Hatutan.com, (02 Agostu 2023), Díli—Tribunál Judisiál Primeira Instánsia Díli (TJPID) iha Kuarta 02 Agostu tuku 15:25 lorokraik otl, hahú prossesu primeiru interrogatóriu judisiál bá suspeitu ho inisiál HSM, tanba deskonfia involve iha kazu omesídiu bá matebian Isaac Sinarai, iha área Elemloi-Delta, Suku Comoro, Postu Administrativu Dom Aleixo, munisípiu Díli.

Tribunál Judisiál Primeira Instánsia Díli (TJPID) iha Kuarta 02 Agostu tuku 15:25 lorokraik otl, hahú prossesu primeiru interrogatóriu judisiál bá suspeitu ho inisiál HSM, tanba deskonfia involve iha kazu omesídiu bá matebian Isaac Sinarai, iha área Elemloi-Delta, Suku Comoro, Postu Administrativu Dom Aleixo, munisípiu Díli. Foto: Elio dos Santos da Costa/Hatutan.com.

Observasaun Hatutan.com nota katak, Polísia Nasionál Timor-Leste (PNTL) liuhosi ekipa Departamentu Investigasaun Kriminál (DIK) transporta suspeitu HSM to’o iha Tribunál Judisiál Primeira Instánsia Dili (TJPID) iha tuku 14:54, lorokraik otl.

Lee Mós: Kazu Omesídiu Elemloi, PNTL Detein Suspeitu HSM

Iha audiénsia primeiru interrogatóriu ne’e, Ministériu Públiku (MP) liuhosi Prokuradór Luis Hernani Rangel, akuza arguidu HSM ho krime Omesídiu Simplés tuir Artigu 138, Lei Kódigu Penál Timor-Leste nian.

Baze bá ida ne’e maka Ministériu Públiku alega arguidu HSM bá prizaun preventiva, tanba deskonfia hanesan autór, involve iha kazu omesídiu ne’ebé rezulta vítima Isaac Sinarai lakon vida.

Maibé, Defensoria Públika, liuhosi Defensór João Carvalho defende no husu Tribunál atu aplika de’it medida koasaun Termu Identidade Rezidénsia (TIR) bá ninia kliente, tanba iha deklarasaun ninia kliente deklara katak, la hatene buat ruma kona-bá kazu omesídiu ne’e. Alende ne’e, kliente ne’e mós konsidera alegasaun sira hosi Ministériu Públiku ne’e, la loos hotu.

Hafoin rona tiha parte hotu, Tribunál deside hodi muda desizaun finál bá Kinta (03/08/2023) tuku 10:00 dadeer otl.

Audiénsia prossesu primeiru interrogatóriu ne’e, prezide hosi Juiz titulál Afonso Carmona, Ministériu Públiku (MP), Prokuradór Luis Hernani Rangel no arguidu hetan asisténsia legál hosi Defensór Públiku João Carvalho.

Iha Segunda (31/07/2023) tuku 13:30 lorokraik otl, Forsa Konjunta sira hosi Departamentu Investigasaun Kriminál (DIK), Departamentu Informasaun Polisia (DIP), Unidade Espesial Polisia (UEP), FALINTIL Forsa Defeza Timor-Leste (F-FDTL) liuhosi Unidade-Falintil (UF), kaptura suspeitu HSM iha ninia rezidénsia Maskareñas, aldeia 04, Suku Maskarinas, Postu Administrativu Vera Kruz, Munisipiu Dili.

Kapturasaun bá suspeitu HSM ne’e baze bá Mandadu-detensaun hosi Tribunál Judisiál Primeira Instánsia Díli (TJPID) ho NUC: 0002/23.PNSIC.

Tribunál Judisiál Primeira Instánsia Díli (TJPID) iha Kuarta 02 Agostu tuku 15:25 lorokraik otl, hahú prossesu primeiru interrogatóriu judisiál bá suspeitu ho inisiál HSM, tanba deskonfia involve iha kazu omesídiu bá matebian Isaac Sinarai, iha área Elemloi-Delta, Suku Comoro, Postu Administrativu Dom Aleixo, munisípiu Díli. Foto: Elio dos Santos da Costa/Hatutan.com.

Hafoin kaer tiha suspeitu, Forsa Konjunta sira, evakua kedan HSM, bá iha Sala Investigasaun PNSIC nian, hodi submete bá iha sertifikasaun, nomós detein suspeitu iha sela-detensaun Komandu PNTL Munisipiu Dili iha Caicoli, durante oras 72 laran no ohin, suspeitu submete kedan mai Tribunál Dili tuir prosesu primeiru interrogatóriu judisiál.

Kazu asasinatu ne’e akontese iha Sesta (06/01/2023) hale’u tuku 02:00 dadeer ne’ebé rezulta vítima mate iha fatin no monu bá trotoar leten ho raan suli hanesan bee.

Tuir gravasaun CCTV ne’ebé iha altura ne’ebá, Polísia foti ona, hatudu katak vítima la’o hela, derrepente ema na’in-rua ho motór halai toman nia iha lokál akontesimentu.

Nune’e, na’in-ida tuun lalais hosi motór diretamente lori kro’at atu hanesan tudik sona razada (dala-haat ka dala-lima) vítima nia kotuk klaran no sona  dala-ida iha vítima nia kabun-mamar hodi halo vítima monu bá rai.

Hafoin ho kro’at sona ku’ak tiha vitima, monu bá rai, suspeitu sira ne’e, ho motor halai lakon. Iha tempu ne’ebá kedan, autoridade polisiál sira liuhosi unidade oioin, halo esforsu hotu buka tuir autór sira ne’e.

Ikus mai, to’o fulan-hitu (7) liu ona maka PNTL liuhosi DIK halo kapturasaun bá suspeitu ne’ebé deskonfia involve iha kazu ne’e iha ne’ebé oras-ne’e alegadu bá prizaun preventiva.

Lee Mós: Gravasaun CCTV Hatudu Ema Na’in-rua Mak Oho Isac Hornai iha Delta-Elemloi

Jornalista: Rogério Pereira Cárceres