Hatutan.com, (19 Janeiru 2033), Díli—Ministériu Saúde (MS) hamutuk ho parseiru dezenvolvimentu sira hala’o lansamentu ba manuál sira diskrisaun servisu no avaliasaun dezempeñu pessoál saúde nian no manuál foun sira ne’ebé iha sei fó impaktu transformativu atu hametin jestaun forsa traballu saúde iha Timor-Leste (TL).

Ministériu Saúde (MS) hamutuk ho parseiru dezenvolvimentu sira hala’o lansamentu ba manuál sira diskrisaun servisu no avaliasaun dezempeñu pessoál saúde nian no manuál foun sira ne’ebé iha sei fó impaktu transformativu atu hametin jestaun forsa traballu saúde iha Timor-Leste (TL), iha otél Timor, Kinta (19/01/2023).

Lansamentu ne’e sai hanesan etapa importante ida ba governu Timor-Leste atu haforsa liután sistema saúde públiku ho apoiu hosi Estadus Unidus Amérika (EUA) liu hosi nia ajénsia Dezenvolvimentu Internasionál (USAID).

Lee Mós: Ministériu Saúde Kontinua Tau Prioridade ba Saúde Inan ho Oan

Ministra Saúde Odete Maria Freitas Belo hateten, hanesan Ministra akompaña ho entuziazmu prosesu sira kona-bá elaborasaun manuál sira ne’e.

Manuál foun deskrisaun servisu no avaliasaun dezempeñu pessoál saúde Ministériu nian sei reforsa no sai hanesan dokumentu orientadór hodi asegura melloramentu kualidade prestasaun saúde iha komunidade.

Rekursu umanu sai pilár save iha dezenvolvimentu konstrusaun saúde ida ne’ebé forte, efisiente, efikaz no sustentável.

Tamba ne’e dezenvolvimentu instituisaun nian lao ba oin bainhira jestaun rekursu umanu diak iha kada instituisaun no nia departementu sira.

“Manuál foun deskrisaun servisu no avaliasaun dezempeñu pessoál saúde ne’e mós mai ho objetivu atu asegura implementasaun planu estratéjiku nasionál seitór saúde, nune’e Ministériu Saúde halo esforsu lubuk ida iha ámbitu dezenvolvimentu no jestaun rekursu umanu,” Odete Maria Freitas Belo hateten iha diskursu durante lansamentu iha otél Timor, Kinta (19/01/2023).

Manuál foun deskrisaun servisu no avaliasaun dezempeñu pessoál saúde ne’e la’ós de’it atu utiliza hodi avalia funsionáriu nia dezempeñu servisu, maibé bele mós liga ho Ministériu Saúde nia rezultadu ba iha programa no atividade sira ne’ebé la’o hela.

Signifika, funsionáriu sira ne’ebé dezempeña di’ak iha sira nia servisu bele sistematikamente identifika bele hetan apresiasaun liu hosi promosaun, progresaun, no mekanizmu apresiasaun pozitivu seluk.

Enkaregadu negósiu Estadus Unidus Amérika, Zema Semunegus hateten, Estadus Unidus Amérika iha kompromisu atu hametin liután parseria ho Timor-Leste atu haforsa mós saúde sidadaun Timor-Leste nian.

USAID servisu hamutuk ho diresaun nasionál rekursu umanu no diresaun nasionál servisu korporativus iha Ministériu Saúde iha tinan 2022 atu dezenvolve no finaliza dokumentu sira kona-bá elaborasaun manuál deskrisaun servisu no avaliasaun dezempeñu pessoál saúde liu hosi diskusaun lubun ida ho parte interesadu sira hotu inklui ho profisionál saúde oin-oin.

Asaun hodi hametin forsa traballu profesionál saúde nian tenke sai hanesan esforsu ida koletiva atu bele tulun sidadaun hotu hetan Asistente saúde dignu tuir prestasaun ne’ebé pessoál saúde sira oferese bazeia ba deskrisaun servisu no dezempeñu ne’ebé di’ak.

“Há’u hakarak aproveita oportunidade ida ne’e hodi kongratula no agradese ba ekipa tékniku sira hamutuk ho parseiru sira ne’ebé fó kontribuisaun hodi dezenvolve manuál ida-ne’e,” Zema Semunegus hateten.

Enkarregadu negósiu ne’e orgullu bele ajuda ona Ministériu Saúde dezenvolve dokumentu sira kona-bá elaborasaun manuál deskrisaun servisu no avaliasaun dezempeñu liu hosi USAID nia nia atividade ba sustentabilidade sistema saúde.

Iha fatin hanesan, Diretór Rekursu Umanu Ministériu Saúde, Augusto Pinto hateten Programa VIII governu konstituisionál iha área saúde fo énfaze ba pilár hitu importante hanesan kuidadu saúde primária, kuidadu saúde servisu ospitalares, infraestrutura ba Saúde, jestaun ba distribuisaun medikamentu no ekipamentu tékniku ba laboratóriu, emerjensia médika, jestaun administrasaun ba setór saude no ida ikus liu mak rekursu umanu.

“Implementasaun ba pilár hitu ne’e ida ne’ebé apropriadu no adekuadu mak rekursu umanu hodi bele implementa atividade Ministériu Saúde ne’ebé hatu ona iha planu estratéjiku nasionál seitor saúde 2020-2030,” Augusto Pinto hateten.

Prioridade Ministériu Saúde nian ba tinan 2023-2024 maka  dezenvolve manu’al rekrutamentu, dezenvolve manuál avaliasaun servisu no dezempeñu servisu, deskrisaun servisu ka job description ne’ebé ohin halo lansamentu, dezenvolve politika treinamentu no kapasitasaun rekursu umanu, dezenvolve baze dadus rekursu umanu, no promove bolsa de estudu ba pessoál saúde sira.

Jornalista: Vito Salvadór