Hatutan.com, (18 Janeiru 2023), Díli—Tribunál Distritál Dili (TDD) hasai ona despaixu ne’ebé deside hodi liberta totál arguidu Eis Ministru Interior, Longuinhos Monteiro tanba prosesu sira kona-bá buska no apreensaun hosi Policia Ciêntífica e de Investigação Criminal (PCIC), iha Segunda (16/01/2023) konsidera ilegál.

Defensór Públiku, Fernando Lopes de Carvalho.

Tuir loloos iha Kuarta 18 Janeiru 2023, arguidu ne’e tenke submete bá prosesu primeiru interrogatóriu judisiál iha TDD, maibé depois haree bá fali promosaun sira hosi Ministériu Públiku (MP) hodi imputa krime Armaa Ilegál, Tribunál estuda katak esforsu sira mak durante PCIC halo ne’e illegál.

Lee Mós: Autoridade Seguransa Rekolla Kilat Tolu Iha Rezidénsia Longuinhos Monteiro

“Tribunál, depois de simu promosaun hosi Ministériu Públiku no observa legalidade tomak haree katak, prosesu kapturasaun, apreensoins no buskas ne’ebé mak halo bá ami nia kliente ilegais no la tuir Lei. Entaun, absolve tiha ka liberta imediata. Ida ne’e de’it,” Defensór Públiku, Fernando Lopes de Carvalho, hateten iha TDD, Kuarta (18/01/2023).

Fernando Lopes de Carvalho dehan, iha despaixu ne’e hateten katak, prosesu buska no apreensaun sira hosi PCIC ne’e ilegá.

Defensór públiku ne’e la hatete PCIC, maibé prosesu ne’ebé sira halo buska, apresaun no kapturasaun, ne’e PCIC mak halo ka autoridade balun mak halo, ne’e Tribunál rekoñese la tuir formalizmu legál ne’ebé  prevee iha kódigu prosesu penál.

“Laiha mandadu, depois iha Lei hateten katak, Buskas, Apresaun ne’e tenke bazeia bá mandadu Tribunál nian, depois halo iha seis-oras dadeer to’o seis-oras lokraik. Labele halo iha kalan boot, ne’e lei proibidu. Iha formalizmu sira hanesan ne’e, ita nia autoridade sira la haree, entaun ninia konsekuénsia mak ida ne’e, ita hotu la’o tuir Lei,” Fernando Lopes de Carvalho, esplika.

Ministériu Públiku liuhosi Prokuradór Jacinto Babo, promove arguidu Longuinhos Monteiro ho krime Armas Ilegáis, maibé Tribunál mak haree legalidade bá iha kapturasaun, bá buska no apresaun.

“Sé Tribunál rekoñese dehan ilegál, entaun promosaun mai Tribunál la simu. Tanba ne’e maka ohin Tribunál deside katak, liberta totál arguidu,” Fernando Lopes de Carvalho, hateten tán. 

Hatán kona-bá oinsá ho arma sira ne’ebé PCIC preende ona, defeza hosi arguidu de’e dehan nia sei lee lai despaixu sira ne’e, tanba iha kedan folla 10. Maibé, klaru katak desizaun sira hosi Tribunál ne’e iha mós finalidade bá objetu hirak ne’e.

“Ha’u lee lai despaixu ne’e, normalmente despaixu sira hanesan ne’e fim bá objetu apreensoins, mós iha despaixu laran hateten,” nia informa.

Iha segunda (16/01/2023), ekipa konjunta kompostu hosi forsa Polisia Nasional Timor-leste (PNTL), liuhosi Servisu Infornasaun Polisia (SIP), no FALINTIL Forsa Defeza Timor-Leste (F-FDTL), hosi Servisu Informasaun Militár (SIM/J2), Polisia Militár (PM) konjunta ho Polisia Sientífika no Investigasaun Kriminál (PCIC-Sigla Português), halo buska no apreensaun domisiliária bá eis ministru interior ninia rezidénsia iha Likisá, tanba deskonfia rai-subar arma funu nian.

Rezultadu hosi buska ne’e, konsege prende Pistola Lot-9789 Made by Germany+Carregador ida ho bala hitu (7), totál (1). Kilat Air Force, Made in US, Model R-1212 totál 1. Kilat Marauder 177-Cal/4.Smm 2500 Psi (1). Kllat Sam Yang ind.co. Made in Korea, Golden Sayer air rifle Mud 700.cal.4,55mm (1). Kilat Rama, Horton Special edition, Made in US, B59748 (1).

Munisoens Real Mi6 (309), Munisoens Kaliber-12 (2), Munis0ens Pistola Glock 19 (1,496), Munisoens Simulada Mi6 (160), Munisoens Klat Vinte Dois (22) (11), Munisoens Broning Ro’o (3), Rama Oan Red Zone 2219 (2), Bomba Kilat (3), Munisoens Maujer (6), Munisoens SKS (29), Munisoens J3 (168), Munisoens Boracha (19), Munisoens simulada Metra (99), Munisoens Kaliber 22 (11), Progetil M16 (1).

Karegador J3 (4), Karegador Pistola Lot- 9789 (2). Assesoriees GSP Map- 60csx Garmin (1), Cas Batria (1), Maka Militar (2), Lampu Solar (2), Jacket Militar (2), Sillêncioso Pressão ao Ar (6+pack 2).

Jornalista: Rogério Pereira Cárceres