Hatutan.com, (21 Janeiru 2023), Díli—Prezidente Repúblika (PR), José Ramos-Horta hasoru-malu ho Ministru Negósiu Estranjeiru Arabia Saudita, Prínsipe Faisal Bin Farhan Al Saud, hodi ko’alia vizaun globál no husu Timor-Leste nia apoiu ba Expo-2030 ne’ebé  sei realiza iha sidade Riyadh, Kapitál hosi Arabia Saudita.

Prezidente Repúblika (PR), José Ramos-Horta hasoru-malu ho Ministru Negósiu Estranjeiru Arabia Saudita, Prínsipe Faisal Bin Farhan Al Saud, hodi ko’alia vizaun globál no husu Timor-Leste nia apoiu ba Expo-2030 ne’ebé sei realiza iha sidade Riyadh, Kapitál hosi Arabia Saudita, Sesta (21/01/2023). Foto/Média PR.

Iha enkontru ne’e, Prezidente Repúblika rona aprezentasaun hosi Prínsipe Faisal Bin Farhan Al Saud kona-bá vizaun bá 2030, atu revolusiona no habelar liu-tán kooperasaun ekonómika ho nasaun seluk.

Lee Mós: Ramos-Horta Husu Sentru Komérsiu Internasionál Apoia Formasaun bá Rekursu Umanu TL

Vizaun expo-2030 hanesan programa estratéjiku ba diversifikasaun ekonómika, hodi redúz dependénsia ba fundu petrolíferu no mós dezenvolve seitór públiku hanesan edukasaun, saúde, infraestrutura no turizmu, tuir insiativa ne’ebé Arabia Saudita lansa iha tinan 2016.

“Ideia sira ne’e interessante no sira koko atu implementa, tanba ne’e sira husu Timor-Leste nia apoiu atu sai uma-na’in ba Expo-2030 iha Sidade Riyadh,” Prezidente Repúblika José Ramos-Horta hateten iha komunikadu.

Xefe Diplomasia hosi Arabia Saudita deklara katak, sira iha kapasidade no rekursu preparadu atu implementa vizaun 2030, hodi pozisiona Riyadh, iha konjuntura polítika globál.

Lansamentu inisiativa ne’e, sei koinside ho Expo-2030 iha Riyadh no husu Timor-Leste nia apoiu.

“Ami prontu atu implementa inisiativa ne’ebé hanaran – Davos in the Desert. Husu Timor-Leste atu apoia Arabia Saudita sai uma na’in ba Expo-2030. Nasaun 96 deklara publikamente sira nia apoiu,” Prínsipe Faisal Bin Farhan Al Saud hateten.

Baihira implementa ideia ida ne’e, Ministru Negósiu Estranjeiru Arabia Saudita promete atu konvida Prezidente Repúblika, José Ramos-Horta atu halo lansamentu ba inisiativa ne’e.

Iha parte seluk, líder na’in rua mós lamenta ho Forum Ekonómiku Mundiál iha Davos, Suíça ne’ebé domina hosi nasaun osidentál sira, liu-liu Estadus Unidus Amérika no Uniaun Europeia hodi foka de’it ajenda funu iha Ukrania.

Tanba ne’e, Prezidente Repúblika, José Ramos-Horta, sujere ba Arabia Saudita atu organiza Forum ida iha Riyadh, hodi garante partisipasaun hosi nasaun oi-oin no estabelese kooperasaun ho nasaun sira hosi súl “Amerika Latina”.

Jornalista: Vito Salvadór