Hatutan.com, (20 Fevereiru 2023), Díli—Governu liuhosi sorumutu estraordináriu Konsellu Ministru (KM) nian iha segunda 20 fevereiru nomeia Ministru Finansas (MF), Rui Augosto Gomes, hodi bá partisipa iha sorumutu ho tema globál ‘Open Government Partnership’.

Ministru Prezidénsia Konsellu Ministru (MPKM), Fidelis Manuel Leite Magalhães hateten, reuniaun estraordináriu ne’e hodi rezolve assuntu pertinente sira balun, mais ho karákter simplés no iha kontestu rekezitu legál sira ho nia impaktu boot.

Lee Mós: KOICA Sei Oferese Millaun $6 Hodi Kombate Moras Infesioza Iha TL

KM aprova projetu deliberasaun ida bá partisipasaun Timor-Leste nian iha ‘Open Government Partnership’ no dezigna membru governu ida responsável bá iha área finansas, hanesan reprezentante governu nian.

Iha kazu ida-ne’e, Governu-nia pontu fokál maka Ministru Finansas (MF), Rui Gomes tanba durante ne’e nia halo esfrosu lubuk ida iha áera transparénsia, mais iha área transparénsia ambientál nian.

“Ita hakarak atu halo nune’e ita-nia jestaun sira rekursu finansas públikas nian, no área finansas nian, sei sai nakloke liután iha tempu oin mai. Ministru Finansas ohin indikadu, nomeadu hosi Governu atu bele sai reprezentante governu nian, iha partisipasaun Timor-Leste, iha inisiativa globál ida-ne’e,” Fidelis Magalhães informa liuhosi konferénsia imprénsa hafoin sorumutu Konsellu Ministru estraordináriu iha Palásiu Governu Díli.

‘Open Government Partnership’ ida-ne’e hanesan inisiativa globál ida bá governu sira hotu ne’ebé mak iha dezempeñu di’ak no vontade politika ne’ebé boot, atu promove governasaun ida nakloke.

La’ós ne’e de’it, ‘Open Government Partnership’ ne’e hanesan inisiativa multilaterál ida ne’ebé lansa iha fulan-setemru 2011 ho objetivu atu garante kompromísiu konkretu Governu sira nian bá promosaun transferénsia, fomentu partisipasaun públika, kombate bá korupsaun no utilizasaun teknolojia foun bá fortalesimentu demokrasia partisipativa.

Inisiativa ida-ne’e apoia reforma iha nível governamentál no sosiedade sivíl iha país membru sira liu hosi  asisténsia ba planeamentu no implementasaun ba planu asaun sira no fasilita atu fahe esperiénsia no informasaun iha nível rejionál no globál ho forma atu permite aprendizazen ho par sira.

Iha loron 28 fulan-novembru tinan 2022, ‘Open Government Partnership’ avalia ona atu kumpri kritériu partisipasaun nian hosi parte Timor-Leste ne’ebé rezulta iha klasifikasaun mínima hosi 75% ne’ebé konklui katak, Governu Timor-Leste elejível atu partisipa iha inisiativa multilaterál ida-ne’e.

Jornalista: Rogério Pereira Cárceres