Hatutan.com, (16 Fevereiru 2023), Díli- Governu liuhosi Ministériu Agrikultura no Peska (MAP) distribui bero fibra glass no material peska nian bá benefisiáriu sira grupu peska hamutuk 10 iha Postu Administrativu Dom Aleixo ho Kristu Rei, Munisípiu Díli.

Lee Mós : Raul Lemos: Bero 22 Tula iha Ró Berlin Nakroma La’ós Sasán Ilegal

Ministériu Agrikultura no Peska (MAP), Kinta (16/2/2023), halo Lansamentu distribuisaun bero 10 bá grupu peska 10 iha Postu Administrativu Dom Aleixo ho Kristo Rei, Munisípiu Díli. Foto/Elio dos Santos da Costa

Ekipamentu peska ne’ebé MAP liuhosi SEP distribui bá benefisiáriu sira mak kada grupu sei hetan Bero Fibra Glass ida, Motór ka makina 15 pk ida ho tali rolu ida, jaket pelampu rua no jankar ida.

Iha serimónia distribuisaun ne’ebé hala’o Kampu Alor, Díli, Kinta (16/2/2023), Sekretáriu Estadu Peska, Elidio de Araújo hateten, distribuisaun bero fibra glass bá benefisiáriu hamutuk 10 iha Munisípiu Díli ne’ebé kompostu hosi Postu Administrativu Dom Aleixo ho Kristu Rei.

Peskador iha Munisípiu Díli ne’ebé rejista iha MAP hamutuk 700-resin no iha grupu hamutuk 200, signifika ho bero 10 ne’ebé distribui tau tan ho bero 10 ne’ebé distribui iha tinan 2020, foin kobre grupu peskador 29 mak hetan no 180 seidauk hetan.

“Apoiu husi Governu sei laremata iha tinan ida ne’e, depois governu ida nia mandatu remata, governu ida sae fali sei nafatin apoiu peskadór sira,” Sekretáriu Estadu Peska, Elidio de Araújo hateten.

Nia husu bá peskadór sira atu utiliza material peska ne’ebé Governu oferese  ne’e ho didi’ak nune’e bele hadia ekonómia família nian no kompleta nesésidade seluk iha uma laran.

Sekretáriu Estadu Peska ne’e hatutan saida maka Governu halo la haree bá nia ne’e se, maibé haree bá saida mak peskadór sira presiza tuir proposta ne’ebé iha, no Governu haree katak se mak peskador nia merese atu hetan.

Serimónia lansamentu distribuisaun bero fibra glass hosi Ministériu Agrikultura no Peska (MAP) bá grupu peska 10 iha Postu Administrativu Dom Aleixo ho Kristu Rei, Munisípiu Díli, Kinta (16/2/2023). Foto/Elio dos Santos da Costa

Ministériu Agrikultura no Peskas (MAP) no Sekretáriu Estadu Peska tau osan hamutuk $500.000.00,  sosa bero Fibra Glass hamutuk 110 bá munisípiu 11, kompleta ho makina 15 pk no ekipamentu sira seluk para bele fasilita grupu peskadór sira.

“Ohin ita halo lansamentu iha Munisípiu Díli nian, ita fó bero Fibra Glass hamutuk 10 ba grupu 10 kompostu husi Postu Administrativu Dom Aleixo no Kristu Rei. Ita hein katak sira sei utiliza tuir saida mak sira husu,” Nia dehan.

Vise-Ministru Agrikultura no Peska, Abílio Xavier de Araújo hateten, atu dezenvolvimentu iha seitor peska nian, responsabilidade Governu nian liuhosi ministériu kompotente hodi apoiu grupu peska ne’ebé iha.

Nia afirma saida mak MAP oferese bá peskadór sira tenke kuidadu tamba ida ne’e sei tulun atu hadi’a rendimentu ekonomia família nian no atu garante nia sustentabilidade hodi utiliza bá tempu naruk.

“Há’u hanoin Ministériu Agrikultura no Peskas iha dever moral atu tulun imi peskador sira, no ida ne’e mós tulun kria hela kampu de traballu ida atu oinsa husi imi nia servisu bele fó tutan servisu bá ema seluk liuhosi rezultadu peska ne’ebé iha,” Abílio Xavier de Araújo tenik.

Orsamentu Jerál Estadu Timor-Leste nia kada tinan dependénsia maka’as bá fundu petrolíferu no setór alternativu ida mós mak peska, tamba ne’e presiza atu maximiza hodi apoiu makina Estadu nian.

Iha fatin hanesan Koordenadór grupu peska Juventude Bebonuk, Salvador Pereira dos Santos, agradese bá VIII Governu Konstitusionál liuhusi Ministériu Agrikultura no Peska ne’ebé apoiu material peska bá grupu peskadór sira atu bele ajuda  grupu peskadór sira-nia kbiit rendimentu.

Bero fibra glass ne’ebé distribui bá grupu peska sira. Foto/Elio dos Santos da Costa

“Há’u agradese ba governu ne’ebé apoiu ona ami nia grupu, ida ne’e ajuda tebes ami ne’ebé loron kalan servisu hanesan peskador. Tamba ho bero ne’ebé iha ami bele uza bá peska no hetan ikan fa’an bá sustenta família, selu oan sira-nia eskola no halo mós buat seluk ne’ebé ami presiza,” Salvador Pereira dos Santos hateten.

Hanesan benefisiáriu ba bero fibra glass komprometidu atu kuidadu bero ne’e no material peska ne’ebé Governu fó atu bele lori benefísiu bá grupu no bele kontribui bá rendimentu família.

Iha akordu ne’ebé iha sita entre benefisiáriu sira ho Governu liuhosi MAP katak ró ne’e utiliza de’it bá nesesidades beska. Katak la bele fó aluga bá parte seluk, la bele tula pasajeiru ka transporta turista no la bele fa’an.

Bainhira grupu benefisiáriu sira laiha responsabilidade hodi utiliza bero ne’ebé iha la tuir akordu, governu iha obrigasaun foti fila no entrega bá grupu seluk ne’ebé presiza.

Bero fibra glass hirak ne’e fornese hosi empreza Sheramor Sucesso Supply LDA  nu’udár empreza timoroan  nian ne’ebé manan konkursu públiku iha MAP.

Jornalista: Vito Salvadór