segunda (16/01/2023) ekipa konjunta liuhosi PNTL ho FALINTIL Forsa Defeza Timor-Leste (F-FDTL) kaptura no transporta sidadaun mane na’in-rua iha área ka Suku Urahou, Postu Administrativu Hatulia, Munisipiu Ermera, fronteira ho Munisipiu Bobonaro.

“Omesídiu iha área Elemloi, horseik PNTL bolu sidadaun ida ne’ebé deskonfia involve iha kazu omesídiu ne’e, mai iha ne’e hodi halo identifikasaun durante oras 12 nia laran, depois husik fali, nune’e PNTL hatene no kontinua buka-tuir tán autór sira seluk,” Portavóz Komandu Jerál PNTL, Superintendente Xefe Polisia, Arnaldo de Araújo hateten liuhosi konferénsia imprensa iha Kuartél Jerál PNTL, Caicoli, Tersa (17/01/2023).

Komandante Arnaldo de Araújo klarifika mós katak, sidadaun AD ne’ebé horseik ekipa konjunta transporta hosi Ermera mai iha PNSIK Caicoli ne’e, seidauk suspeita bá kazu omesidiu iha Elemloi, maibé investigadór sira halo de’it identifikasaun bá sidadaun mane na’in-rua ne’e.

“Ema ne’e ita seidauk bele dehan nia sai suspeitu tanba ita identifika de’it,” portavós Arnaldo hateten.

Hafoin kazu ne’e mosu, iha Sesta (06/01/2023) ne’e kedan PNTL liuhosi unidade PNSIK identifika ka bolu ona sidadaun hamutuk na’in-23 hodi rekolla informasaun relasiona ho kazu ne’e to’o hetan autór prinsipál.

“La’ós nia mesak de’it, maibé tuir informasaun ne’ebé mak ami hetan hosi Polisia Investigasaun Kriminál nian, kuaze sidadaun hamutuk na’in 23 ne’ebé mak PNTL identifika ona. Ho ida-ne’e, sidadaun ida ne’ebé horseik mak PNTL lori mai ne’e, foti de’it nia identidade hodi bele halo identifikasaun,” komandante Arnaldo esplika.

PNTL nafatin halo servisu hodi buka autór prinsipál sira bá kazu omesídiu iha Elemloi-Delta. Bainhira iha ona rezultadu finál ruma bá kazu ne’e, komandu PNTL sei publika liuhosi média, hodi públiku bele hatene.

Kazu omesidiu hodi oho matebian Isaac Hornai Baptisa iha área Delta-Elemloi ne’e mosu iha Sesta (06/01/2023), tuku 02:00, madrugada Otl, iha Aldeia São José Ai-meti Laran, Suku Comoro, Postu Administrativu Dom Aleixo, Munisipiu Dili.

Iha artigu 52 hosi Kódigu Prosesu Penál fó dalan bá PNTL atu identifika sidadaun sé de’it ne’ebé mak PNTL deskonfia hodi foti sira-nia deklarasaun ho nia identidade durante oras 12 nia laran.

Jornalista: Rogério Pereira Cárceres