Hatutan.com, (24 Janeiru 2023), Díli- Ministériu Turismu, Komérsiu no Indústria (MTCI), diresaun Inspesaun Jerál bá Jogus (IGJ, sigla portugés), Tersa (24/01/2023), ofisializa atividade jogu bola guling Luz-Clarita Amizade.

Intensaun prinsipál hosi legaliza jogu bola guling hosi empreza Luz-Clarita Amizade ne’e atu bele ordena jogu tradisionál sira.

Governu liuhosi Inspesaun Jerál bá Jogus, Tersa (24/01/2023, lansa ofisiál jogu bola guling Luz-Clarita Amizade. Foto/Elio dos Santos da Costa

Nune’e, bele kontribui reseita bá Estadu no absorve traballadór timoroan.

Inspetór Jerál bá Jogus, Domingos da Costa Guterres hateten, IGJ hanesan autoridade regulador  sujere atu atividade ne’e la’o ho di’ak, no husu ba empreza atu koopera ho autoridade seguransa, atu nune’e, labele mosu perturbasaun no violénsia ne’ebé afeita bá instabilidade.

Husu mós ba empreza atu kontinua dezenvolve atividade ne’e ho di’ak no ho responsabilidade, atu nune’e, bele fó biban no kbiit bá juventude sira iha oportunidade bá servisu.

“Há’u nia parabéns ba empreza Luz-Clarita Amizade atu kontinua dezenvolve atividade ne’e, hodi kontribui reseita  bá Estadu no fó oportunidade servisu bá foin-sa’e sira ne’ebé presiza servisu,” Inspetór Jerál ba Jogus, Domingos da Costa Guterres hateten.

Iha atividade jogu tradisionál bola guling ne’e, empreza Luz-Clarita Amizade iha obrigasaun selu taxa  bá Estadu kalan ida ho montante $100.00, no prosesu selu ne’ebé aplika mak tenke selu uluk molok atividade lao.

Provisoriamente IGJ fó lisensa ba fulan ida, hafoin halo monitorizasaun no inspesaun hodi haree prosesu ne’ebé iha kuandu di’ak IGJ sei prolonga lisensa bá to’o tinan.

“Taxa bá fulan ida nian sira selu tiha ona ho montante $3,100.00, sira selu antes nune’e ohin IGJ mai halo lansamentu atu hatudu katak atividade jogu tradisionál bola guling Luz-Clarita Amizade legal no hetan lisensa hosi Governu liu husi IGJ,” Domingos Guterres hateten.

Iha fatin hanesan Manajer Empreza Luz-Clarita Amizade, Frandix Klisman Dias Gama hateten, objetivu loke jogu tradisionál bola guling mak atu buka lukru no kontribui bá loke kampu traballu bá foin-sa’e sira, inklui kontribui taxa bá estadu hodi hasa’e reseita domestika.

Nia afirma oras ne’e dadaun empreza Luz-Clarita Amizade fó ona servisu bá traballadór hamutuk 30, no sei iha posibilidade aumenta tan tamba empreza sei alarga mós bá iha munisípiu sira seluk.

Jogu tradisionál bola guling Luz-Clarita Amizade prepara mós fatin VIP bá kliente sira ne’ebé hakarak joga maibé ho privasidade signifika lakohi ema seluk hatene sira nia identidade no haree sira joga.

Luz-Clarita Amizade mós sei prepara kondisaun no garante seguransa ba kliente sira VIP nian, uainhira kliente sira hakarak joga bele kontaktu no empreza mak sei prepara transporte no ba tula kliente sira ba iha fatin jogu VIP ne’ebé empreza repara ona.

“Ami iha ne’e iha fatin jetal no mós VIP, iha klase VIP ita oferese ba kliente sira ne’ebé

Empreza Luz-Clarita Amizade sei garante direitu kliente sira nian tuir akordu ne’ebé estabelese ona no sei garante mós atu kliente sira sente seguru iha fatin jogu tradisionál bola guling.

Serimónia lansamentu jogu bola guling Luz-Clarita amizade ne’e hetan bensaun tuir tradisaun sarani katóliku nian no partisipa iha serimónia ne’e mai hosi autoridade lokal inklui administradora postu Cristo Rei, Munisípiu Díli.

Jornalista: Vito Salvadór